LELO umwene byalongeka’bi? Mwanuke’u wanyongolola kano kana ka mukōko ku meno a mpumpi. Mpumpi wadi wiya kusela kana ka mukōko mwanda wa kwikadya. Ino uno mwanuke wanyemena’ko lubilo, ne kunyongolola kana ka mukōko mu kyakanwa kya mpumpi. Kadi mpumpi pa kumukidila bwimwa, uno mwanuke wamukwata ne kumwipaididila! Kitatyi kikwabo, wanyongolwele mukōko mu kyakanwa kya ntambo. Mwene uno mwanuke udi na bukomo? Lelo umuyukile i ani?

I nkasampe Davida. Wikalanga mu kibundi kya Betelema. Nkambo wandi i Obeda, mwanā Luta ne Boaza. Lelo ukibavulukile? Shandya Davida i Yese. Davida ukumbanga mikōko ya shandi. Davida wabutwilwe myaka 10 kupwa kwa Solo kutongwa bu mulopwe na Yehova.

Kitatyi kimo Yehova wanena Samwele amba: ‘Yata māni meshile na makwabo wende ku njibo ya Yese mu Betelema. Natonge umo mu bandi bana bu mulopwe.’ Samwele pa kumona Ediabu mwanabute wa Yese, kanena aye mwine mu mutyima’mba: ‘Na bubine, uno’u ye utongelwe na Yehova.’ Ino Yehova wamunena’mba: ‘Kokatala bula ne buya bwandi. Ami nkimutongelepo bu mulopwe.’

Penepo Yese waite wandi mwana Abinadaba, wamufwenya kudi Samwele. Ino Samwele wanena’mba: ‘Ne uno mwine katongelwepo na Yehova.’ Kupwa Yese wapaika wandi mwana Shama. Samwele amba: ‘Uno nandi katongelwepo na Yehova.’ Yese wavuya bana basamba-babidi bana-balume, ino Yehova kutonga’mo nansha umo mpika. Samwele waipangula’mba: ‘Enka bano bo bana-balume bonso?’

Yese wanena’mba: ‘Kubashala’nka mukala kete. Ino ukumbanga mikōko panja.’ Abo pa kutweja Davida, Samwele wamumone bu mwanuke mupopoke. Penepo Yehova wanena’mba: ‘I aye yao. Mupungulwile māni.’ Samwele walongela monka. Kitatyi kya kwikala Davida bu mulopwe wa Isalela kisa kwiya kumeso.

1 Samwele 17:34, 35; 16:1-13.