Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 51

Luta ne Naomi

Luta ne Naomi

MU BIBLE mudi mukanda utelwa bu Luta. I mānga ya kisaka kimo kyādi’ko mu kitatyi kyādi Isalela na batyibi. Luta i nsongwakaji wa mu ntanda ya Moabu; ke wa mu Bene Isalelapo muzo wa Leza. Inoko Luta pa kuyuka Yehova Leza wa bine, waikala kumusanswa bininge. Naomi i mununu mwana-mukaji wakwasha Luta ayuke Yehova.

Naomi i Mwine Isalela. Aye ne wandi mulume ne bandi bana bana-balume babidi bāvilukīle ku ntanda ya Moabu pātyepele bidibwa mu Isalela. Kupwa difuku dimo mulumya Naomi wāfwa. Mwenda mafuku bana ba Naomi bāsonga bana-bakaji babidi Bene Moabu batelwa bu Luta ne Olepa. Kubwipi kwa myaka 10 kupita’po, bana ba Naomi babidi bāfwa. Naomi ne bana-bakaji babidi’ba bākwatwa bulanda kashā! Pano Naomi ukalonga kika?

Difuku dimo Naomi watyibe mbila ya kujokela kwabo. Ebiya Luta ne Olepa basaka kwikala nandi, penepo kebamulonda. Ino bendele’tu bityetye, Naomi waalamukila kudi bansongwakaji, kanena’mba: ‘Jokelai kwenu mukashikate na bainenu.’

Naomi wafifye bansongwakaji ne kwibashadika. Penepo abaanza kudila, mwanda badi basenswe Naomi bininge. Abanena’mba: ‘Mhm! Batwe twenda nobe ku bantu bobe.’ Ino Naomi webalondolola’mba: ‘Jokai bana bami. Kikekala kiyampe kushikata ku mobo enu.’ Penepo Olepa waanza kujokela kwabo. Ino Luta wapele.

Naomi waalamukila kwadi kamunena’mba: ‘Olepa wajoka. Ne abe nobe joka nandi pamo.’ Ino Luta walondolola’mba: ‘Kokanena’mba nkushiye! Ndeke ñende nobe. Koenda nami ye konkenda, kokekala ye konkekala. Bantu bobe bakekala bami bantu, ne Leza obe ukekala Leza wami. Kokafwila ye konkafwila kadi ye konkajikwa.’ Luta pa kunena uno muswelo, Naomi kasomwenwepo kumujokeja dikwabo.

Ku mfulo bano bana-bakaji babidi abafika mu Isalela. Abashikata monka. Bukidi bonka, Luta waalula kwingila mu madimi, mwanda kyadi kitatyi kya kwangula mebele a buluba. Kupwa mwana-mulume utelwa bu Boaza wamutūla mu budimi bwandi angule mebele a buluba. Lelo uyukile inandya Boaza? I Lehaba Mwine Yediko.

Difuku dimo Boaza wanena Luta’mba: ‘Naivwene myanda yobe yonso, ne mowalongele Naomi biyampe. Nemuyuke mowashidile shobe ne inobe, ne ntanda yobe ne mowaidile kushikata umbukata mwa bantu bokwayukile kashā. Yehova ekale nobe!’

Ebiya Luta walondolola’mba: ‘Mfumwami, wi muyampe kondi. Ubaunsenge pa mutyima na kwisamba biyabiya kondi.’ Boaza wasanswa Luta bininge, kadi kepejijepo, abesonge. Naomi wasangala! Kadi Naomi wasangala bininge pa kwikala Luta ne Boaza ababutula mwana mwana-mulume utelwa bu Obeda. Mwenda mafuku, Obeda waikala nkambo wa Davida, otukesambila’po bivule kumeso’ku.

Mukanda wa Luta.