DAVIDA pa kupwa kubikala mu Yelusalema, Yehova wape basola bandi bushindañani buvule ku balwana nabo. Yehova wālaile kupa Bene Isalela ntanda ya Kenani. Pano, na bukwashi bwa Yehova, ntanda yonso yālailwe kwibapebwa kebadi nayo.

Davida i muludiki muyampe. Kadi uswele Yehova. Kintu kyandi kibajinji kulonga pa kupwa kukwata Yelusalema, i kuselela dikumbo dya Yehova dya kipwano ku Yelusalema. Kadi usakanga kūbaka tempelo ya kwiditūla’mo.

Ino Davida pa kwenda ukula, walonga kilubo kibi. Davida uyukile’mba kusela kintu kya bene i kibi. Ino kyolwa kimo, aye papo pa musaka wa njibo yandi, amba ele meso, wamone mwana-mukaji mupopoke. Dijina dyandi i Bafesheba, wandi mulume i Udia, umo wa mu basola bandi.

Davida waabila Bafesheba bininge, wamuleteja ku njibo yandi. Wandi mulume papo udi mu bulwi. Ebiya Davida walāla nandi, kupwa wamone mwenda mafuku’mba waimita. Davida wakomenwa kya kulonga, ebiya watumina Yoabe mukulumpe wa basola musapu wa kutūla Udia kumeso kwa bulwi mwanda wa epaibwe. Udia pa kwipaibwa, Davida wasonge Bafesheba.

Penepo Yehova wakalabela Davida bininge. Watume mwingidi wandi Natana akamuyukije bubi bwandi. Tala Natana wisamba na Davida pano. Davida wesāsa bubi bwandi bininge, kupwa Yehova waleka kumwipaya. Ino Yehova wanena’mba: ‘Pa mwanda wa bino bintu bibi byowalonga, mu njibo yobe mukekala kavutakanya kakatampe.’ Bine Davida waikala mu kavutakanya kakomo!

Dibajinji, mwanā Bafesheba mwana-mulume wafu. Kupwa Amenone mwana umbedi wa Davida waongwela mwanabo Tamala pa bunka ne kulāla nandi ku bukomo. Pa kino, Abisalome mwanā Davida wakalabala ne kwipaya Amenone. Kupwa Abisalome waitabilwa na bantu bavule ne kwibikika bu mulopwe. Ku mfulo Davida watyumuna Abisalome, kadi Abisalome waipaibwa. Bine, Davida watanwa na kavutakanya kavule.

Mu kino kitatyi’ki, Bafesheba wabutula mwana mwana-mulume utelwa bu Solomone. Davida pa kununupa ne kubela, wandi mwana Adoniya wakimbe kwibikika bu mulopwe. Papo Davida wanena kitobo Zadoki apungulwile māni pa mutwe wa Solomone mwanda wa kulombola’mba Solomone ye usa kwikala mulopwe. Papita’tu mafuku matyetye, Davida wafu na myaka 70. Wabikele umbula mwa myaka 40, ino pano mulopwe wa Isalela ke Solomone.

2 Samwele 11:1-27; 12:1-18; 1 Balopwe 1:1-48.