Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 26

Leza wa “Mutyima wa Lubilo wa Kulekela”

Leza wa “Mutyima wa Lubilo wa Kulekela”

1-3. (a) I kiselwa’ka kilēma kyāselele Davida, mulembi wa mitōto, ne i muswelo’ka waāsengelwe ku mutyima wandi muvutakane? (b) Shi tubalonga bubi, i kiselwa’ka kyotubwanya kusela, ino i bika bitukulupija Yehova?

DAVIDA, mulembi wa mitōto, wāsonekele amba: “Bubi bwami buntabukile mutwe; bwa kiselwa kilema buntabuke pa bukomo bwami.” (Mitōto 38:4, 8) Davida wādi uyukile mulēmenanga kiselwa kya mutyima wa mundamunda witopeka. Inoko wāsengelwe pa mutyima wādi muvutakane. Wāivwanije amba nansha Yehova byashikilwe bubi, ino Kashikilwepo kipya-mambo shi wesāsa bya binebine ne kuleka bilongwa byandi bibi. Davida wānenene na lwitabijo lonso pa mutyima wa Yehova wa kufwila lusa muntu wisāsa amba: “Abe, Mfumwami . . . [udi] ne mutyima wa lubilo wa kulekela (myanda).”​—Mitōto 86:5.

2 Shi tubalonga bubi, netu tubwanya kwivwana bulēmi bwa mutyima wa mundamunda usansa. Ino milangwe ya kwitopeka i miyampe. Ibwanya kwitutonona tutabule matabula mayampe a kulemununa bilubo byetu. Inoko, i bibi kwitopeka bipitepite. Kwitopeka bipitepite kubwanya kwitulengeja tumone amba Yehova kaketulekelapo nansha shi tubesāsa namani. Shi ‘tuminwe’ na kwitopeka, Satana ukatompa kwitutonona tutyumukwe mutyima, tulange amba Yehova witumwene bu ketudipo na mvubu, ketufwaninwepo kumwingidila.​—2 Kodinda 2:5-11.

3 Le Yehova witumwene uno muswelo? Nansha dimo! Lulekelo i kipindi kya buswe bukatampe bwa Yehova. Witukulupija mu Kinenwa kyandi amba shi twisāse bya binebine, witabije kwitulekela. (Nkindi 28:13) Pa kusaka tuyuke amba Yehova udi na mutyima wa kwitulekela, tubandaulei mwanda waka witulekelanga ne muswelo’ka.

 Kikadile Yehova na “Mutyima wa Lubilo wa Kulekela”

4. Le Yehova uvulukanga bika pa motupangilwe, ne kino kidi na lupusa’ka pa muswelo wadi netu?

4 Yehova uyukile biyampe mikalo yetu. Mitōto 103:14 unena’mba, “Uyūkile motubumbilwe, kedilwepo amba twi biloba.” (DD) Kedilwepo amba twi bapangwe ku luvumbi, ba bukōkekōke, kadi bazoze, bampikwa kubwaninina. Bishima bya’mba uyukile “motubumbilwe” bituvuluja’mba Bible udingakanya Yehova bu umbumbi, batwe netu bu dilongo dyabumba. * (Yelemia 18:2-6) Umbumbi Mukatampe wikalanga netu mungya bukōkekōke bwa kipangila kyetu kya bubi ne muswelo otwitaba ku bwendeji bwandi ne muswelo otupela’bo.

5. Le mukanda wa Loma utela namani mwikadile bukomo bwa bubi?

5 Yehova uyukile bukomo bwa bubi. Kinenwa kyandi kitela bubi bu bukomo bukatampe bushipile muntu bya lufu. Le bubi bwitushipile namani? Mu mukanda wa Polo ku bene Loma, unena’mba: Twi “babipya-mambo,” monka mwikadilanga basola munshi mwa mukulu wabo (Loma 3:9); bubi ‘bubikele’ bu mulopwe pa muzo wa muntu (Loma 5:21); “bwikele” motudi (Loma 7:17, 20); “kijila” kyabo kingilanga motudi nyeke, kisaka kuludika būmi bwetu. (Loma 7:23, 25) Bine, bubi bushipile ngitu yetu bya binebine!​—Loma 7:21, 24.

