Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Le I Bāni Balonga Kiswa-Mutyima kya Yehova Dyalelo?

 KIFUNDWA 13

Lelo Pania I Ani?

Lelo Pania I Ani?

Kanada

Ku njibo ne njibo

Kifundwa kya Bible

Kifundwa kya kasuku

Kishima “pania” kifunkila divule pa kalala-ntanda, muntu usebela bakwabo dishinda dya kulonda’mo. Yesu wādi pamo bwa pania, wātuminwe pano pa ntanda mwanda wa kwingila mwingilo uleta būmi ne kushitwila bantu dishinda dya lupandilo. (Mateo 20:28) Dyalelo, balondi bandi bamwiulanga na kupityija kitatyi kivule mu mwingilo wa ‘kulonga bana ba bwanga.’ (Mateo 28:19, 20) Bamo i babwanye kwingila mwingilo otwita bu wa bupania.

Pania i muntu usapula kitatyi kyonso. Batumoni bonso ba Yehova i basapudi ba myanda miyampe. Inoko, bamo i belongolole mu būmi mwa kwingidila bu bapania ba lonso, basapulanga kweji ne kweji mansá 70. Bavule, pa kwingila namino, bibalomba kutyepeja’ko kitatyi kimo ku twaji twabo. Bakwabo batoñwanga kwingila bu bapania ba pa bula mu bibundi musakilwa basapudi bavule ba Bulopwe, bano abo basapulanga mansá 130 ne kupita kweji ne kweji. Bapania basangelanga kwikala na būmi bupēla, mwanda bakulupile amba Yehova ukavuija bisakibwa byabo bya mu būmi. (Mateo 6:31-33; 1 Temote 6:6-8) Boba kebabwanyapo kwingila kitatyi kyonso, bakokeja kwingila bu bapania bakwashi, kitatyi kyobadi na muswelo wa kwielela’ko kusapula na kufikila pa mansá 30 nansha 50 ku kweji.

Pania wingilanga nabya mwanda uswele Leza ne bantu. Pamo bwa Yesu, netu tuyukile amba bantu bavule dyalelo basakilwa kuyuka Leza ne mpango yandi. (Mako 6:34) Inoko tudi na buyuki bukokeja kwibakwasha tamba’nka pano, bekale na lukulupilo lukomo lwa būmi bwa kumeso. Kuswa bantu ko kutonona pania apāne kitatyi ne bukomo bwandi mwanda wa kukwasha bakwabo mu myanda ya Leza. (Mateo 22:39; 1 Tesalonika 2:8) Kino kikomejanga lwitabijo lwandi, kimulengeja afwene mpata kudi Leza, ne kumona nsangaji mivule.Bilongwa 20:35.

  • Nenanga, le pania i ani?

  • I bika bitononanga bamo bengile kitatyi kyonso bu bapania?