Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA WA DIKUMI NE BUTANO

Muswelo Muyampe wa Kutōta Leza

Muswelo Muyampe wa Kutōta Leza

1. I ani ufwaninwe kwitulombola muswelo muyampe wa kutōta Leza?

BIPWILO bivule bītelanga’mba bifundijanga bubine butala padi Leza. Ino ke amopo, mwanda bipwilo bifundijanga bintu bishile bininge pa mwikadile Leza ne muswelo otufwaninwe kumutōta. Le tukayuka namani muswelo muyampe wa kutōta Leza? Yehova aye mwine ye ufwaninwe kwitusapwila muswelo otufwaninwe kumutōta.

2. Le ukayuka namani muswelo muyampe wa kutōta Leza?

2 Yehova i mwitupe Bible mwanda wa tuyuke muswelo muyampe wa kumutōta. Nanshi wifunde Bible, Yehova nandi ukakukwasha umwene mu bufundiji bwandi mwanda ukutele mutyima bya binebine.​—Isaya 48:17.

3. Le Leza witusakila tulonge bika?

3 Bantu bamo banenanga’mba Leza witabije bipwilo byonso, inoko ke abyopo byētufundije Yesu. Aye wānenene amba: “Ke muntupo ense wa kunena ami amba, ‘Mfumwami, Mfumwami,’ ukatwela mu Bulopwe bwa mūlu, poso’nka yewa ulonga kiswa-mutyima kya Tata.” Nanshi i biyampe tuyuke kiswa-mutyima kya Leza ne kwikilonga. Uno i mwanda musumininwe mwanda Yesu wādingakenye boba kebakōkelapo Leza na bankuma-bibi na kwibatela’mba i “ba kujilula bijila!”​—Mateo 7:21-23.

4. Le Yesu wānenene bika pa mwanda utala kulonga kiswa-mutyima kya Leza?

4 Yesu wētudyumwine amba shi tusaka kulonga kiswa-mutyima kya Leza, tukatanwa na matompo. Wānenene  amba: “Twelelai pa kakibelo katyetye, mwanda kibelo i kikatampe ne dishinda ditwala ku konakanibwa nadyo i dikata, ne benda’mo bene i bavule; inoko kakibelo i katyetye ne dishinda ditwala ku būmi nadyo i dityinye, ne ba kwidisokola bene i batyetye.” (Mateo 7:13, 14) Dishinda dityinye, ko kunena’mba muswelo muyampe wa kutōta Leza, ditwala ku būmi bwa nyeke. Dishinda dikata, ko kunena’mba muswelo mubi wa kutōta Leza, ditwala ku lufu. Inoko Yehova kasakengapo muntu nansha umo afwe. I mupe muntu ne muntu mukenga wa kwifunda yandi myanda.​—2 Petelo 3:9.

MUSWELO MUYAMPE WA KUTŌTA LEZA

5. I muswelo’ka okokeja kujingulula boba batōta Leza mu muswelo muyampe?

5 Yesu wānenene amba tubwanya kujingulula boba batōta Leza mu muswelo muyampe. Twibayukanga na kubandaula byobya byobakulupile ne byobalonga. Yesu wānenene amba: “Mukebayukila ku bipa byabo.” Kadi wābweja’ko amba: “Mutyi onso muyampe nao mo monka, upanga bipa bilumbuluke.” (Mateo 7:16, 17) Kino kekilombolapo amba boba batōta Leza i bantu babwaninine. Ino kilombola’mba bengidi ba Leza baloñanga bukomo bwa kulonga biyampe. Tutale’ko bintu bibwanya kwitukwasha tujingulule boba batōta Leza mu muswelo muyampe.

6, 7. Mwanda waka kipwilo kya bine kilamete’nka ku Bible? Le kimfwa kya Yesu kitufundija bika?

6 Tufwaninwe kutōta na kulonda binena Bible. Bible unena’mba: “Kisonekwa kyonso i kisonekejibwe na mushipiditu wa Leza kadi i kya kamweno pa kufundija, pa kudingila, pa kōlola bintu, ne pa kulemununa mu boloke, amba muntu wa Leza ekale mubwanye byonsololo, muteakanibwe senene mwa kwingidila mwingilo onso  muyampe.” (2 Temote 3:16, 17) Mutumibwa Polo wālembēle bene Kidishitu amba: “Pomwatambwile kinenwa kya Leza, kyomwaivwene kotudi, mwaitabije’kyo, ke bu kinenwapo kya bantu, aa, ino i monka mokikadile binebine, bu kinenwa kya Leza.” (1 Tesalonika 2:13) Kipwilo kya bine kilamete’nka ku Bible, Kinenwa kya Leza. Kekilondangapo milangwe ya bantu, bisela, nansha bintu bikwabo.

7 Byonso byādi bifundija Yesu byādi bitamba mu Kinenwa kya Leza. (Tanga Yoano 17:17.) Divule wādi upituluka mu bisonekwa. (Mateo 4:4, 7, 10) Bengidi ba Leza ba bine balondanga kimfwa kya Yesu kadi byonso byobafundija balupulanga’byo mu Bible.

