“Bino binenwa bino’bi byo nakusoñanya dyalelo dino’di bikekala pa mutyima obe; kadi ukebikomeneja kudi bobe bāna.”—Kupituluka 6:6, 7

Yehova paāpangile mpangiko ya kisaka, wāpele bambutwile kiselwa pa babo bana. (Kolose 3:20) Abe mbutwile ye abe mwinē kiselwa kya kufundija obe mwana kuswa Yehova ne kuyuka kwisasaketa. (2 Temote 1:5; 3:15) Kadi ufwaninwe kujingulula bidi mu mutyima wa obe mwana. Na bubine, kimfwa kyobe i kya mvubu mpata. Ubwanya kufundija obe mwana senene Kinenwa kya Yehova shi abe mwine wikilamine ku mutyima.—Ñimbo 40:8.

 1 IBIDIJA BOBE BANA KUKUSAPWILA MYANDA

BINENA BIBLE: Ikala na “bukidi pa kwivwana, wija pa kwisamba.” (Yakoba 1:19) Shi usaka bobe bana bayuke amba bakokeja kwiya kwisamba nobe pa kubulwa moyo, yuka amba abe ye wa kwibashitwila kibelo kya kukusapwila’bo myanda. Wisambe na nsangaji ibwanya kwibapa buninge bwa kulupula bidi ku mityima. (Yakoba 3:18) Shi balanga’mba udi na kasumalomo nansha na kaninga mpo, kebakasakepo binebine kukusabila myanda patōka. Tūkija mutyima na bobe bana, kadi kyaba ne kyaba wibakulupija’mba wibaswele.—Mateo 3:17; 1 Kodinda 8:1.

BYOMUKOKEJA KULONGA:

  • Ikala’po kitatyi kisaka kwisamba nobe bobe bana

  • Wisamba na bobe bana kyaba ne kyaba, ke’nkapo shi myanda ibamweka

2 IMVWANIJA BINE BYOBASAKA KUNENA

BINENA BIBLE: “Yewa uta mutyima ku kinenwa ukatana biyampe.” (Nkindi 16:20) Kitatyi kimo bikulomba kwivwanija binena bobe bana mwa kuyukila bishele mwabo munda. Pavule, banuke bekalanga na muneneno-mpata, pakwabo banena bingi byobalanga bingi. “Yewa ulondolola kala kaivwanije, i bulembakene.” (Nkindi 18:13) Kokapēlakanai kufītwa mutyima.—Nkindi 19:11.

BYOMUKOKEJA KULONGA:

  • Sumininwa kuleka kukala mwana shi kanena nansha kumukalabela, nansha shi wanena byambulwa kwendela’mo

  • Vuluka mowadi wiivwanina powakidi na yandi myaka ne bintu byadi na mvubu kodi

 3 MWIKUTYILEI UMBUMO

BINENA BIBLE: “Wami mwana, ivwana bulombodi bwa shobe; kadi kokazobololapo lufundijo lwa inobe.” (Nkindi 1:8) Yehova i mupe shabana ne inabana lupusa pa babo bana. Mufwaninwe kufundija benu bana kwimulēmeka ne kwimukōkela. (Efisesa 6:1-3) Shi bambutwile kebadipo “umbumo bwa binebine mu ñeni imo,” bana bayukanga. (1 Kodinda 1:10) Shi kemumvwañenepo ku meso a benu bana, longai bukomo baleke kuyuka, kutyina amba bakemupwa bulēme.

BYOMUKOKEJA KULONGA:

  • Mwisambilai pamo ne kumvwañana pa mwa kudingidila benu bana

  • Shi abe ne mwinē pobe mudi na milangwe mishile pa mwa kufundijija benu bana, nankyo bandaula mumweno wa mwinē pobe

 4 IKALAI NA MPANGIKO

BINENA BIBLE: “Tamija mwana mu dishinda dimufwaninwe.” (Nkindi 22:6) Kufundija benu bana biyampe ke kintupo kiila mu kitulumukila. Mufwaninwe kutūla’ko mpangiko idi’mo ne madingi. (Ñimbo 127:4; Nkindi 29:17) Madingi ke mfutopo bitupu, ino i kukwasha benu bana bemvwanije buluji bwibapelwa mbila. (Nkindi 28:7) Kadi wibafundija baswe Kinenwa kya Yehova ne kujingulula misoñanya idi’mo. (Ñimbo 1:2) Kino kikebakwasha bekale na mutyima wa mundamunda muyampe.—Bahebelu 5:14.

BYOMUKOKEJA KULONGA:

  • Longai buninge benu bana bamone Leza bu Muntu udi’ko binebine, obakokeja kukulupila

  • Mwibakwashai kujingulula ne kwepuka byaka bidi mu kwikala na milangwe mibi, kimfwa byobya bitanwa pa Entelenete ne pa makela a kyungwija. Mwibafundijai ne mwa kwepukila bantu basakañana ku bukomo

“Tamija mwana mu dishinda dimufwaninwe”