Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIFUNDWA 3

Bubine bwa mu Bible Bwasokwelwe Dikwabo Muswelo’ka?

Bubine bwa mu Bible Bwasokwelwe Dikwabo Muswelo’ka?

Befundi ba Bible, myaka ya 1870

Nimelo mibajinji ya Kiteba kya Mulami, 1879

Kiteba kya Mulami kya mu ano mafuku

Bible wālaile amba kupwa kwa lufu lwa Kidishitu, mu bene Kidishitu babajinji mukalupuka bafundiji ba bubela bakanyengakanya bubine bwa mu Bible. (Bilongwa 20:29, 30) Mafuku pa kupita’po, byālongeka. Bāikele kutyanga bufundiji bwa Yesu na milangwe ya bipwilo bya Bajentaila, ponka’po bwine Kidishitu bwa bubela bwaāndabila. (2 Temote 4:3, 4) Penepo le tukayuka namani dyalelo amba twi bevwanije senene byobya bine bifundija Bible?

Kitatyi kyabwene kya Yehova kusokola bubine. Leza wālaile amba mu ‘kitatyi kya ku mfulo, buyuki bwa bine bukavula.’ (Danyele 12:4) Mu 1870, kakisumpi katyetye ka bantu bakimba bubine kājingulwile amba mfundijo mivule ya bipwilo keikwatañenepo na Bisonekwa. Ko kushilula bāshilula kukimba kwivwanija bufundiji bwinebwine bwa mu Bible, kadi Yehova wēbesele na kwibakwasha bekale na bujinguludi bwa ku mushipiditu.

Bantu ba mityima myoloke befundile Bible na katentekeji. Bano Befundi ba Bible bapyasakane, bene bētubadikidile, bālondele mwifundilo otwingidija ne dyalelo. Bādi babandaula Bible na kulonda mutwe wa mwanda umo umo. Shi abatana kisonekwa kya mu Bible kikomo kwivwana, bādi bakimba mavese makwabo ashintulula’kyo. Shi abatana nshintulwilo mine ikwatañene na Bisonekwa bikwabo byonso, balemba’yo. Abo pa kuleka Bible eshintulule aye mwine, basokola monka bubine butala pa dijina dya Leza, pa Bulopwe bwandi, pa mpango yandi itala bantu ne ntanda, pa mwikadile bafwe, ne pa lukulupilo lwa lusangukilo. Kukimbakimba kwabo kwebanyongolwele mu nkulupilo ne mu bisela bivule bya bubela.—Yoano 8:31, 32.

Kufika mu 1879, Befundi ba Bible bājingulwile amba kitatyi kibafika kya kuyukanya bubine pi na pi. O mwanda mu mwine mwaka’wa, bāshilula kulupula Kiteba kya Mulami Kisapula Bulopwe bwa Yehova, dipepala dyotukilupula ne didi kūlu dino. Pano tusapwilanga bantu bubine bwa mu Bible mu matanda 240 ne mu ndimi 900 ne kupita. Kashā, buyuki bwa bine kebwavudile uno muswelo!

  • I bika byāfikīle bubine bwa mu Bible kupwa kwa lufu lwa Kidishitu?

  • I bika byetukweshe tusokole dikwabo bubine bwa mu Kinenwa kya Leza?