“Kaji kami kalumbulwile būmi bwa ku ngitu bwa kisaka kyetu, inoko kaumfikije mu kulonga bintu byampikwa kufwaninwa. Nashilwile kufeta mafetyi, kwiela mu myanda ya politike, ne kutanwa ku bipwilo. Naleka’byo kwikala Kamoni wa Yehova mu bula bwa myaka 40. Myaka yenda ivula, namona amba Yehova kakokeja kumfwila lusa. Kadi naikala kwitopeka bininge ami mwine. Shako nadi ndyukile bubine kumeso kwa kuponena mu dishinda dibi.”—Martha.

KWITOPEKA i kiselwa kilēma. Mulopwe Davida wāsonekele amba: “Bubi bwami buntabukile mutwe; bwa kiselwa kilema buntabuke pa bukomo bwami.” (Ñimbo 38:4) Bene Kidishitu bamo i batyibidilwe na bulanda, balanga’mba Yehova kabwanyapo nansha dimo kwibalekela. (2 Kodinda 2:7) Le uno mulangilo i moloke? Nansha shi ulongele bubi bukatampe, le udi kulampe kutunya Yehova kukulekela? Mhm, ke amopo!

“Iyai Twimuke Pamo”

Yehova kelangapo babipya-mambo besāsa. Na bubine, aye ufikanga kobadi! Mu lukindi lwa mwana wa kisūpa, Yesu wādingakenye Yehova na shabana wa buswe wadi na mwana washile kisaka kakalondalonda būmi bwa bya bulongelonge. Mwenda mafuku, mwana wakwata butyibi bwa kujoka. “Aye [mwana] ukidi dya kulampe mwishinda, shandi wamumona, wamukwatyilwa lusa, ebiya wanyema lubilo wakamupamba bīpa na nsangaji, kamufifye senene.” (Luka 15:11-20) Le udi na mutyima wa kufwena kudi Yehova ino wimona bu ukidi nandi “dya kulampe mwishinda”? Pamo bwa shabana wa mu kyelekejo kya Yesu, Yehova udi na mutyima wa kukufwila lusa. Udi na mēlu a kukutambula.

Ino bikekala namani shi umona’mba Yehova kakokejapo kukulekela mwanda bubi bobe ke bwende muongo pa ntanda ne kebudi mulwi bā? Ivwana bidi lwito lwa Yehova lusonekelwe mu Isaya 1:18, amba: “Iyai twimuke pamo, e mwanenena Yehova amba: Nansha byabubi byenu bidi’nka bwa bityididila pya, bikatōka to-o bwa mpemba.” I amo, nansha shi bubi bumweka bu dikeme dityila pyā pa kisandi kitōka tō, Yehova kakakomenwapo kufwila lusa.

Yehova kasakilepo wendelele na kususuka na mutyima wa mundamunda ukutopeka. Penepa ukatūkija namani mutyima amba Yehova waumfwila lusa ne kwikala na mutyima wa mundamunda utōka? Tala matabula abidi ātabwile Mulopwe Davida. Dibajinji, wānene amba: “Nasabe kujilula kwami kudi Yehova.” (Ñimbo 32:5) Vuluka’mba Yehova ke mupwe kala kukwita ufwene kwadi mu milombelo ne “kwimuka pamo” nandi. Itabija luno lwito. Saba bubi bobe kudi Yehova, ne kumupungulwila mutyima obe. Davida, kupityila ku byāmutene, wālombele na kikulupiji amba: “Untōkeje ku bupya-mambo bwami. . . . Mutyima mutyumuke munekenibwe, abe Leza, kukafutulula’opo, mhm.”—Ñimbo 51:2, 17.

Dya bubidi, Davida wātambwile bukwashi bwa ntunguluji utongelwe na Leza, ke mupolofeto Natana kadi. (2 Samwele 12:13) Dyalelo, Yehova i mutūle’ko bakulumpe mu kipwilo bafundile mwa kukwashisha babipya-mambo besāsa baluje monka  kipwano kyabo na Yehova. Pokafwena bano bakulumpe, bakakutangila Bisonekwa ne kulombela milombelo itamba ku mutyima ikatalaja, ikatyepeja, pakwabo ne kutalula milangwe mibi, ne kukubelula ku mushipiditu.—Yakoba 5:14-16.

Yehova ukusakila nobe uloelelwe mutyima wa mundamunda utōka

“Katōkwe Kandi, Shandi! Yewa Walekelwa ku Kujilula Kwandi”

Eyo, padi ubwanya kulanga’mba kusaba bubi bobe kudi Yehova ne kufwena bakulumpe i bintu bikomo kulonga. E mwēivwanine ne Davida. Kyaba kimo wāikele “kuba nyaa” pa bubi bwandi. (Ñimbo 32:3, Bisonekwa Bitokele) Inoko mwenda mafuku wāfwijije’ko pa byabuyabuya byālupukile ku kusaba bubi bwandi ne ku kwilemununa mu lwendo lwandi.

Kikatampe kyemwenine Davida i kwaluja nsangaji. Wāsonekele amba: “Ē! keye wa katōkwe kandi, shandi! yewa walekelwa ku kujilula kwandi, ne bupya-mambo bwandi bubajimankanibwa.” (Ñimbo 32:1) Wālombela’mba: “A Mfumwami, mumunune milomo yami, kadi kyakanwa kyami kikalombolanga lutendelo lobe.” (Ñimbo 51:15) Davida pa kunyongololwa ku kwitopeka ne pa kufwija’ko pa lulekelo lwa Leza, wāikele na mutyima wa kusapwila bakwabo myanda ya Yehova.

Yehova ukusakila nobe uloelelwe mutyima wa mundamunda utōka. Kadi usaka usapwile bakwenu myanda yandi ne mpango yandi, ke na mutyimapo wa kwitopeka, ino i na mutyima tō ne na nsangaji mikatampe. (Ñimbo 65:1-4) Vuluka lwito lwandi lwa’mba “bubi bwenu bujimankanibwe, amba bitatyi bya kutūja bitambe kudi Yehova mwine.”—Bilongwa 3:19.

Kino e kyafikile Martha. Usekununa’mba: “Mwana wami wadi untumina’nka kuntumina Kiteba kya Mulami ne Réveillez-vous ! Bityebitye naibidila monka Yehova. Kintu kyonadi nkomenwa kulonga pa kujoka i kulomba lusa pa bubi bonso bonalongele. Ino mfulo mfulō nafwena kudi Yehova mu milombelo, ne kumulomba andekele. I bikomo kwitabija’mba pa kupwa kwa myaka 40 najokele kudi Yehova. Ami ne kimfwa kimwekelele kilombola’mba nansha pabapite myaka kapwila, muntu ubwanya kumona ponka mukenga wa kwingidila Leza ne kwilama monka mu buswe bwandi.”