Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA WA DIKUMI NE BUBIDI

I Muswelo’ka Obwanya Kwikala Mulunda na Leza?

I Muswelo’ka Obwanya Kwikala Mulunda na Leza?

1, 2. Lelo i bantu’ka bamo bāikele balunda na Yehova?

I MUNTU wa muswelo’ka osakanga kupwana nandi? I muntu osenswe. Yewa omwiivwana nandi biyampe. Muntu udi na bumuntu buyampe ne ngikadila yosenswe.

2 Yehova Leza utoñanga bantu bamo bekale balunda nandi. Kimfwa, Abalahama wādi mulunda na Yehova. (Isaya 41:8; Yakoba 2:23) Kadi Yehova wādi usenswe Davida. Wānenene’nka ne kunena’mba Davida i “muntu wa mwendele mutyima wami.” (Bilongwa 13:22) Mupolofeto Danyele nandi wādi “mulēme bininge” kudi Yehova.​—Danyele 9:23.

3. Mwanda waka ba Abalahama, Davida, ne Danyele bāikele balunda na Yehova?

3 Le ba Abalahama, Davida, ne Danyele bāikele namani ke balunda na Yehova? Yehova wāsapwidile Abalahama amba: “Ubaivwana diwi dyami.” (Ngalwilo 22:18) Yehova upwananga na boba bamukōkela na kwityepeja. Nansha ke muzo mutuntulu nao ubwanya kupwana nandi. Yehova wānenene muzo wa Isalela amba: “Kōkelai diwi dyami, nami nkekala Leza wenu, nenu mukekala bantu bami.” (Yelemia 7:23) Nanshi abe nobe kōkela Yehova shi usaka kwikala mulunda nandi.

YEHOVA UKIÑANGA BALUNDA NANDI

4, 5. Le Yehova ukiñanga balunda nandi namani?

4 Bible unena’mba Yehova ukimbanga miswelo ya “kulombola bukomo bwandi pangala pa boba badi na mutyima mubwane kwadi.” (2 Bilongwa 16:9) Yehova i  mulaye balunda nandi mu Ñimbo ya Mitōto 32:8 amba: “Nkakupanga bujinguludi ne kukufundija dishinda dyofwaninwe kunanga’mo. Nkakupanga madingi ne diso dyami podi.”

5 Walwana mukomo usakanga kwitukankaja tuleke kwikala balunda na Leza. Inoko Yehova usakanga kwitukinga. (Tanga Ñimbo ya Mitōto 55:22.) Byotudi balunda na Yehova, tumwingidilanga na mutyima wetu onso. Tulamatanga kwadi nansha ke mu makambakano makomo namani. Kadi tudi na kikulupiji na kyādi nakyo mulembi wa mitōto. Wālembele padi Yehova amba: “Mwanda aye udi ku kuboko kwami kwa lundyo, nkikatenkanapo nansha dimo.” (Ñimbo ya Mitōto 16:8; 63:8) Le i muswelo’ka ukimbanga Satana kwitukankaja tuleke kwikala balunda na Leza?

BUBELA BWA SATANA

6. Le Satana ubepelanga bantu bika?

6 Mu Shapita 11 twefundile’mo amba Satana ulwanga Yehova ne kumutela’mba i mbepai. Kadi Satana wānenene amba Yehova kadipo biyampe mwanda kapēlepo ba Adama ne Eva bwanapabo bwa kwitūdila abo bene kiyampe ne kibi. Mukanda wa mu Bible wa Yoba witufundija’mba Satana ubepelanga ne bantu basaka kwikala balunda na Leza. Satana unenanga’mba bantu bengidilanga Leza mwanda wa kamweno kampanda, ke pa mwandapo wa buswe bobamusenswe. Satana wāfudile ne ku kunena’mba ubwanya kubombola muntu yense kudi Leza. Tutalei ñeni yotubwanya kuboila kudi Yoba ne muswelo wāmukingile Yehova.

