Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 69

Mwanuke Wakwasha Mwana-Mulume wa Bukomo

Mwanuke Wakwasha Mwana-Mulume wa Bukomo

LELO uyukile binena uno mwanuke mwana-mukaji? Ulombolanga lolo’u mwanda utala Edisha mupolofeto wa Yehova ne bintu bya kutendelwa byalonga na bukwashi bwa Yehova. Yeu lolo kayukilepo Yehova mwanda ke Mwine Isalelapo. Tutalei kikadile uno mwanuke mu njibo ya uno lolo.

Uno lolo i Mwine Shidea. Wandi mulume i Nemani, mukulumpe wa basola Bene Shidea. Bene Shidea bākwete uno mwanuke Mwine Isalela bu musungi, bāmutūla bu mwingidi wa mukaja Nemani.

Nemani udi na misongo imbi itwa bu makopo. Ino misongo ikokeja kuteta bipindi bimo bya ngitu. O mwanda uno mwanuke walombola mukaja Nemani amba: ‘Shi mfumwami waendele kudi mupolofeto wa Yehova udi mu Isalela, longa wamubelula makopo andi.’ Kupwa uno mwanda ubafika kwa mulumya uno lolo.

Nemani wabilanga bininge kubelulwa; penepo watyipe enka kwenda mu Isalela. Pa kufika, waenda ku njibo ya Edisha. Edisha wanena mwingidi wandi alombole Nemani akoye mu Munonga wa Yodano misunsa isamba-ibidi. Penepo Nemani wakalabala, kanena’mba: ‘I kutupu munonga wa mu Isalela upityile minonga ya kwetu!’ Pa kupwa kunena namino, Nemani wataluka.

Ino mwingidi wandi umo wamunena’mba: ‘Mfumwami, shi Edisha wakunene kulonga kintu kikomo longa ulongele’kyo. Ino kyowalekela koya mwaakunenena i kika?’ Ebiya Nemani walonda byanena mwingidi wandi ne kuketumpa mu Munonga wa Yodano misunsa isamba-ibidi. Ulonga’tu namino, misunya yandi ibaume kadi ibakoma!

Nemani wasangala. Wajokela kudi Edisha ne kumulombola’mba: ‘Pano nayuka’mba Leza wa Isalela ye wa bine pano pa ntanda ponso. Shi ke pano, yata byabuntu byonakupa.’ Ino Edisha walondolola’mba: ‘Nkiyata’byopo.’ Edisha uyukile’mba i kibi kuyata’byo, mwanda Yehova ye wakomeja Nemani. Ino Ngehazi mwingidi wa Edisha webyabila.

Penepa Ngehazi walonga namino. Aye Nemani ke mwende, Ngehazi wakamulonda lubilo. Kupwa Ngehazi kanena’mba: ‘Edisha wantume’mba umupe’ko byabuntu byobe bimo mwanda balunda nandi abaiya kumupempula.’ Bine, buno i bubela. Ino Nemani kayukilepo’mba i bubela; penepo wape Ngehazi byabuntu bimo.

Ngehazi pa kujokela ku njibo, Edisha wayuka byaalonga. Yehova ye wamulombola. Penepo wanena’mba: ‘Mwanda ubalonga kilongwa kibi, pano makopo a Nemani ke obe.’ Ponka’po makopo amukwata!

I bufundiji’ka botwefunda pa kino? Dibajinji, tufwaninwe kwikala bwa uno mwanuke na kwisambila padi Yehova. Kikekala kilumbuluke. Dya bubidi, ketwaketatulai mwētatwidile Nemani dibajinji, ino tukōkelei bengidi ba Leza. Dya busatu, ketwakabepai pamo bwa Ngehazi. Mwene tukokeja kwifunda bivule na kutanga Bible?