Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 11

Nkongolo Umbajinji

Nkongolo Umbajinji

LE UYUKILE kintu kibajinji kyālongele Noa kitatyi kyaālupukile na kyandi kisaka mu safini? Wāpēne mulambu nansha kyabuntu kudi Leza. Enka na mowikimwena pa kifwatulo kidi kunshi’ki. Noa wāpēne kino kyabuntu kya banyema mwanda wa kufwija’ko Leza pa kukūla kisaka kyandi ku dilobe dikatampe.

Lelo ulanga’mba Yehova wāitabije kino kyabuntu? Eyo, wēkitabije. O mwanda Leza wālaile Noa’mba kakikonakanyapo monka ntanda na dilobe.

Na pano kala, nshi yāuma, ebiya Noa ne kisaka kyandi bāshilula būmi bupya panja pa safini. Leza wēbesela ne kwibasapwila’mba: ‘Mufwaninwe kubutula bana bavule. Bungi bwenu bufwaninwe kuvula enka ne bikekala bantu pano pa ntanda ponso.’

Inoko mwenda mafuku, bantu bādi padi ba kwivwana moyo amba kukekala dilobe dikwabo pamo bwa dino kitatyi kyobādi ba kwivwana mānga ya dino dilobe dikatampe. O mwanda, Leza wātūdile’ko kintu kampanda kya kuvuluja bantu mulao waālaile’mba kakikonakanyapo monka ntanda ku dilobe. Lelo uyukile kintu kyātūdile bu kya kwibavuluja? I nkongolo.

Nkongolo umwekanga pavule mu diulu shi mvula wapu kunoka, mwinya nao wātamba. Nkongolo ukokeja kwikala na misombelo mivule kadi isangaja kumona. Lelo kodi kala mumone nkongolo? Umwene uno udi pa kifwatulo?

Leza wānene’mba: ‘Nalaya amba nkikonakanyapo nansha dimo monka bantu ne banyema bonso na dilobe. Natūla nkongolo wami mu makumbi. Kadi kitatyi kikamweka nkongolo, ami nkamumonanga ne kuvuluka uno wami mulao.’

Penepo shi ubamone nkongolo, lelo ufwaninwe kukuvuluja kika? Eyo, ufwaninwe kukuvuluja mulao wālaile Leza amba nkikonakanyapo dikwabo nansha dimo ntanda na dilobe dikatampe.