SHI wadi’mba wi mufwe, ino ubasanguka, inobe wadi wa kwivwana namani ku mutyima? Wadi wa kusangala bikomo! Ino, lelo muntu mufwe ukokeja kwikala mūmi monka? Kadi’nka na mwaadi wikadile’mwa?

Tala mwana-mulume’u, kadi ne mwana-mukaji ne mwanuke mwana-mulume. Mwana-mulume’u i mupolofeto Ediya. Mwana-mukaji i wa kishala wa mu kibundi kya Zelefata, mwanuke’u i wandi mwana. Bine, difuku dimo mwanuke’u wabela. Misongo pa kuninga wafwa. Penepo Ediya wanena mwana-mukaji amba: ‘Mpe mwanuke’o.’

Ediya waselela mwanuke pangala ne kumulādika pa butanda. Kupwa kalombela’mba: ‘A Yehova, jokeja būmi bwa mwanuke’u.’ Penepo mwanuke washilula kufoma! Kupwa Ediya wamujokeleja munshi kanena mwana-mukaji amba: ‘Tala, obe mwana ke mūmi!’ O mwanda inandi i musangale.

Mupolofeto wa Yehova mukwabo i Edisha. Wadi wingila bu mukwashi wa Ediya. Mwenda mafuku Yehova walongeja Edisha bingelengele. Difuku dimo Edisha waenda ku kibundi kya Shuneme, mwana-mukaji umo wamutundaila’ko biyampe. Kupwa uno mwana-mukaji wabutula mwana.

Mwana pa kutama, lubanga lumo waenda na shandi kukengila ku madimi. Ponka’po mwanuke wadila’mba: ‘Mutwe ubambazuka!’ Kupwa kumujokeja ku njibo, mwanuke wafu. Inandi wakwatwa bulanda kashā! Penepo waenda kuketa Edisha.

Edisha pa kufika, waselela mwanuke ufwile’wa mu kyumba. Walombela kudi Yehova, ne kulāla pa umbidi’wa. Ponka’po umbidi wa mwanuke wakaba, kupwa waasula misunsa isamba-ibidi. Inandi pa kutwela watana wandi mwana mūmi, nandi wasangala!

Bantu bavule ke bafwe. Bisaka byabo ne balunda nabo badi na bulanda mpata. Ino ketudipo na bukomo bwa kusangula bafwe. Inoko Yehova udi na bukomo. Kumeso’ku, tukefunda mwakasangwila midiyo ne midiyo ya bantu.

1 Balopwe 17:8-24; 2 Balopwe 4:8-37.