7, 8. (a) Le Yehova wādi umwene Yoba namani? (b) Le Satana wānenene bika padi Yoba?

7 Le Yoba i ani? I muntu muyampe wāikele’ko pano ke papite kubwipi kwa myaka 3600. Yehova wānenene  amba mu kine kitatyi’kya, pano pa ntanda kepādipo muntu udi bwa Yoba. Yoba wādi ulēmekele Leza bininge, kadi wādi ushikilwe bintu bibi. (Yoba 1:8) Bine, Yoba wādi mulunda wa bine wa Yehova.

8 Satana wānenene amba Yoba wingidilanga Leza pa mwanda wa kwisakila kamweno kandi. Satana wānenene Yehova amba: “Le kumusailepo lusao lwa kumukinga aye ne njibo yandi ne bintu byonso byadi nabyo? Ubaesela mingilo ya makasa andi, kadi bimunanwa byandi nabyo bibasambakana pa ntanda. Nanshi olola kuboko kobe ukupile bintu byonso byadi nabyo, na bubine ukakufinga ku mpala yobe.”​—Yoba 1:10, 11.

9. Le Yehova wālekele Satana alonge bika?

9 Satana wābepēle Yoba amba wingidilanga Yehova pa mwanda wa kamweno kamwena Kwadi. Kadi Satana wānenene amba ubwanya kukankaja Yoba aleke kwingidila Yehova. Yehova kāitabijepo bubela bwa Satana, ino wālekele Satana atompe Yoba mwa kuyukila shi bine Yoba upwene na Yehova pa mwanda wa buswe bwamuswile.

SATANA WATOMPA YOBA

10. Le Satana wātompele Yoba namani, ne Yoba nandi wālongele’po namani?

10 Dibajinji, Satana wāonakenye ne kwibija banyema bonso ba Yoba. Kadi Satana wāipaya ne bengidi bavule ba Yoba. Yoba wājimije bintu byonso. Mu ditompo dya mfulo, Satana wāipaya bana dikumi ba Yoba mu kimpumpu. Inoko Yoba wāshele nyeke mulamate kudi Yehova. “Mu bino byonso’bi, Yoba kalongelepo bubi nansha kulambika Leza amba walonga kintu kibi.”​—Yoba 1:12-19, 22.

Yehova wāpadile Yoba mulunda nandi wa binebine mpalo

11. (a) Le Satana wālongele Yoba bintu’ka bikwabo? (b) Le Yoba wālongele’po namani?

11 Satana kāimaninepo’nka papo. Wālwile Leza na kumunena’mba: “[Kupila] mukupa ne ngitu yandi, na bubine  ukakufinga ku mpala yobe.” Ebiya Satana wābeleka Yoba misongo isansa mpata. (Yoba 2:5, 7) Ne pano pene, Yoba wāshele mulamate kudi Yehova. Wānena’mba: “Enka ne byomfwa, nkikalekapo bululame bwami!”​—Yoba 27:5.

12. Le Yoba wālombwele namani amba Satana i mbepai?

12 Yoba kādipo uyukile kintu nansha kimo pa byāmubepēle Satana nansha kine kyaādi ususukila bininge nabya. Wādi kalanga’mba i Yehova walengeja’byo. (Yoba 6:4; 16:11-14) Ino nansha nankyo, Yoba wāshele mulamate kudi Yehova. Pano bubine bwāmwekele patōkelela. Yoba kādipo muntu wisakila. Wādi upwene na Leza pa mwanda wa kumusanswa kwaādi umusenswe. Binenwa bya Satana byādi bya bubela!

13. Lelo lulamato lwa Yoba lwāmuletēle bika?

13 Nansha Yoba byakādipo uyukile bilongeka mūlu, aye wāshele mulamate kudi Leza, wālombola’mba Satana i mubi. Yehova wāpadile Yoba mpalo mwanda wa bulunda bwandi bwa ndamatyidile.​—Yoba 42:12-17.

NOBE SATANA UKUBEPELANGA

14, 15. Lelo Satana ubepelanga bantu bonso bubela’ka?

