“Mwikale bakulonda mu boba bakupyana myanda-yamilao ponka pa kwitabija kwa kutūkija ne mutyima.”BAHEBELU 6:12.

1, 2. Mwanda waka kidi na mvubu kutamija lwitabijo dyalelo? Leta kimfwa.

LWITABIJO. I kishima kimo kiyampe, kilombola ngikadilo isangaja bininge. Inoko, shi tubatana kino kishima, i biyampe tulangulukile pa kishima kikwabo: “Bukidibukidi!” Mwanda, shi ketudipo na lwitabijo, tufwaninwe kwikala nalo bukidibukidi. Kadi shi tudi nalo, tufwaninwe kwilulama bukidibukidi ne kwilutamija. Mwanda waka?

2 Langa’po bidi shi utyibuluka mu ntanda mutuputupu. Usakilwa mema bya binebine. Shi ubeasokola, usa kwiakinga ku dyuba. Penepa kokimbe muswelo wa kuyuja mwanda wa akufikije koenda. Dyalelo, batwe bonso tushikete mu ntanda mutuputupu ku mushipiditu, mu ntanda musakene lwitabijo lwa binebine kadi lusaka kujimina bukidibukidi—pamo bwa ano mema—poso’tu twilulame ne kwiluyuja. Bilomba kuvuija bisakibwa byetu na kampeja-bukidi; monka moketukokejejapo kwikala bōmi pampikwa mema, mo monka moketukokejejapo kupanda ku mushipiditu pampikwa lwitabijo.Loma 1:17.

3. Le Yehova i mwitupe bika mwanda wa kwitukwasha tutamije lwitabijo, ne i bintu’ka bibidi byotufwaninwe kuvuluka?

3 Yehova uyukile amba bine tusakilwa lwitabijo bukidibukidi, ino kadi uyukile amba i bikomo kutamija lwitabijo ne kwilulama dyalelo. Ne kutatana kwine mpika, o mwanda i mwitupe bimfwa bya kulonda. Yehova wāpungulwidile mutumibwa Polo mushipiditu mwanda wa alembe amba: “Mwikale bakulonda mu boba bakupyana myanda-yamilao ponka pa kwitabija kwa kutūkija ne mutyima.” (Bah. 6:12) Kadi o mwanda bulongolodi bwa Yehova bwitukankamika tulonge bukomo bwa kulonda bimfwa bya bana-balume ne bana-bakaji ba lwitabijo, pamo bwa boba botwefunda mu kino kitabo. Ino, le i bika byotufwaninwe kulonga pano? Tuvulekei bintu bibidi: (1) Tufwaninwe kukomeja lwitabijo lwetu; (2) tufwaninwe kulama biyampe lukulupilo lwetu mu ñeni.

4. Le Satana wilombolanga namani amba i wa lwana na lwitabijo, ino mwanda waka ketufwaninwepo kutyumukwa mutyima?

4 Komeja nyeke lwitabijo lobe. Lwitabijo ludi na wa lwana mukatampe—ke Satana kadi. Mulopwe wa ino ntanda i mwalamune ino ngikadilo ya bintu mwanda ikale pamo bwa mu ntanda mutuputupu mobashikilwe lwitabijo. Aye i mukomo kwitupita. Le kino kiketutyumuna mutyima amba ketubwanyapo kuvudija lwitabijo lwetu ne kwilukomeja? Nansha dimo! Yehova i Mulunda mukatakata wa boba bakimba lwitabijo lwa binebine. Witukulupija amba shi tudi ku mutamba Wandi, tukokeja kumukomena Dyabola ne kumupityija lubilo! (Yak. 4:7) Tukamukomena shi twitūdila’ko kitatyi difuku ne difuku kya kukomeja lwitabijo lwetu ne kwilutamija. Namani?

5. Le bana-balume ne bana-bakaji ba lwitabijo batelelwe mu Bible bābutwilwe na lwitabijo? Shintulula.

 5 Monka motwekimwena, bana-balume ne bana-bakaji ba lwitabijo batelelwe mu Bible kebābutwilwepo na lwitabijo, aa. Ino bālombwele mu būmi bwabo amba lwitabijo i kipa kya mushipiditu sandu wa Yehova. (Ngat. 5:22, 23) Bālombele bukwashi, Yehova nandi wākomeja lwitabijo lwabo. Netu tulongei enka mobālongele, kwampikwa kwilwa amba Yehova upānanga mushipiditu wandi ku bitupu ku boba bamulombola’o ne kwiendeja mungya milombelo yabo. (Luka 11:13) Le kudi kikwabo kyotukokeja kulonga?

6. I bika byotufwaninwe kulonga pa kusaka tumwene ne pa mfulo mu bwifundi bwetu bwa mānga ya mu Bible?

6 Mu kino kitabo, tubesambila’mo’tu bimfwa bityetye bya bantu ba lwitabijo lwa kutendelwa. Inoko ke bonsopo, kukidi milwi ne milwi ya bakwabo! (Tanga Bahebelu 11:32.) Umo ne umo—mu muswelo wandi pa bula—witupa kyumwa kya kwifunda ne kulangulukila’po na mutyima umo. Shi tutanga’tu bya lubilolubilo mānga ya mu Bible ya bantu ba lwitabijo, ketukashimatyijapo lwitabijo lwetu. Pa kusaka tumwene ne pa mfulo mu butangi bwetu, tufwaninwe kupityija kitatyi na kukola mu myanda ya kūlu ne ya kunshi ne ngikadilo yādi’mo muntu wisambilwe mu Bible. Shi tuvuluke nyeke amba bano bana-balume ne bana-bakaji bampikwa kubwaninina bādi “umbya bu-muntu monka mo twikadile bātwe umbya bu-muntu,” kimfwa kyabo kiketutenga kutabukidila. (Yak. 5:17) Shi twitūle pa kyabo kyaba, tukafwatakanya mobēivwaninwe kitatyi kyobātenwe na makambakano ne myanda iifwene na yetu.

