LELO ubamone bilongibwa pano’bi? Bano bonso i basola Bene Isalela. Bana-balume babandamine’ba batomanga mema. Wimene kubwipi nabo’u i Mutyibi Ngideoni. Utalanga mobatomena mema.

Jingulula senene kwishila kwa mutomeno wa bano bana-balume. Bamo i babandamine mapala abo pa mema. Ino umo ye wimene koku utapula mema na kikasala, mwanda wa kutala bipita koku ne koku. Kino kidi na mvubu, mwanda Yehova wanena Ngideoni atonge enka boba batoma koku bakebakeba. Ino bashele, Leza wanena kwibajokeja. Tutalei mwanda mwine.

Bene Isalela abatanwa na makambakano monka. Mwanda kebakōkelepo Yehova. Bene Midyana abebakomena ne kwibamwesha malwa. Penepo, Bene Isalela abadidila Yehova ebakwashe, Yehova waivwana kudila kwabo.

Yehova walombola Ngideoni ateakanye basola, penepo Ngideoni wabungakanya basola 32 000. Ino kudi bantu 135 000 ba kulwa na Isalela. Kadi papo Yehova wasapwila Ngideoni amba: ‘Bantu bodi nabo abavula.’ Mwanda waka Yehova wanena uno muswelo?

Mwanda shi Isalela anekenye bulwi, basa kwianya’mba i abo bene banekenya. Basa kulanga’mba ke bukwashipo bwa Yehova bobatyumwina. O mwanda Yehova wanena Ngideoni’mba: ‘Nena bonso ba moyomoyo bajokele kunja.’ Ngideoni pa kulonga uno muswelo, basola 22 000 abajoka. Kubashala enka bantu 10 000 ba kulwa na basola 135 000 bonso’ba.

Ino, ivwana! Yehova wanena’mba: ‘Bantu bodi nabo bakidi monka bangi.’ Penepo kasapwila Ngideoni akatomeje bantu mema ku ou munonga’u ne kujokeja bantu bonso batoma koku babandamine mapala abo pa mema. Yehova watyipe’mba: ‘Nkemupa bushindañani na bantu 300 kete batoma koku bakebakeba.’

Papo kitatyi kya kulwa kibabwana. Ngideoni kaabanya bandi bana-balume 300 mu bisumpi bisatu. Wape muntu ne muntu kimpungidi, ne mutyibi ne kimuni munda. Ke kubwipi na pa bukata bwa bufuku, abajokoloka kitūlo kya basola balwana nabo. Kupwa abavumija bimpungidi ne kuboyola mityibi, ne kwela lwanji pa kimo’mba: ‘Kipete kya Yehova ne kya Ngideoni!’ Basola balwana pa kubuka, abavutakanibwa ñeni ne kuzakala. Abo bonso abashilula kunyema, Bene Isalela abatyumuna divita.

Batyibi shapita 6 ku 8.