6, 7. (a) Le Yehova umwene namani boba bakimba lusa lwandi na mutyima wa kwisāsa? (b) Mwanda waka ketufwaninwepo kukwata ku nzeinzei lusa lwa Leza?

6 Nanshi, Yehova uyukile amba ketubwanyapo kumukōkela mu muswelo mubwaninine, nansha shi tulonge bukomo namani bwa kumukōkela. Witukulupija na buswe amba shi tukimbe lusa lwandi na mutyima wa kwisāsa, uketulekela.  Mitōto 51:17 unena’mba: “Bitapwa bīne bya Leza i mushipiditu mutyumuke; mutyima mutyumuke munekenibwe, abe Leza, kukafutulula’opo, mhm.” Yehova kakelapo nansha kuvundamina, “mutyima mutyumuke munekenibwe” na kiselwa kya kwitopeka.

7 Ino, le kino kishintulula amba tubwanya kukwata lusa lwa Leza ku nzeinzei, kumona kipangila kyetu kya bubi bu kabepelo ka kulongela bubi? Aa! Yehova kaludikwangapo’tu na kitumbuzaji. Lusa lwandi ludi na mikalo. Kakalekelapo nansha dimo boba bomija mutyima mu kulonga bubi ku kusaka, kwisāsa mpika. (Bahebelu 10:26) Ne kadi, shi wamone mutyima wa kwisāsa, wikalanga na mutyima wa lubilo wa kulekela. Nanshi tubandaulei muneneno umoumo wingidijibwe mu Bible ulombola kino kipindi kya kutendelwa kya buswe bwa Yehova.

Yehova Ulekelanga Lonso Muswelo’ka?

8. Le Yehova uloñanga bika shi walekela bubi bwetu, ne kino kitupa kikulupiji’ka?

8 Davida pa kwisāsa wānene amba: “Naitabije kudi abe mwanda wami, ne bubi bwami nabo nkyafīle’bopo; . . . kadi abe wandekele bubi bwa bupya-mambo bwami.” (Mitōto 32:5) Kishima “wandekele” i kitambe ku kishima kya Kihebelu kishintulula “kutalula” nansha “kusela.” I kingidijibwe mwanda wa kushintulula kufundula “kwitopeka, bubi, kujilula.” Nanshi Yehova wātalwile bubi bwa Davida ne kwibwela kulampe. Kino ye kino kyātyepeje kiselwa kya kwitopeka kyādi kiselele Davida. (Mitōto 32:3) Batwe netu tubwanya kukulupila Leza mwine ufundulanga bubi bwa boba bakimba lulekelo lwandi kupityila ku lwitabijo lwabo mu kitapwa kya kinkūlwa kya Yesu.​—Mateo 20:28.

9. Le Yehova utūlanga bubi bwetu kulampe namani?

9 Davida wāingidije muneneno mukwabo utenga mutyima pa kushintulula lulekelo lwa Yehova amba: “Monka mulepele  kutunduka na kushika, e monka mwatundulwila ne kujilula kwetu ko tudi.” (Mitōto 103:12) Le kutunduka i kulampe namani na kushika? Kutunduka i kulampe bininge na kushika; kadi kekuketanapo nansha dimo. Mwifundi umo wa Bible unena’mba uno muneneno ushintulula’mba “kulampe bininge; kulampe koketubwanyapo kufwatakanya.” Binenwa bya Davida bya ku bukomo bwa mushipiditu bitulombola’mba shi Yehova wetulekela, utūlanga bubi bwetu kulampe bininge na batwe byoketubwanyapo kufwatakanya.

