Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 75

Bankasampe Bana-Balume Baná mu Babiloni

Bankasampe Bana-Balume Baná mu Babiloni

MULOPWE Nebukaneza waselela Bene Isalela bonso bafundijibwe mu Babiloni. Kupwa watonge’mo bankasampe bana-balume bapopoke ne ba ñeni bininge. Bomwene’ba i bankasampe baná ba umbukata mwabo. Umo i Danyele, Bene Babiloni betanga basatu bakwabo’ba bu Shadelake, Meshake ne Abedenengo.

Nebukaneza watūla’ko mpangiko ya kufundija bankasampe’ba mingilo ya mu njibo yandi. Pa kupwa kwibafundija mu bula bwa myaka isatu, usa kutonga boba badi na ñeni mingi banze kutyiba mambo. Mulopwe usakanga bankasampe bekale bakomo ne bampikwa misongo kitatyi kyobafundijibwa. Penepo wasoñanya bengidi bandi bebape’nka vinyu ne bidibwa bya musonso byadya aye ne kisaka kyandi.

Tala nkasampe Danyele. Uyukile byalombola Ashepenaza, mukulumpe wa bengidi ba Nebukaneza? Danyele umusapwilanga’mba kasakilepo kudya bidibwa bya musonso bya ku mesa a mulopwe. Ino Ashepenaza watyina. Kanena’mba: ‘Mulopwe i mutonge bidibwa ne bitomibwa byenu. Shi muleke kufufuma mwikadile bankasampe bakwabo, nankyo ukangipaya.’

Ino Danyele waenda kudi muledi utūdilwe na Ashepenaza bu wakutala Danyele ne balunda nandi basatu. Kamunena’mba: ‘Nakwisāshila, witutompe bidi mafuku 10. Witupa mani tudya ne mema a kutoma. Penepo mutale pa bansongwalume badya bidibwa bya mulopwe ne batwe bafufuma i bepi.’

Muledi waitabija. Ino mafuku 10 pa kupwa, Danyele ne balunda nandi basatu abafufuma kupita bankasampe bakwabo. Penepo muledi waendelela na kwibapa mani pa kyaba kya bidibwa byadi bileta mulopwe.

Myaka isatu pa kupwa, abakatūla bano bankasampe kudi Nebukaneza. Kupwa kwisamba nabo, mulopwe watonge Danyele ne balunda nandi basatu bu bantu ba ñeni. Penepo webalama mwanda wa bamukwashe’ko mu njibo. Kyonso kipangula mulopwe kudi Danyele, Shadelake, Meshake ne Abedenengo, nansha shi webape myanda mikomo, abo badi beiyuka misunsa 10 kupita bitobo byonso ne bantu bonso ba ñeni.

Danyele 1:1-21.