14 Tubwanya kuboila ñeni mivule ku byobya byātene Yoba. Dyalelo, Satana witubepelanga’mba twingidilanga Yehova mwanda wa kamweno kotumwena Kwadi. Satana i munene mu Yoba 2:4 amba: “Muntu ukapāna bintu byonso byadi nabyo mwanda wa būmi bwandi.” Nanshi Satana kābepēlepo’nka Yoba kete, ino i ne bantu bonso, bana-balume ne bana-bakaji amba badi na kwisakila. Myaka tutwa na tutwa papo Yoba ke mufwe, Satana wadi’nka ukituka Yehova ne kubepela bengidi Bandi. Kimfwa, tutanga mu Nkindi 27:11 amba: “A wami mwana, ikala na tunangu, sangaja mutyima wami, amba nondolole yewa unkolomona [nansha untuka].”

 15 Ubwanya kutonga kukōkela Yehova ne kwikala mulunda nandi umulamete, mwanda wa kulombola’mba Satana i mbepai. Shi bikulomba kushinta mu būmi bobe pa kusaka’mba wikale mulunda na Leza, nankyo bine, i biyampe ushinte! Kukwata buno butyibi i mwanda musumininwe. Satana unenanga’mba kukalamatapo Leza shi ubatanwa na makambakano. Ukimbanga kwitongola mwanda wa tulamuke kudi Leza. Namani le?

16. (a) Le Satana wingidijanga manwa’ka pa kukankaja bantu baleke kwingidila Yehova? (b) Le Dyabola ubwanya namani kukukankaja uleke kwingidila Yehova?

16 Satana wingidijanga manwa palapala pa kwitukankaja tuleke kwikala balunda na Leza. Witutambanga “pamo bwa ntambo ubuluma, ukimba wa kubokota.” (1 Petelo 5:8) Kokitulumuka shi balunda nobe, babutule, nansha bantu bakwabo bakukankaja kwifunda Bible nansha kulonga byobya byoloke. Padi ukemona bwa abe watambwa bulwi. * (Yoano 15:19, 20) Kadi Satana wiinanyanga bu “mwikeulu wa kitōkeji.” Nanshi ukokeja kwitongola mwanda wa tutombokele Yehova. (2 Kodinda 11:14) Manwa makwabo engidijanga Satana pa kwitukankaja tuleke kwingidila Yehova i a kwitupa milangwe ya kwimona bu bampikwa kufwaninwa kwingidila Leza.​—Nkindi 24:10.

KŌKELA BIJILA BYA YEHOVA

17. Mwanda waka tukōkelanga Yehova?

17 Potukōkela Yehova, tulombolanga’mba Satana i mbepai. I bika biketukwasha tukōkele? Bible unena’mba:  “Sanswa Yehova Leza obe na mutyima obe onso, ne muya obe onso, ne na bukomo bobe bonso.” (Kupituluka 6:5) Tukōkelanga Yehova mwanda tumusenswe. Shi tusanswe Yehova bininge, nabya tukalonga kyonso kyaetunena kulonga. Mutumibwa Yoano wālembele amba: “Mwanda buno namino bo buswe bwa Leza, amba tulame mbila yandi; kadi mbila yandi keilēmangapo.”​—1 Yoano 5:3.

18, 19. (a) I bintu’ka bimo bitulombwele Yehova amba i bibi? (b) Le tubayuka namani amba Yehova ketulombengapo bintu byoketubwanyapo kulonga?

18 Ino le i bintu’ka bimo bitulombwele Yehova amba i bibi? Bintu bimo bibi bidi mu kapango kanena’mba, “Shikwa Byobya Bishikilwe Yehova.” Ku ngalwilo, ukokeja padi kulanga’mba bintu bimo pa bino ke bibipo. Ino shi utange mavese a mu Bible ne kulangulukila’po bininge, ukevwanija tunangu tudi mu kukōkela bijila bya Yehova.  Kadi padi ukokeja kumona’mba kudi bintu byofwaninwe kushinta mu būmi bobe. Shi ushinte, nabya ukekala na ndoe ne nsangaji itamba ku kwikala mulunda wa pa mutyima wa Leza. (Isaya 48:17, 18) Le tubayuka namani amba muntu ubwanya kuleka bino bintu bibi?

