Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Iulai Lwitabijo Lwabo

Mukanda wa Kitango Kyendeji

Mukanda wa Kitango Kyendeji

Kudi Batutu ne Bakaka Baswe:

Mu nimelo mibajinji ya Kiteba kya Mulami kya bantu bonso kya difuku 1 Kweji 1, 2008, mwashilwile kulupulwa bishinte binena amba “Iulai Lwitabijo Lwabo.” Tamba uno Kweji, bino bishinte bipya byāshilwile kulupulwa kupwa kwa myeji isatu, mwanda wa kwitusangaja!

Le bantu balongele namani pa bino bishinte? Mutangi umo pa kupwa kutanga kishinte kisambila padi Mata, wasonekele amba: “Nasepele kitatyi kyonatangile’kyo mwanda nami ngidi enka bwa aye—nsakanga kwikala mufikilwa muyampe ne kuvudilwa bya kulonga kufika’nka ne byongilwa kukōkolokwa ne kuloelelwa kisense pamo na balunda.” Nsongwakaji umo wafudile ku kunena bino binenwa bisangaja pa kupwa kutanga nsekununi ya Eseta amba: “Ndyukile amba twikalanga tuta mutyima bipitepite ku kwikala na bisandi biyampe ne ku muvwadilo wa panopano. Tufwaninwe kwidyangula biyampe; inoko ketufwaninwe kupityija’byo kipimo.” Ubweja’ko amba: “Yehova utele mutyima ku muntu wetu wa munda.” Kadi kishinte kiyampe kisambila padi mutumibwa Petelo kyafikije kaka umo mwine Kidishitu ku kunena amba: “Kitatyi kyonatangile ino nsekununi namwene bu yadi minembelwe ami. Nadi pamo bwa amiwa wadi’ko! Naingidije malango ami mwanda wa kwivwanija bintu bine byadi binena bisonekwa.”

Bano batangi—ne bantu bakwabo bavule balembele mwanda wa kufwija’ko pa mwanda wa bino bishinte—babingija byobya byāsonekele mutumibwa Polo myaka mivule kunyuma amba: “Ke-bintu byonsololo byasonekelwe kala byasonekelwe mwanda wa kwitufundija.” (Loma 15:4) Bine, Yehova wātwejeje ino nsekununi mu Bible mwanda wa kwitufundija bufundiji bwa kamweno. Batwe bonso, nansha shi wayukile bubinebine pano ke myaka mivule, tubwanya kuboila’ko ñeni.

Tubakukankamika utange dino dibuku’nka pokitambula’dyo. Mwidingidijei mu mpangiko Butōtyi bwa Kisaka—bana basa kwidiswa! Shi kibatūlwa mu mpangiko ya Kifundwa kya Bible kya Kipwilo, kokabulwa’ko nansha yenga umo! Witūdile’ko kitatyi kya kutanga’dyo bityebitye. Ingidija malango obe; ne kwitweja’mo. Tompa kwivwana na mwādi mwiivwanina bano bantu ba mu Bible, ne kumona byobādi bamona. Dingakanya mobālongele mu mwanda kampanda na mowadi wa kulongela.

Tudi na nsangaji ya kwimulupwila dino dibuku. I dyese dikatampe kodi ne ku kisaka kyobe. Twimusenswe bininge kadi twimusakilanga biyampe,

Kitango Kyendeji kya Batumoni ba Yehova