Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 82

Modekai ne Eseta

Modekai ne Eseta

TUJOKELEI myaka mityetye kumeso kwa Ezela kwenda mu Yelusalema. Modekai ne Eseta i Bene Isalela balēmekibwe mu bulopwe bwa Peleshia. Eseta i mukaja mulopwe, mwanabo Modekai nandi ye wa bubidi mu lupusa lwa mulopwe. Tutalei mobyapityila.

Bambutwile ba Eseta abafu aye ukidi mwanuke, ino Modekai wamulela. Ahaswelusa mulopwe wa Peleshia udi na njibo mu kibundi kya Shushane, ne Modekai i umo wa mu bengidi bandi. Difuku dimo, Vashiti mukaja mulopwe kamukōkelepo, penepo mulopwe watonge mwana-mukaji ungi ekale ke wandi mukaji. Uyukile mwana-mukaji waatonga? Eyo, i Eseta nsongwakaji mupopoke.

Ubamone yeu mwana-mulume wa kibengo ufukatyilwa na bantu’u? I Hamane. I muntu mulēme mu Peleshia. Hamane usaka Modekai, omwene ushikete koku’u, amufukatyile. Ino Modekai wapele. Wamone amba kufukatyila muntu mubi nenki ke biyampepo. Hamane wakalabala. Tala byaalonga.

Hamane wakabepela Bene Isalela kwa mulopwe. Wanena’mba: ‘I bantu babi kebakōkelangapo ku bijila byobe. Bafwaninwe kwipaibwa.’ Ahaswelusa kayukilepo’mba wandi mukaji Eseta i Mwine Isalela. Penepo walonda bya Hamane ne kuleta mbila’mba, mu difuku kampanda Bene Isalela bonso bakepaibwa.

Modekai watompola pa kwivwana uno mwanda. Watume musapu kudi Eseta’mba: ‘Lombola ne kudidila mulopwe etupandije.’ Papo mu Peleshia, i kijila kumona mulopwe shi kakwityilepo. Ino Eseta waenda’ko pakubulwa kwitwa. Mulopwe watambika Eseta mukombo wandi wa nsahabu, kino kilongwa kishintulula’mba kafwaninwepo kwipaibwa. Eseta waendela mulopwe ne Hamane bidibwa bivule. Kwine’kwa mulopwe waipangula Eseta amulombole kyasaka kwadi i kika. Eseta wanena kumulombola’kyo shi aye ne Hamane abaiya ku bidibwa bikwabo bya kesha.

Abo ku bidibwa, Eseta wasapwila mulopwe’mba: ‘Ami ne bantu bami tusa kwipaibwa.’ Mulopwe wakalabala. Waipangula’mba: ‘I ani ukutyile nkuku ya kulonga kyakyo?’

Eseta wanena’mba: ‘Walwana netu i muntu mubi Hamane!’

Papo mulopwe wakalabela’ko bininge. Wanena kwipaya Hamane. Kupwa, mulopwe watūla Modekai ke wa bubidi kupwa aye mwine. Penepo Modekai watūdija’ko kijila kipya kilomba Bene Isalela balwile būmi bwabo mu difuku dyobadi ba kwipaibwa. Modekai byaikala muntu mulēme, bantu bavule abakwasha Bene Isalela, kadi abakūlwa ku balwana nabo.

Mukanda wa mu Bible wa Eseta.