Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Mukanda Utamba ku Kitango Kyendeji

Mukanda Utamba ku Kitango Kyendeji

Mwanetu muswe mu lwitabijo:

Enka moyukile kala, Bible i dibuku disambila pa bantu bavule. Disambila pa bana-balume ne bana-bakaji bavule ba lwitabijo bādi na bikoleja pamo na byetu. I bantu “pamo’nka bwa batwe.” (Yakoba 5:17) Bamo bādi batyibidilwe na makambakano ne kuzumbija mutyima. Bakwabo bebāsanshije kudi ba mu kisaka nansha batōtyi nabo. Bangi nabo batapwe na kwitopeka pangala pa bilubo byabo.

Lelo bano bantu bālekele Yehova lonso? Aa. Bavule badi pamo bwa mulembi wa mitōto wālombele amba: “Nalubile pamo bwa mukōko wajimine; kimba umpika obe, ke-ne-muntu ami nkivulaminwepo misoñanya yobe.” (Ñimbo 119:176) Le nobe wiivwananga uno muswelo?

Yehova kelwangapo nansha dimo batōtyi bandi balubile kujokela ku kipombo mpika. Ino wibakimbanga—divule kupityila ku banababo mu lwitabijo. Tala kimfwa kya mwākwashishe Yehova mwingidi wandi Yoba, wāmwene malwa mavule—kujimija bituntwa; kufwilwa bana, ne luba lusansa. Kadi Yoba wāūminine ne binenwa bitapa bya boba bādi bafwaninwe kumukankamika. Ino kāvundaminepo Yehova, nansha kuluba bityetye mu milangwe yandi. (Yoba 1:22; 2:10) Lelo Yehova wākweshe Yoba namani alame bujalale?

Muswelo umo Yehova waākweshe Yoba i kupityila kudi Edihu mutōtyi nandi. Yoba paādi ulombola andi makambakano, Edihu wātejeje kupwa nandi wamutentulula. Namani? Le wāfutulwile Yoba nansha kumusanshija mutyima na kumutopeka ne kumufwija bumvu? Le Edihu wēmwekeje bu muntu utabukile Yoba? Mhm, nansha dimo! Edihu wāludikilwe na mushipiditu, wanena’mba: “Ami ngidi pamo’nka bwa abe kudi Leza; ami nami nabumbilwe mu dilongo pamo’nka bwa abe.” Kupwa wāmukulupija’mba: “Nzuba yami keikakulengejapo moyo, nansha bulēmi bwami kulemēnena podi mpika.” (Yoba 33:6, 7) Pa kyaba kya kubweja Yoba kiselwa, Edihu wāmudingile na buswe ne kumukankamika mobyendele.

Shi ke pano, yuka’mba i na ino milangwe yotuteakenye nayo uno boloshile. Dibajinji twatejeje ne kubandaula na katentekeji ngikadilo ne myanda ifikijanga bavule ku kupaluka. (Nkindi 18:13) Ebiya twanyemena ku Bisonekwa, koku tulombela ne kutala nsekununi ya mwākwashishe Yehova bengidi bandi ba pa kala pobādi mu ngikadilo na yodi’mo. Ku mfulo, twakongakenya pamo ino nsekununi ya mu Bisonekwa pamo na myanda ikutana dyalelo mwanda wa kulupula uno boloshile. Tukwita na nsangaji ubandaule ino myanda yonso. Bine, kulupila amba tukusenswe bininge.

Kitango Kyendeji kya Batumoni ba Yehova