Meksike

Alemanye

Botswana

Nikaragua

Itadi

Mwanda waka bano bantu i basangale nenki? Mwanda badi ku kitango. Pamo bwa bengidi ba pa kala bāsoñanibwe kutanwa ku bitango misunsa isatu pa mwaka, netu tutanwanga ku bitango bikatampe. (Kupituluka 16:16) Mwaka ne mwaka, tudi na bitango bisatu: Bitango bya Kipindi bibidi bya difuku dimo dimo ne Kitango kya Ntanda kya mafuku asatu. Le tumwenanga namani mu bino bitango?

Bitamijanga bu bana na bana bwetu bwa bwine Kidishitu. Monka mokyādi kisangeja bene Isalela kutumbija Yehova ‘mu kipwilo,’ ne batwe netu tusangalanga kumutōtela pamo mu ino mikenga ya pa bula. (Ñimbo ya Mitōto 26:12; 111:1) Bino bitango bitupanga mikenga ya kwitana na Batumoni batambile mu bipwilo bikwabo ne mu matanda makwabo. Shi ke midi, tudīlanga pamo bidibwa ku kifuko kulongelwa kitango, nabyo bitamijanga kipwano kyetu mu ino mikenga ya ku mushipiditu. (Bilongwa 2:42) Kuno ye kotwimwenanga buswe bukutyīle umbumo “kisaka kyonso kya banabetu” ntanda yonso.1 Petelo 2:17.

Bitukwashanga tutame ku mushipiditu. Bene Isalela nabo bāmwenine mu ‘kwivwanija binenwa’ bya mu Bisonekwa byādi bibashintulwilwa senene. (Nehemia 8:8, 12) Netu tukwatanga na mutyika bufundiji bwa mu Bible botutambula ku bitango. Mpangiko yonso imanine pa mutwe wa mwanda wa mu Bisonekwa. Tufundanga mwa kulongela kiswa-mutyima kya Leza mu būmi bwetu kupityila ku mashikulu akankamika, mashikulu a bipindibipindi ne byengelekejo. Tukankamikwanga potwivwana myanda mimweke ya banabetu batenwe na matompo mu būmi bwa bwine Kidishitu ne kwiakomena mu ino myaka ya malwa. Ku bitango bya ntanda, madrame a bantu bavwele muvwadilo wa kala, etufundijanga mānga ya mu Bible ya binebine ne ya kamweno kotudi. Ku kitango ne kitango, kubatyijibwanga boba basaka kulombola patōkelela kwipāna kobepēne kudi Leza.

  • Mwanda waka bitango i bitatyi bya nsangaji?

  • I muswelo’ka okokeja kumwena mu kutanwa ku bitango?