Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIPINDI KYA BUBIDI

Kuzumbija Mutyima—“Tutyinibwanga Bininge mu Miswelo Yonso”

Kuzumbija Mutyima—“Tutyinibwanga Bininge mu Miswelo Yonso”

“Ami ne wami mulume twelubwile pa kupwa kwa myaka 25 mu busongi. Betu bana baleka bubine. Kadi nabelele misongo mikomo mivule. Penepa nalēmenenwa na njia. Naivwana mu bidyoma monso mwauntyumuka ne kya kulonga kine kyaumpumba. Naleka’byo kwenda ku kupwila, ne kusapula kwine.”—June.

KUZUMBIJA MUTYIMA kufikilanga bantu bonso—enka ne bengidi ba Leza bene. Kaimba wa mitōto wāsonekele amba: “Nādi na malanga-tyima mavule.” (Ñimbo 94:19, Dibuku Dijila) Yesu nandi wānene amba kitatyi kya ku mfulo, “makambakano a mu būmi” akakoleja bininge pa kwingidila Yehova. (Luka 21:34) Le abe nobe? Lelo ulēmenenwe na makambakano atala misokwe, kisaka, nansha misongo? Lelo Yehova ubwanya kukukwasha namani ulwe nao?

“Bukomo Butabukile Bwikalanga na Bantu”

Batwe bene ketubwanyapo kukomena kuzumbija mutyima. Mutumibwa Polo wāsonekele amba: “Tutyinibwanga bininge mu miswelo yonso . . . ; tukolelwanga, . . . ; tushindwanga panshi.” Ino kadi wābwejeje’ko amba “ino kutyintyidilwa mpika byotukomenwa kujina,” “kubudidilwa dishinda dya kutambila’ko mpika” ne “konakanibwa mpika.” Le i bika bitukwashanga tunekenye? I “bukomo butabukile bwikalanga na bantu”—bwine butamba kudi Yehova Leza wetu, mwine bukomo bonso.—2 Kodinda 4:7-9.

Langa mowadi utambwila pa kala “bukomo butabukile bwikalanga na bantu.” Lelo ukivulukile dishikulu dikankamika dyakukweshe ufwije’ko Yehova pa buswe bwandi bwa binebine? Lelo lukulupilo lobe mu milao ya Yehova kelwadipo lukomena’ko powadi ufundija bakwenu myanda itala Paladisa? Kitatyi kyotutanwa ku kupwila kwa bwine Kidishitu ne kusapwila bakwetu nkulupilo yetu, tumonanga bukomo bwa kunekenya kuzumbija mutyima kwa umbūmi ne kumona ndoe ya mutyima itukwasha twingidile Yehova na nsangaji.

“Tompai Mumone’mba Yehova I Muyampe”

Na bubine, padi wimonanga na abe udi pa mansanka. Kimfwa, Yehova witulomba tutūle Bulopwe pa kifuko kibajinji ne kulama bibidiji byetu bya mingilo ya ku mushipiditu. (Mateo 6:33; Luka 13:24) Ino, le bikekala namani shi kulondwalondwa, misongo, nansha makambano a kisaka akupungija ku ngitu? Nansha shi twaji tobe tukudya kitatyi ne bukomo bwa kwingila mingilo ya pa kipwilo? Pa kutyibidilwa na bya kulonga bivule—ino kakitatyi ne bukomo bwa kwibilonga butyetye—ubwanya kwimona bu mulēmenenwe. Pakwabo ubwanya kwiipangula shi Yehova ukulombanga kulonga bivule.

Yehova uyukile byonso’byo. Ketulombangapo bivule kutabuka byotukokeja kulonga. Kadi uyukile amba bitulomba kitatyi pa kusaka twialuje ku njia ya ku ngitu ne ya mu malango.—Ñimbo 103:13, 14.

Kimfwa, tala Yehova mwaākwatakeninye mupolofeto Ediya. Patyumukilwe Ediya mutyima ne kukwatwa moyo kanyemena mu ntanda mutuputupu, lelo Yehova wātopekele uno mupolofeto ne kumusoñanya ajokele mu mwingilo wandi? Mhm. Misunsa ibidi mituntulu, Yehova wātumine mwikeulu  alangule Ediya bityebitye ne kumupa bidibwa adye. Nansha nabya, papityile mafuku 40 matuntulu, ino Ediya wadi ukidi na moyo ne kuzumbija mutyima. Le i bika bikwabo byālongele Yehova mwanda wa kumukwasha? Dibajinji, Yehova wālombwele amba ukamukinga. Dya bubidi, Yehova wāsengele Ediya na “diwi dya misongwe senene.” Mfulo mfulō, Yehova wāmulombola amba kukidi bantu bakwabo tununu batōta Leza na kikōkeji. Na pano kala, Ediya kaingila monka bu mupolofeto mupyasakane. (1 Balopwe 19:1-19) I ñeni’ka yotuboila’ko? Ediya pa kulēmenenwa na kuzumbija mutyima, Yehova wāmutūkijije mutyima ne kumufwila lusa. Yehova kalamukilepo. Witutele mutyima mu muswelo umo onka.

Kitatyi kyolangulukila pa byokokeja kupa Yehova, ikala na bujalale. Leka kudingakanya byobwanya kulonga dyalelo na byowadi uloñanga pa kala. Tulete kimfwa: Muntu unyemanga lubilo, ino kakiibidijangapo pano ke myeji nansha myaka mivule, kabwanyapo kunyema kala na mwaadi unyemena mafuku kunyuma. Ino ushilulanga bidi kwitungila bitungo bīpibīpi bya kumujokejeja bukomo ne kūminina. Bene Kidishitu nabo badi’nka bwa bantu banyema lubilo. Beibidijanga na kitungo kipotoloke mu ñeni. (1 Kodinda 9:24-27) Le ubulwe’po kwitungila kitungo kimo kya ku mushipiditu kyobwanya kufikila’po bukidibukidi? Kimfwa, ubwanya kwitungila kitungo kya kutanwa ku kupwila. Lomba Yehova akukwashe ufikile pa kino kitungo. Poenda ujokeja bukomo bwa ku mushipiditu, ‘ukatompa ne kumona’mba Yehova i muyampe.’ (Ñimbo 34:8) Vuluka’mba kakintu ko-konso kolonga mwanda wa kulombola amba usenswe Yehova—nansha katyepele namani—kadi na mvubu kwadi.—Luka 21:1-4.

Yehova ketulombangapo bivule kutabuka byotukokeja kulonga

“Bukwashi Bonadi Ntengele”

Le Yehova wakweshe June namani ajokele kwadi? Witulombola’mba: “Nadi nomba’nka kulomba Yehova ankwashe. Ebiya mukaja wami mwana waunombola amba kusa kulongwa kitango mu kyetu kibundi. Nakwata butyibi bwa kukatanwa’ko difuku dimo. Bine, nasangele mpata pa kujokela mu bantu ba Yehova! Kino kitango bo bukwashi bonadi ntengele. Pano ñingidilanga Yehova monka na nsangaji. Būmi pano bubangikadila monka na kitungo. Kutabukidila nayuka amba ke biyampepo kwitolwela pafula nansha kupela bukwashi. Mfwija’ko mwanda kitatyi kya kujoka kyadi kinkishadile’ko.”