Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 41

Nyoka wa Mukuba

Nyoka wa Mukuba

LELO uno i nyoka wa bine wipombele ku kikomo kya mutyi? Mhm, ke wa binepo. Uno nyoka i mupungwe na mukuba. Yehova wasapwidile Mosesa akobeke uno nyoka ku kikomo kya mutyi mwanda wa bantu batale’ko ne kwikala bōmi. Inoko bano banyoka bakwabo badi panshi i ba bine. Basumanga bantu ne kwibapa misongo. Le uyukile kyobebasumina?

Mwanda Bene Isalela abesambila bibi padi Yehova ne Mosesa. Abeuninga’mba: ‘Mwanda waka mwetulupwile mu Edipito ne kwiya kwitukubija muntanda mutuputupu? Bidibwa ne mema mutupu. Kadi mana abetutonda, ketukidi’opo.’

Inoko mana i kidibwa kiyampe. Yehova webapele’o mu kingelengele. Kadi webapele ne mema mu kingelengele. Ino bantu kutupu kumufwija’ko mu bino byonso byawibalongela. O mwanda Yehova watume banyoka ba bulembe mwanda wa kupa Bene Isalela mfuto. Banyoka abebasume ne bantu bavule umbukata mwabo abafu.

Ku mfulo bantu abaiya kudi Mosesa kebanena’mba: ‘Tubapi mambo, mwanda twesambile bibi padi Yehova ne padi abe mwine. Shi ke pano, lombela kudi Yehova etufundule banyoka bano.’

Penepo Mosesa walombela pa mwanda wa bantu. Ebiya Yehova wanena Mosesa apunge uno nyoka wa mukuba. Wanena kumukobeka ku kikomo kya mutyi, mwanda wa yense usuminwe atale’ko. Mosesa walonga mwamunenena Leza. Bantu basuminwe pa kutala ku nyoka wa mukuba penepo abakoma.

Kudi bufundiji botukokeja kwifunda pa kino. Batwe bonso tudi pamo bwa Bene Isalela bādi basumwa na bano banyoka. Batwe bonso tudi mu ngikadilo ya lufu. Tala’tu koku na koku, ukamona’mba bantu banunupanga, babela, ne kufwa bafwa. I mwanda wa ba Adama ne Eva, bantu babajinji, bāvundamine Yehova, kadi batwe bonso twi babo bana. Inoko Yehova i mutūle’ko muswelo wa kumona būmi bwa nyeke.

Yehova wātumine wandi mwana Yesu Kidishitu pano pa ntanda. Yesu wākobekelwe ku mutyi, mwanda bantu bavule bālangile’mba wādi muntu mubi. Ino Yehova wāpēne Yesu mwanda wa kwitukūla. Shi tutale kwadi, ne shi tumulonde, nankyo tukatambula būmi bwa nyeke. Inoko tukefunda bivule pa uno mwanda kumeso.