7-9. (a) Le bana-balume ne bana-bakaji bamo ba lwitabijo ba mu kitatyi kyāsonekelwe Bible bādi ba kwiivwana namani pa kutōta Yehova na motumutōtela dyalelo? (b) Mwanda waka tufwaninwe kukomeja lwitabijo lwetu na bilongwa?

7 Kadi tukomejanga lwitabijo lwetu na bilongwa byetu. Ne kadi, “kwitabija nako kwampikwa mīngilo i kufwe.” (Yak. 2:26) Langa’po’tu bidi bano bana-balume ne bana-bakaji botwefunda mobādi ba kusangela shi bāpelwe mwingilo wiifwene na uno witupele Yehova dyalelo!

8 Kimfwa, shi Abalahama wāsapwidilwe amba kafwaninwepo kutōtela Yehova pa madabahu a mabwe mashimike mu ntanda mutuputupu, ino ufwaninwe kumutōtela mu kitango kya batōtyi-nandi mu Mobo a Bulopwe mayampe ne ku bitango bikatampe, kwine kushintululwa mu muswelo wa kutendelwa milao yaāmwene’tu “bitupu kulampe kwine”? (Tanga Bahebelu 11:13.) Le byādi bya kwikala namani shi Ediya wāsapwidilwe amba mwingilo wandi kewādipo wa kwipaya bapolofeto babi ba Bala pawādi ulonga bukomo bwa kwingidila Yehova mu buludiki bwa mulopwe kapondo mubi, ino i kupempula bantu pampikwa makambakano mwanda wa kwibasapwila musapu usenga kadi uleta lukulupilo? Bine ne bine ponka, mwene bano bana-balume ne bana-bakaji ba lwitabijo batelelwe mu Bible bādi ba kusangela kutōta Yehova na motumutōtela dyalelo?

9 Nanshi tukomejei’nka kukomeja lwitabijo lwetu na bilongwa. Shi tulonge namino,  tukalonda biyampe bino bimfwa bya bana-balume ne bana-bakaji ba lwitabijo bidi mu Kinenwa kya Leza kya ku bukomo bwa mushipiditu. Monka mokinenenwe mu Ntwelelo, tukebamona pamo bwa balunda netu. Inoko, buno bulunda bubwanya kwikala bwa bine panopano ponka.

10. Le i nsangaji’ka yotukekala nayo mu Paladisa?

10 Lama biyampe lukulupilo lobe mu ñeni. Bana-balume ne bana-bakaji ba lwitabijo bādi bakomejibwe na lukulupilo lwabo lwēbapele Leza. Le abe nobe? Kimfwa, langa’po bidi nsangaji yokevwana pa kwitana na bengidi ba Leza ba lwitabijo bakajokela ku būmi pa “kusanguka kwa . . . boloke.” (Tanga Bilongwa 24:15.) Le i bipangujo’ka bimo byolanga kukebepangula?

11, 12. Mu ntanda mipya, le bipangujo’ka byobwanya kukepangula (a) Abele? (b) Noa? (c) Abalahama? (d) Luta? (e) Abikele? (f) Eseta?

11 Shi ubetana na Abele, le ukekala na mutyima wa kumwipangula mwādi mwikadile bandi bambutwile? Nansha padi ubwanya kukamwipangula’mba: “Le wēsambile na boba bakelubi bādi balama dishinda dyenda ku budimi bwa Edena? Le nabo bākulondolwele?” Le Noa nandi? Ubwanya kukamwipangula’mba: “Le nobe wādi utyina Banefilimi? Le i muswelo’ka owālamine bano banyema bonso mu bula bwa owa mwaka mu safini?” Shi ubetana na Abalahama, ubwanya kukamwipangula amba: “Le mwēmwene na Shema? Le i ani wākufundije myanda ya Yehova? Le byādi bikomo kuviluka mu Ulu?”

12 Muswelo umo onka, fwatakanya bipangujo byobwanya kwipangula bana-bakaji ba lwitabijo bakasangulwa. “A Luta, le i bika byākutonwene wikale mutōtyi wa Yehova?” “A Abikele, le wāivwene moyo pa kusapwila Nabalu mowākwashishe Davida?” “A Eseta, le i bika bikwabo byēmufikile abewa ne Modekai kutentekela pa byobya binenenwe mu Bible?”

13. (a) Le i bipangujo’ka bibwanya kukakwipangula boba bakasangulwa? (b) Le ubeivwana namani pa dino dyese dya kwitana na bana-balume ne bana-bakaji ba lwitabijo ba pa kala?

13 Na bubine, bano bana-balume ne bana-bakaji ba lwitabijo nabo padi bakekala na bipangujo mulwi bya kukwipangula. Bine, ikekala nsangaji pa kwibalombola myanda ya mu ano mafuku a mfulo a malwa ne muswelo Yehova waesela bantu bandi! Ne kutatana kwine mpika, bakasangela kwifunda muswelo wafikidije Yehova milao yandi yonso. Mu mafuku āya’ko, ketukekalapo monka na kaji ka kufwatakanya mwādi mwikadile bengidi ba kikōkeji batelelwe mu nsekununi ya mu Bible. Ino tukemona nabo mpala na mpala, mu Paladisa! Shi ke pano, wielele’ko umone bano bantu bu ba bine. Iulai nyeke lwitabijo lwabo. Tukulomba usangele kwingidila Yehova pamo nabo pamo bwa balunda nobe nyeke ne nyekeke!