8. Lelo Yesu wētufundije bika pa mwanda utala kutōta Yehova?

8 Tufwaninwe kutōta’nka Yehova kete. Ñimbo ya Mitōto 83:18 inena’mba: “Abe, wa dijina dya bu Yehova, abe bunka bobe wi Mwine wa Peulu Mwine pa ntanda yonso.” Yesu wādi usaka bantu bayuke senene Leza wa bine, kadi wēbafundije dijina dya Leza. (Tanga Yoano 17:6.) Yesu wānenene amba: “Ufwaninwe kutōta Yehova Leza obe, kadi aye kete ye ofwaninwe kwingidila mingilo ikola.” (Mateo 4:10) O mwanda, byotudi bengidi ba Leza, tulondanga kimfwa kya Yesu. Tutōtanga enka Yehova kete, tutela dyandi dijina, kadi tusapwilanga bantu dijina dya Leza ne byobya byasa kwitulongela.

9, 10. Le twilombolanga buswe namani?

9 Tufwaninwe kusanswa bantu bya binebine. Yesu wāfundije bandi bana ba bwanga besanswe. (Tanga Yoano 13:35.) Besanswe pampikwa kulonda’mba i wa koku, i wa byobi bibidiji, i mulanda nansha’mba i mpeta. Buswe botwisenswe bufwaninwe kwitulunga mu bumo na batutu ne bakaka. (Kolose 3:14) O mwanda ketwendangapo ku divita nansha kwipaya bantu. Bible unena’mba:  “Bana ba Leza ne bana ba Dyabola bayukenanga pa uno mwanda: Yewa ense kalongalongapo boloke katambilepo kwa Leza, ne yewa kasenswepo mwanabo mwine.” Kadi ubweja’ko amba: “Twisanswei batwe bene na bene; ke pamopo bwa Kaini, wātambile kwa yewa mubi ne kwipaya mwanabo.”​—1 Yoano 3:10-12; 4:20, 21.

10 Tupānanga kitatyi kyetu, bukomo, ne bintu byetu mwanda wa kukwasha nabyo bantu bakwabo ne kwibakankamika. (Bahebelu 10:24, 25) Tulongelanga “bantu bonso biyampe.”​—Ngalatea 6:10.

11. Mwanda waka twitabije Yesu bu dishinda ditwala kudi Leza?

11 Tufwaninwe kukōkela Yesu mwanda i dishinda ditwala kudi Leza. Bible unena’mba: “I kutupu lupandilo mu muntu mukwabo nansha umo, mwanda i kutupu dijina dikwabo munshi mwa diulu dipelwe bantu motufwaninwe kupandila.” (Bilongwa 4:12) Mu Shapita 5 wa kino kitabo, twefundile’mo amba Yehova wātumine Yesu amba apāne būmi bwandi bu kinkūlwa ku bantu ba kikōkeji. (Mateo 20:28) Yehova i mutonge Yesu aludike bu Mulopwe pa ntanda. O mwanda Bible witusoñanya tukōkele Yesu shi tusaka’mba tukamone būmi bwa nyeke.—Tanga Yoano 3:36.

12. Mwanda waka ketwikujangapo mu politike?

12 Ketufwaninwepo kwikuja mu politike. Yesu kēkujijepo mu politike. Paādi mu kisambo, wāsapwidile Pilato, mbikavu mwine Loma amba: “Bulopwe bwami ke bwa ino ntandapo.” (Tanga Yoano 18:36.) Pamo bwa Yesu, netu tukōkele Bulopwe bwa Leza bwa mūlu, o mwanda nansha shi tushikatanga kwepi, ketwikujangapo mu politike. Inoko, Bible witusoñanya kukōkela “ba lupusa batabukile bukatampe,” ko kunena’mba, Leta. (Loma 13:1) Tulēmekanga bijila bya mu ntanda yotushikete’mo. Inoko, shi kijila kya Leta ke kijilula  bijila bya Leza, twiulanga batumibwa bānenene amba: “Tufwaninwe kukōkela Leza bu mulopwe kupita’ko bantu.”​—Bilongwa 5:29; Mako 12:17.

13. Le i bika byotusapulanga bitala pa Bulopwe bwa Leza?

13 Tukulupile amba enka Bulopwe bwa Leza kete bo bukapwija makambakano a ino ntanda. Yesu wānenene amba “myanda miyampe ya Bulopwe” ikasapulwa ku bantu bonso pano pa ntanda. (Tanga Mateo 24:14.) I kutupu umbikalo wa bantu nansha umo ubwanya kulonga byobya biketulongela Bulopwe bwa Leza. (Ñimbo ya Mitōto 146:3) Yesu wētufundije tulombe Bulopwe bwa Leza paānenene amba: “Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.” (Mateo 6:10) Bible witusapwila’mba Bulopwe bwa Leza bukonakanya imbikalo yonso ya bantu ne amba “abo kete bukemananga nyeke.”​—Danyele 2:44.

