Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 26

Yoba Udi na Kikōkeji Kudi Leza

Yoba Udi na Kikōkeji Kudi Leza

LELO ubakwatyilwa uno ubēla lusa? Dijina dyandi i Yoba, ne uno lolo’u i wandi mukaji. Uyukile byaanena Yoba? ‘Tuka Leza, ufwe.’ Leka tumone kyaanenena namino, ne kisusukila Yoba i kika.

Yoba wādi muntu ukōkele Yehova. Wādi wikele mu ntanda ya Uza, kubwipi na Kenani. Yehova wādi usenswe Yoba bininge, ino kudi wādi umushikilwe. Lelo umuyukile?

I Satana Dyabola. Vuluka, Satana i mwikeulu mubi ushikilwe Yehova. Wāongwele ba Adama ne Eva bātombokela Yehova, kadi wādi ufwatakanya’mba ukabombolanga bantu bonso nabo baleke kukōkela Yehova. Ino lelo wābwenye? Mhm. Langa bidi bana-balume ne bana-bakaji bavule ba kikōkeji botwefunda mānga yabo. Ukokeja kutela’mo banga’le?

Kupwa kwa lufu lwa Yakoba ne Yosefa mu Edipito, Yoba ye wāikele muntu wa kikōkeji kudi Yehova kupita bonso pano pa ntanda. Yehova wāsakile kuyukija Satana’mba kakokejapo kongola bantu bonso bekale babi, wānena’mba: ‘Tala Yoba. Ubamone muswelo waunkōkele.’

Satana wāpatanya’mba: ‘Ukukōkele mwanda wi mumwesele kadi aye udi na bintu bingi. Ino shi umuyate’byo ukakutuka.’

Yehova wānena’mba: ‘Enda. Kamuyate’byo. Longa Yoba byonso byosaka. Tumone shi ukantuka. Inoko kokamwipaya.’

Dibajinji, Satana wātonona bantu bebe Yoba bangamedia ne bañombe, ne mikōko yandi yāipaibwa. Kupwa wāmwipaila ne bana 10 na kivula kikatampe. Kadi Satana wāmubeleka misongo mikomokomo. Yoba wāsusuka bininge. O mwanda mukaji wāmunene’mba: ‘Tuka Leza, ufwe.’ Ino Yoba kātukilepo Leza. Balunda nandi ba bubela basatu bāiya ke bāmunena’mba udi na būmi butyani. Ino Yoba wālamine kikōkeji kyandi.

Yehova wāsangele mpata, ku mfulo wāesela Yoba, enka na momwena pa kifwatulo pano. Wāpwija misongo yandi. Yoba wābutula bana bakwabo 10 bapopoke, kadi bañombe, bangamedia ne mikōko wāikala nabyo misunsa ibidi kupita dibajinji.

Lelo nobe ukakōkela Yehova nyeke pamo bwa Yoba? Shi i amo, nankyo nobe Leza ukakwesela. Ukekala nyeke pano pa ntanda kitatyi kyopakekala palumbuluke pamo bwa budimi bwa Edena.