Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 47

Ngivi mu Isalela

Ngivi mu Isalela

TALA bitumbila uno mwana-mulume mu kipema kyandi! I mutwelo mulumbuluke kashā, ne nyundo wa nsahabu ne bibese bya ndalama. Webiselele mu kibundi kya Yediko. Ino bintu bya mu Yediko byadi bifwaninwe kulongwa nabyo bika? Lelo ukivulukile?

Byadi binenwe konakanibwa, inoko nsahabu ne ndalama byadi bifwaninwe kutūlwa mu bya bulēme bya tabenakulo ya Yehova. Nanshi bano bantu kebakōkelepo Leza. I bebe bintu bya Leza. Dijina dya mwana-mulume’u i Akana, ne bano badi nabo i ba kisaka kyandi. Tutalei pano mobyapityile.

Akana pa kupwa kwiba bino bintu, Yoshua watume bana-balume kukalwa na kibundi kya Ai. Ino abanekenibwa ku divita. Bamo abatapwe, bakwabo abanyema. Yoshua wakwatwa bulanda. Penepo wakuvumana mpala panshi kalombela kudi Yehova’mba: ‘Le kyowalekela kino kintu kitufikile i kika?’

Yehova walondolola’mba: ‘Languka! Isalela i mujilule. I basele kimo kya mu bintu bya konakanibwa ne bya kutūla mu tabenakulo ya Yehova. Abaibe mutwelo mulumbuluke ne kufya mwanda. Nkikemweselapo dyese poso mwibyonakanye, ne konakanya yewa uselele bino bintu.’ Yehova wanena kulaija Yoshua uno muntu mubi.

Penepo Yoshua wabunge bantu bonso pamo, ne Yehova wasokola Akana muntu mubi. Akana wanena’mba: ‘Napi mambo. Namwene mutwelo mulumbuluke, ne nyundo wa nsahabu ne bibese bya ndalama. Nebineñenenwe penepo nebisela. Musa kwibitana bitumbile umbukata mwa kipema kyami.’

Abo pa kutana bino bintu ne kupaila’byo Yoshua, Yoshua waipangula Akana’mba: ‘Le kyowetumweshesha malwa kine i kika? Pano Yehova nandi ukakumwesha malwa!’ Penepo bantu bonso abaase Akana mabwe ne kisaka kyandi abafu. Mwene kino kilombola’mba ketufwaninwepo nansha dimo kusela bintu bya bene?

Kupwa Isalela wakalu monka na Ai. Penepo Yehova wakwasha bantu bandi, abatambula bushindañani.