14. Molangila, i bāni batōta Leza mu muswelo muyampe?

14 Byowapwa kwifunda ino myanda, wiipangule amba: ‘I bāni bafundijanga’nka byobya bidi mu Bible? I bāni basapwilanga bantu bakwabo dijina dya Leza? I bāni besenswe bya binebine ne bakulupile amba Leza wātumine Yesu mwanda wa kwitupandija? Le i bāni kebekujangapo mu politike? I bāni basapulanga’mba enka Bulopwe bwa Leza kete bo bukapwija makambakano etu?’ I enka Batumoni ba Yehova kete.​—Isaya 43:10-12.

LE ABE USA KULONGA’PO NAMANI?

15. Le i bika byotufwaninwe kulonga shi tusaka Leza etabije butōtyi bwetu?

15 Kukulupila’tu amba Leza udi’ko kekubwenepo. Enka ne bandemona bakulupile amba Leza udi’ko, inoko kebamukōkelepo. (Yakoba 2:19) Shi tusaka Leza etabije butōtyi bwetu, ketufwaninwepo’tu  enka kukulupila’mba Leza udi’ko, ino tufwaninwe ne kulonga byobya byanena.

16. Mwanda waka tufwaninwe kutamba mu kipwilo kya bubela?

16 Pa kusaka’mba Leza etabije butōtyi bwetu, tufwaninwe kutamba mu kipwilo kya bubela. Mupolofeto Isaya wālembele amba: “Tambai mu bukata mwandi, ikalai bampikwa disubi.” (Isaya 52:11; 2 Kodinda 6:17) O mwanda tufwaninwe kupela kintu kyonso kya mu kipwilo kya bubela.

17, 18. Le “Babiloni Mukatampe” i bika, ne mwanda waka i biyampe kutamba’mo bukidibukidi?

17 Le kipwilo kya bubela i kyepi? I kipwilo kyonso kifundija kutōta Leza mu muswelo mwishile na binena Bible. Bible utela bipwilo byonso bya bubela amba i “Babiloni Mukatampe.” (Kusokwelwa 17:5) Mwanda waka? Pāpwile Dilobe dya mu mafuku a Noa, mfundijo mivule ya bipwilo bya bubela yāshilwile mu kibundi kya Babiloni. Ebiya ino mfundijo yāsambakana pano pa ntanda ponso. Kimfwa, bantu ba mu Babiloni bādi batōta bisumpi bya baleza basatu. Dyalelo nadyo, bipwilo bivule bifundijanga’mba mu Leza umo mudi baleza basatu, inoko Bible ufundija patōkelela’mba kudi enka Leza umo kete wa bine, Yehova, ne amba Yesu i wandi Mwana. (Yoano 17:3) Bantu ba mu Babiloni bādi bakulupile monka’mba kudi kipindi kya ku muntu kyendelelanga na būmi shi umbidi ubafu ne amba kino kipindi kibwanya kwelwa mu kalunganyembo ka mudilo. Bino byonso i bya bubela.—Tala Bilembwa bya ku Mfulo 14, 17, ne 18.

18 Leza i mulaye amba panopano ponka bipwilo byonso bya bubela bisa konakanibwa. (Kusokwelwa 18:8) Le kumwenepo amba i biyampe kutamba bukidibukidi mu kipwilo kya bubela? Yehova Leza ukusakila utambe’mo pakidi mema mu manwi pano.​—Kusokwelwa 18:4.

Shi wingidile Yehova pamo na bantu bandi, ukekala mu kisaka kya ntanda yonso

19. Shi ubakwata butyibi bwa kwingidila Yehova, le aye nandi ukakukwatakanya namani?

 19 Shi ubakwata butyibi bwa kutamba mu kipwilo kya bubela, balunda nobe nansha ba mu kisaka, babwanya kwalakana butyibi bobe, enka ne kukususula. Inoko Yehova kakakwelapo. Abe ukekala mu kisaka kya ntanda yonso kya bantu midiyo ne midiyo besenswe bya binebine, kadi ukekala na lukulupilo lwa kwikala na būmi bwa nyeke mu ntanda mipya ya Leza. (Mako 10:28-30) Padi balunda nobe bamo ne ba mu kisaka balakana butyibi bobe bwa kwingidila Yehova bakatonga nabo kwifunda Bible mwenda mafuku.

20. Mwanda waka i biyampe kutōta Leza mu muswelo muyampe?

20 Panopano ponka, Leza usa kutalula’ko bibi byonso kadi Bulopwe bwandi busa kuludika ntanda yonso. (2 Petelo 3:9, 13) Bine, kikekala kitatyi kiyampe mpata! Muntu yense ukatōta Yehova mu muswelo usaka Yehova tumutōte. Nanshi i biyampe ukwate butyibi bwa kutōta Leza mu muswelo muyampe tamba’nka pano.