Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 63

Solomone Mulopwe wa Tunangu

Solomone Mulopwe wa Tunangu

SOLOMONE wabikala ukidi nkasampe. Uswele Yehova ne kulonda madingi mayampe amupele shandi Davida. Yehova waloelelwa Solomone, o mwanda bufuku bumo wamunena mu kilotwa’mba: ‘Solomone, i kika kyosaka nkupe?’

Penepa Solomone walondolola’mba: ‘A Yehova Leza wami, ndi mwanuke bininge kadi nkiyukilepo ne mwa kuludikila mwine. Nanshi umpe tunangu twa kuludika nato bantu bobe mobifwaninwe.’

Yehova wasangela kulomba kwalomba Solomone. Penepo wanena’mba: ‘Mwanda ubalombe tunangu, pa kyaba kya kulomba būmi bwa mafuku malampe nansha bupeta, nkakupa tunangu tuvule kupita bantu bonso. Ino nkakupa kadi bupeta ne ntumbo byokulombele.’

Kitatyi kityetye kupita’po, bana-bakaji babidi abaiya kusamba mwanda mukomo kudi Solomone. Umo waanza’mba: ‘Nadi na yeu mwana-mukaji mu njibo imo, kupwa nabutula mwana mwana-mulume, mafuku matyetye pa kupita’po, nandi wabutula wandi. Ebiya mu bufuku, wandi mwana wafu. Penepo ami ndele, wayata wandi mwana mufwe wamutūla kondele, kupwa wasela wami. Ami pa kubūka, najingulula mwana mufwe’wa, namone’mba ke wamipo.’

Kupwa mukwabo kanena’mba: ‘Ke amopo! Mwana mūmi i wami, mufwe i wandi!’ Mwana-mukaji umbajinji walondolola’mba: ‘Ke amopo! Mufwe i obe, mūmi i wami!’ Bana-bakaji’ba abepatanya. Le pano Solomone usa kutyiba uno mwanda namani?

Ponka’pa walombe kipete, abo pa kwiya nakyo, kanena’mba: ‘Lala mwana mūmi mu mpasu ibidi, upe umo ne umo lupasu lwandi.’

Mwinē mwana waela lubila’mba: ‘Leka! Nakwisāshila, kokepaya mwana. Nanshi mupe’ye!’ Ino mwana-mukaji mukwabo wanena’mba: ‘Kokipa’ye muntu nansha umo, mulale mpasu ibidi.’

Ku mfulo Solomone wanena’mba: ‘Kokamwipaya! Pa’ye mwana-mukaji umbajinji. Aye ye inandi.’ Solomone wayuka inamwana mwanda ye usenswe mwana bininge kadi usaka bape’ye mwana-mukaji ungi pa kyaba kya kumwipaya. Bantu pa kwivwana mwatyibila Solomone uno mwanda, abasangala’mba tubamone mulopwe wa tunangu.

Leza waesela bantu mu bubikadi bwa Solomone na kumeneja panshi bidibwa bivule, ñano, mebele a buluba, buñanza, bikuyu ne bidibwa bikwabo. Bantu abavwala bisandi bilumbuluke ne kulāla mu mobo mayampe. Bantu abaikala na bintu bivule biyampe.