Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 54

Mwana-Mulume wa Bukomo Kupita Bonso

Mwana-Mulume wa Bukomo Kupita Bonso

LELO uyukile dijina dya mwana-mulume wa bukomo kupita bonso? I mutyibi Samishoni. Yehova ye upele Samishoni bukomo bwandi. Kumeso kwa Samishoni kubutulwa, Yehova wasapwidile inandi amba: ‘Ukabutula mwana. Aye ukakūla Isalela ku Bene Fidishitia.’

Bene Fidishitia i bantu babi bashikete mu ntanda ya Kenani. Badi na basola bavule, kadi bamweshanga Bene Isalela malwa. Difuku dimo, Samishoni pa kwenda kudi Bene Fidishitia, ntambo mukatampe waiya kwadi koku ubuluma. Ino Samishoni waipaya ntambo na makasa onkaonka. Kadi waipaya ne tutwa twa Bene Fidishitia babi.

Kupwa, Samishoni wasanswa mwana-mukaji witwa bu Dedila. Bamfumu ba Bene Fidishitia abatyipila Dedila mutyipo amba umo ne umo umbukata mwabo ukamupa bibese bya ndalama 1100, shi webalombola kine kipanga Samishoni bukomo. Dedila usaka luno lupeto lonso. Bine ke mulundapo wa bine na Samishoni nansha na bantu ba Leza. Penepo, kaipangula ne kuningila Samishoni amulombole pemanine bukomo bwandi.

Ku mfulo, Dedila waongola Samishoni, nandi wasokola pafyeme bukomo bwandi. Amba: ‘Nywene yami keyatendelwe nansha dimo tamba kubutulwa kwami, Leza i muntonge kwikala mwingidi wandi wa pa bula, witwa bu Mwine Nazila. Nkikekalapo na bukomo shi nywene yami ibatendwa.’

Bine, Dedila pa kuyuka uno mwanda, waladika Samishoni pa maulu andi. Kupwa waite muntu wa kumutenda nywene. Samishoni pa kubuka, bukomo bwandi bonso bupwe. Kupwa Bene Fidishitia abatwela ne kumukwata. Abamubongotola meso, ne kumutūla bu umpika wabo.

Difuku dimo, Bene Fidishitia badi na masobo makatampe a kutōta leza wabo Dakona, penepo abalupula Samishoni mu kifungo mwanda wa kwibasepeja. Papo nywene ya Samishoni ke mimene monka. Samishoni wanena mwanuke wadi umukwete ku kuboko’mba: ‘Ntengeje ku bipanda bimanine’ko njibo.’ Kupwa Samishoni walombe Yehova amupe bukomo, ebiya wakwata bipanda. Waela lubila’mba: ‘Mfwe na Bene Fidishitia.’ Ku masobo kwadi Bene Fidishitia 3000, Samishoni pa kweyalela ku bipanda, njibo yabunduka ne kwipaya bano bantu bonso babi.