“Byabubi byetu bikatōka to-o bwa mpemba”

10. Shi Yehova wetulekela bubi bwetu, mwanda waka ketufwaninwepo kulanga’mba tudi na dikeme dya buno bubi mu būmi bwetu bonso?

10 Lelo kashā kodi mutompe kutalula kadikeme ku kisandi kitōka? Padi nansha byowalongele bukomo bwa kwikatalula, kadikeme kashele’ko. Tala Yehova mwalombwela bukomo bwandi bwa kulekela bubi amba: “Nansha byabubi byenu bidi’nka bwa bityididila pya, bikatōka to-o bwa mpemba; nansha bikele bityila bikundakane, bikekala’nka bwa  butonge to-o.” (Isaya 1:18) Kishima “bityididila pya” kilombola musombelo utyila weñenya. * “Bikundakane” wādi musombelo mutyite bininge wa bintu bipente. (Nahumi 2:3) Ketubwanyapo nansha dimo kufundula dikeme dya bubi na bukomo bwetu. Inoko Yehova ubwanya kutalula bubi butyididila pya ne bukundakane ne kwibutōkeja pamo bwa mpemba nansha butonge bwampikwa kwina. Shi Yehova wetulekela bubi bwetu, ketufwaninwepo kulanga amba tudi na dikeme dya buno bubi mu būmi bwetu bonso.

11. Le Yehova welanga bubi bwetu kunyuma kwandi mu muswelo’ka?

11 Hezekia, mu lwimbo lwandi lwa kufwija’ko lwaābundile pa kupwa kupanda ku misongo imo yāswile kumupitula, wānenene Yehova amba: “Ubaela bubi bwami bonsololo kunyuma kobe.” (Isaya 38:17) Yehova i mutelwe bwa muntu ukwata bubi bwa nonga-bibi wisāsa webwela kunyuma Kwandi kwakabwanyapo kwibumona nansha kwibutala monka. Mungya dibuku dimo, uno mulangwe ubwanya kunenwa amba: “Ubaalamuna [bubi bwami] wita’mba kebwalongekelepo.” Mwene kino kitukomeja mu bidyoma?

12. Le mupolofeto Mika wālombwele namani amba shi Yehova walekela, utalulanga bubi bwetu lonso?

12 Mupolofeto Mika, mu mulao wandi wa kujokejibwa, wālombwele kikulupiji kyandi mudi Yehova amba ukalekela bantu bandi besāsa amba: “Lelo ani Leza wifwene abe, . . . ne kupita pa kijilula kwa basheleshele ba bupyani bwandi, a? . . . kabidi ukela bubi bwabo bonsololo mu mushike wa kalunga-kamema.” (Mika 7:18, 19) Langa’po bidi mwādi mushintulwila bino bishima ku bantu ba mu kitatyi kyāsonekelwe Bible. Le bādi babwanya kusokola kintu kyaelwa “mu mushike wa kalunga-kamema”? Nanshi binenwa bya Mika bilombola’mba shi Yehova walekela, utalulanga bubi bwetu lonso.

13. Le binenwa bya Yesu bya’mba, “Witulekele mapu etu” bishintulula bika?

 13 Yesu wāenzankenye kukwatañana kudi pa bukata bwa mwapudi ne mwapulwa mwanda wa kwelekeja lulekelo lwa Yehova. Yesu wētusoñenye tulombe amba: “witulekele mapu etu.” (Mateo 6:12) Nanshi Yesu wādingakanenye bubi na mapu. (Luka 11:4) Shi tubalonga bubi, twikalanga na “mapu” kwa Yehova. Pa mwanda utala nshintulwilo ya kyubwa kya Kingidiki kyalamwinwe bu “kulekela,” dibuku dimo dinena’mba: “Kupūta meso, kuleka mapu, kuleka kulandula’o.” Shi Yehova wetulekela, udi pamo bwa aye utalula mapu otwadi tufwaninwe kulandulwa. Babipya-mambo besāsa babwanya nanshi kusengibwa na bino. Bine, Yehova kakalandulapo mapu awitulekele!​—Mitōto 32:1, 2.

