Repiblike Dominikene

Jampani

Haiti

Shi byamalwa bibafika, Batumoni ba Yehova bateakanyanga bukidibukidi bukwashi bwa kukwasha banababo batenwe nabyo. Buno bukomo bonso bulombola’mba twiswele bya binebine. (Yoano 13:34, 35; 1 Yoano 3:17, 18) Tukwashanga muswelo’ka?

Tupānanga lupeto. Kitatyi kyāponene nzala mikatampe mu Yudea, bene Kidishitu babajinji ba mu Antyioka bātumīne banababo lupeto. (Bilongwa 11:27-30) Mo monka netu, shi tubaimvwana’mba banabetu mu kifuko kampanda abatanwa na makambakano, tutumanga byabuntu bya kukapa banabetu batenwe mu malwa kupityila ku kipwilo kyetu.2 Kodinda 8:13-15.

Twibakwashanga ku ngitu. Bakulumpe badi mu kipindi kiponenwe na byamalwa bakimbanga kuyuka padi muntu ne muntu ne kumona shi i mukomo. Komite wa bukwashi ubwanya kutangidila mwingilo wa kwabanya bidibwa, mema mayampe a kutoma, bivwalwa, mwa kulāla ne lawa. Batumoni badi na bwino kampanda bepānanga ku kusaka na kwifutyila lwendo abo bene mwanda wa kukōbakulula mobo a banabetu ne Mobo a Bulopwe apomokele. Bumo bwetu ne bwino botutambwile mu kwingidila pamo mu bulongolodi bwetu bitukwashanga tungwije bukidibukidi bukwashi pa kitatyi. Nansha byotuvungulwilanga kuboko “boba botubutulwa nabo mu lwitabijo,” inoko ponso pobibwanika, tukwashanga bonso pampikwa kubanga bipwilo byabo.Ngalatea 6:10.

Twibaseñanga na Bisonekwa ne kwibakankamika. Boba baponenwe na byamalwa basakilwanga busengi. Mu bitatyi bidi namino, tukomejibwanga na Yehova, “Leza wa kusenga konso.” (2 Kodinda 1:3, 4) Tusapwilanga boba basusuka milao ya mu Bible, twibakulupija amba panopano ponka Bulopwe bwa Leza busa kufudija binkumbulu byonso bileta njia ne masusu.Kusokwelwa 21:4.

  • Mwanda waka Batumoni bakwashanga bukidibukidi pafika byamalwa?

  • Lelo i busengi’ka botuseñanga boba batenwe na byamalwa?