LELO uyukile bano bantu ne byobalonga? Bendanga ku bulwi, kadi bantu badi kumeso’ba bembanga. Padi ubeipangula’mba: ‘Mwanda waka batuimba kebadipo na bipete ne mikobe ya kukalwa nayo?’ Tutalei.

Yehoshafata i mulopwe wa bulopwe bwa bisaka bibidi bya Isalela. I wa kitatyi kimo na Mulopwe Ahaba ne Yezebele ba mu bulopwe bwa kungala bwa bisaka 10. Inoko Yehoshafata i mulopwe muyampe, kadi shandi Asa nandi wadi mulopwe muyampe. Penepo bantu ba mu bulopwe bwa kunshi bwa bisaka bibidi abashikata mu būmi buyampe.

Ino pano kubatambe kintu kimo kizakaja bantu. Mikendi ibalombola Yehoshafata’mba: ‘Kudi basola bavule ba Bene Moabu, ba Bene Amona ne ba mu Lūlu lwa Seila, baiya kwimutamba divita.’ Penepo Bene Isalela bavule abebungila mu Yelusalema kebabija Yehova. Abaenda ku tempelo, ne Yehoshafata kalombela’mba: ‘A Yehova Leza wetu, ketuyukilepo kya kulonga. Ketudipo na wa kwitukwasha ku basola bavule’ba. Tubakulupila bukwashi bobe.’

Yehova nandi waivwana ne kutuma mwingidi wandi umo anene bantu amba: ‘Bulwi ke bwenupo, i bwa Leza. Kemukalupo. Ino bandilai ne kutala mukemukūdila Yehova.’

Penepo pa kukya’bo, Yehoshafata wanena bantu amba: ‘Kulupilai mudi Yehova!’ Kupwa watūla batuimba kumeso kwa basola koku benda bemba mitendelo kudi Yehova. Uyukile byalongeka pa kufika kubwipi na bulwi? Yehova walengeja basola balwana nabo betape abo bene na bene. Ino Bene Isalela pa kufika, abatana basola bonso balwana bafwe!

Mwene Yehoshafata wālongele kya ñeni pa kukulupila mudi Yehova? Tukalonga kya ñeni shi netu tukulupile mudi Yehova.

1 Balopwe 22:41-53; 2 Bilongwa 20:1-30.