Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIFUNDWA 23

Le Bitabo Byetu Bilembwanga ne Kwalamunwa Namani?

Le Bitabo Byetu Bilembwanga ne Kwalamunwa Namani?

Mwingilo wa Balembi, mu États-Unis

Korea wa Kunshi

Armeni

Burundi

Sri Lanka

Pa kulonga bukomo bwetu bonso bwa kusapula “myanda miyampe” ku “mizo yonso ne bisaka ne ndimi ne bantu,” tulupulanga bitabo mu ndimi 900 ne kupita. (Kusokwelwa 14:6) Le tubwanyanga namani uno mwingilo mukomo? Twiubwanyanga na bukwashi bwa kisumpi kya balembi ba ntanda yonso ne kisumpi kya balamuni bepāne—bano bonso i Batumoni ba Yehova.

Bilembwa bibajinji biteakanibwanga mu Angele. Kitango Kyendeji kitalanga bilonga Mwingilo wa Balembi ku kyetu kité kya ntanda yonso. Batutu ba ku uno mwingilo bendejanga mwingilo upēlwe balembi bengila ku kité kya ntanda yonso ne badi mu mabilo amoamo a misambo. Kwikala kotwikele na balembi beshileshile kwitupanga muswelo wa kulemba myanda palapala ilengeja mabuku etu asangelwe na bantu ba mizo mivule.

Bilembwa bituminwanga balamuni. Shi myanda ibapu kulembwa ne kwitabijibwa, ituminwanga bisumpi bya balamuni ntanda yonso kupityila ku Entelenete, baalamuna’byo, bebibandaula, ne kwibitangulula. Baloñanga bukomo bwa kutonga mu ludimi mobalamwina “binenwa byoloke bya bubine” bileta milangwe minemine idi mu Angele.—Musapudi 12:10.

Maolodinatele apēlejanga mingilo. Olodinatele keibwanyapo kupingakana balembi ne balamuni. Inoko, mingilo yabo i mipēlejibwe na kwingidija mabuku ashintulula bishima adi mu olodinatele, mpangiko idi’mo itala ludimi, ne ya bukimbi. Batumoni ba Yehova i bapunge mpangiko imo mu olodinatele itwa bu MEPS (Système électronique d’édition multilingue), mine ikwasha kutweja bilembwa mu ndimi tutwa na tutwa, kwela’mo ne bifwatulo, ne kupangika’byo senene mwa kwibitampila.

Mwanda waka tuloñanga buno bukomo bonso, enka ne mu ndimi isambwanga na bantu batyetye kete? Mwanda Yehova “usaka’mba bantu ba miswelo yonso bapande ne kwikala na buyuki bwinebwine bwa bubine.”—1 Temote 2:3, 4.

  • Le bitabo byetu bilembwanga namani?

  • Mwanda waka twalamunanga bitabo byetu mu ndimi mingimingi uno muswelo?