19 Yehova ketulombengapo nansha dimo kulonga bintu byoketubwanyapo. (Kupituluka 30:11-14) Aye i Mulunda wa bine, wituyukile senene kupita ne motwiyukile batwe bene. Uyukile bukomo bwetu ne bukōkekōke bwetu. (Ñimbo ya Mitōto 103:14) Mutumibwa Polo witukankamika’mba: “Leza i wa binebine, kakemulekapo mutompibwe kupita pa byomubwanya kutyumwina mu manwi, ino shi ditompo dibafika ukemushitwila dishinda dya kutambila’ko amba mubwanye kūminina ditompo’dya.” (1 Kodinda 10:13) Tukulupilei amba Yehova uketupa nyeke bukomo bwa kulonga kyokya kyoloke. Ukakupa “bukomo butabukile bwikalanga na bantu”  bukukwashe ūminine bikoleja bikomo. (2 Kodinda 4:7) Polo, pa kupwa kūminina bikoleja na bukwashi bwa Yehova, wānenene amba: “Mu byonsololo ngidi na bukomo kupityila kudi yewa unkomeja.”​—Fidipai 4:13.

WIFUNDE KUSANSWA BYOBYA BISENSWE LEZA

20. I ngikadila’ka yofwaninwe kwiula, ne mwanda waka?

20 Shi tusaka kwikala balunda na Yehova, tufwaninwe kuleka kulonga kyonso kitulombola Yehova amba i kibi. Ino kukidi mwanda mukwabo. (Loma 12:9) Balunda na Leza basenswe byobya byasenswe. I batelwe mu Ñimbo ya Mitōto 15:1-5. (Tanga.) Balunda na Yehova beulanga ngikadila yandi, kimfwa “buswe, nsangaji, ndoe, kitūkijetyima, kanye, buyampe, lwitabijo, kutalala, kwīfula.”​—Ngalatea 5:22, 23.

21. Le ukamwekeja namani ngikadila isenswe Leza?

21 Le ukamwekeja namani ino ngikadila milumbuluke? Ufwaninwe kuyuka byobya byonso bisenswe Yehova na kutanga ne kwifunda Bible kitatyi ne kitatyi. (Isaya 30:20, 21) Poenda wifunda, ukasanswa Yehova bininge, kadi shi umusanswe bininge, ukekala na mutyima wa kumukōkela.

22. I bika byokamona shi ukōkele Yehova?

22 Kushinta kobwanya kushinta mu būmi bobe kubwanya kudingakanibwa na kuvūla kisandi kya kala ne kuvwala kipya. Bible unena’mba ufwaninwe kuvūla “bumuntu bwa kala” ne kuvwala “bumuntu bupya.” (Kolose 3:9, 10) Shi tushinte ne kukōkela Yehova, nansha byokebipēlapo, tukamona “mpalo mikatampe” yaetulaile. (Ñimbo ya Mitōto 19:11) Bine, tonga kukōkela Yehova ne kulombola’mba Satana i mbepai. Ingidila Yehova, ke pa mwandapo wa mpalo ya kumeso, ino i pa mwanda wa buswe bwampikwa kwisakila. Nabya ukekala mulunda wa bine wa Leza!

^ mus. 16 Kino kekilombolapo amba Satana ye utononanga bantu bakukankaje kwifunda Bible. Inoko Satana i “leza wa ino ngikadilo ya bintu,” kadi “ntanda yonsololo idi mu lupusa” lwandi. Nanshi ke kya kutulumukapo shi bantu bakukankaja kwingidila Yehova.​—2 Kodinda 4:4; 1 Yoano 5:19.