TALA uno mwana wa lukeke udila koku ukwete uno nsongwakaji ku munwe. I Mosesa. Le uyukile uno nsongwakaji mupopoke i ani? I mwanā Felo, mulopwe wa Edipito.

Inandya Mosesa wāfile wandi mwana kufika’nka ne byaābwenye myeji isatu, mwanda kāsakilepo epaibwe na Bene Edipito. Ino wādi uyukile’mba Mosesa ukokeja kusokolwa, penepo wālonga namino mwanda wa kumupandija.

Wāyete kitenge wēkishinga bunange kutyina’mba mema akatwela’mo. Kupwa wābika’mo Mosesa, wākatūla kine kitenge’kya mu mabungu ku lubungo lwa Munonga wa Nile. Kaka wa Mosesa, Midiamu, wānenwe kwimana kubwipi amone kikamufikila.

Ponka’po, mwanā Felo mwana-mukaji wāiya koya ku Munonga wa Nile. Amba atale, wāmona kisaku mu mabungu. Wāita mwingidi wandi umo mwana-mukaji kāmunena’mba: ‘Ndetele kisaku’kya.’ Mwanā mulopwe pa kupūtula’mo, wāmona mwana muyampe! I Mosesa wādi udila, penepa mwanā mulopwe wāmukwatyilwa lusa. Kāsakilepo bamwipaye.

Kupwa Midiamu wāiya. Ukokeja kumumona pa kifwatulo. Midiamu wāipangula mwanā Felo amba: ‘Lelo ñende nkete mwana-mukaji Mwine Isalela wa kukwamushisha uno mwana?’

Nandi wāmulondolola’mba: ‘Enda.’

Penepa Midiamu wānyema lubilo kuketa inandi. Inandya Mosesa pa kufika, mwanā mulopwe wāmunena’mba: ‘Sela mwana ukañamushishe’ye, nami nkakufuta.’

Penepa inandya Mosesa wākalela wandi mwana wa aye mwine. Kupwa Mosesa wātama, inandi wākamutūla kwa mwanā Felo wāmuyete bu wandi mwana. Uno ye muswelo wātamīne Mosesa mu njibo ya Felo.

Divilu 2:1-10.