“Mwisanswei bininge banwe bene na bene, mwanda buswe bupūtanga milwi ne milwi ya bubi.”—1 Petelo 4:8

Byomwashilula būmi bwa ba mulume ne mukaji, bya myanda myanda bisa kwanza. Padi bikatamba ku kwishila kwenu ku milangilo, miivwanino ne mimweno ya būmi. Myanda mikwabo isa kukatamba kungi ne ku bintu bya kitulumukila.

Bamo bakimbanga kupūta meso pa bintu bimweke, ino Bible aye witudingila kupwa myanda. (Mateo 5:23, 24) Londai misoñanya ya mu Bible mupwe myanda yenu biyampe.

 1 MWISAMBILEI PA MWANDA’WA

BINENA BIBLE: Kudi “kitatyi kya kwisamba.” (Musapudi 3:1, 7) Mwitūdilei’ko kitatyi mwisambile pa mwanda’wa. Yukija mwinē pobe pampikwa kafinda momwena ne molangila pa mwanda’wa. ‘Nena bubine’ nyeke ku mwinē pobe. (Efisesa 4:25) Nansha shi ubalobe namani, wishise kumana. Kulondolola na butūkanye kekulungululangapo myanda kufika ku luma.—Nkindi 15:4; 26:20.

Nansha shi kwitabijepo, abe nena’nka bisangaja, kokelwa kuswa ne kulēmeka mwinē pobe. (Kolose 4:6) Pwai mwanda bukidibukidi, kokaleka kuneneja mwinē pobe.—Efisesa 4:26.

BYOMUKOKEJA KULONGA:

  • Mwitūdilei kitatyi kifwaninwe kya kwisambila pa mwine mwanda’wa

  • Shi kaesambe, kokamukala. Ilaija nobe usa kwisamba

 2 TEJA KADI IVWANIJA

BINENA BIBLE: “Mwisanswei banwe bene na bene kisanso kya ku mutyima. Mu kwilēmeka banwe bene na bene namo ikalai babajinji.” (Loma 12:10) Muswelo oteja udi na mvubu mpata. Ivwanija mulangwe wa mwinē pobe na mutyima wa “kulangila bakwenu . . . ne na kwityepeja.” (1 Petelo 3:8; Yakoba 1:19) Kokapumpunya pa kuteleka. Shi bibwanika, leka bidi byolonga, ute mutyima obe onso ku binena mwinē pobe, nansha kadi mulombe shi mukokeja kwisambila’po kyaba kikwabo. Shi umona mwinē pobe bu mupwani nobe, ke kinkwa nobepo, bine kukapelakanapo “bukidi mu mushipiditu obe kufuna bulobo.”—Musapudi 7:9.

BYOMUKOKEJA KULONGA:

  • Ivwana na matwi a nteja, nansha shi byanena kebikusangajapo

  • Ivwana kinene muntu, uyuke ne kishele munda. Tala mulongela ngitu yandi ne diwi dine dyanena nadyo

3 LONGELELA

BINENA BIBLE: “Mu mingilo yonso e mudi kadīlo: Ino kinenwa kya milomo kitwala ku bufudile.” (Nkindi 14:23) Kumvwañana kupwa mwanda konkakonka kekubwenepo. Mufwaninwe kulongelela mungya momwaumvwañena. Kino kilomba kwikonda mpata ne kulonga bukomo bwa binebine, ino kidi na kafwila-midimo. (Nkindi 10:4) Shi mwingidile umbumo, mukekala na “kamweno kayampe” mu mingilo yenu mikomo.—Musapudi 4:9.

BYOMUKOKEJA KULONGA:

  • Tonga matabula mapotoloke omusa kutabula mupwe mwanda

  • Bandaula kitatyi ne kitatyi momulungulukila