14. Le musemwa “bubi bwenu bujimankanibwe” wituvuluja bika?

14 Lulekelo lwa Yehova i lushintululwe ne mu Bilongwa 3:19 amba: “Nanshi, mwisāsei, kadi alamukai mwanda wa bubi bwenu bujimankanibwe.” Uno musemwa wa mfulo i mutambe ku kyubwa kya Kingidiki kibwanya kushintulula “kubula, . . . kutalula nansha konakanya.” Mungya befundi bamo ba Bible, muneneno wingidijibwe pano i wa kubula kintu kilembelwe ku makasa. Le bibwanika namani? Bwīno bwādi bwingidijibwa divule pa kala bwādi bwa kalabone, ne butomvi butyange na mema. Shi muntu ukipwa kwandika na buno bwīno, wādi ubwanya kuyata kisandi kibombe ne kubula byaalemba’bya. Kino i kyelekejo kilumbuluke kya lusa lwa Yehova. Shi wetulekela bubi bwetu, udi pamo bwa aye wasela kisandi, wabula’bo.

Yehova usakanga tuyuke amba udi na “mutyima wa lubilo wa kulekela”

15. Le Yehova usaka tuyuke bika bimutala?

15 Shi tulangulukile pa bino byelekejo bishileshile, mwene i kimweke patōka’mba Yehova usakanga tuyuke amba udi na mutyima wa lubilo wa kulekela bubi bwetu shi twisāse bya binebine? Ketufwaninwe kukwatwa moyo amba uketutopeka pa buno bubi mu mafuku a kumeso. Kino i kilombolwe na kintu kikwabo kitusokwela Bible pa lusa lukatampe lwa Yehova: Shi wetulekela, wilwanga’ko.

 “Bubi Bwabo Ami Nkikavuluka’bopo Nyeke”

16, 17. Panena Bible amba Yehova wilwanga bubi bwetu, le kino kishintulula bika, mwanda waka ubalondolola nankyo?

16 Yehova wālaile pa mwanda utala boba badi mu kipwano kipya amba: “Nkalekēla bukondame bwabo, ne bubi bwabo ami nkikavuluka’bopo nyeke, ne nyeke nansha patyetye.” (Yelemia 31:34) Le kino kishintulula amba shi Yehova wetulekela kabwanyapo kuvuluka bubi monka? Ke amopo. Bible witusapwila bubi bwa bantu bavule bālekelwe na Yehova, kubadila’mo ne Davida. (2 Samwele 11:1-17; 12:13) Yehova uyukile biyampe bilubo byobālongele. Myanda ya bubi bwabo, enka ne kwisāsa kwabo ne kulekela kwebālekele Leza, i milamwe mwanda wa kamweno ketu. (Loma 15:4) Penepo, le Bible usaka  kunena bika panena’mba Yehova ‘kavulukangapo’ bubi bwa boba besāsa?

17 Kyubwa kya Kihebelu kyalamwinwe amba “nkikavuluka’bopo” kishintulula bivule, ke’nkapo kuvuluka bya pa kala. Dibuku dimo (Theological Wordbook of the Old Testament) dinena’mba i ne “kulonga’po kintu kifwaninwe.” Nanshi mu buno buluji, ‘kuvuluka’ bubi i kulonga kintu ku babipya-mambo. (Hosea 9:9) Ino shi Leza wanena’mba “bubi bwabo ami nkikavuluka’bopo nyeke, ne nyeke nansha patyetye,” witukulupija’mba shi walekela babipya-mambo besāsa, kakebalongapo kintu mwenda mafuku pa mwanda wa bubi’bwa. (Ezekyele 18:21, 22) Nanshi Yehova wilwanga mu buluji bwa’mba kavulukangapo bubi bwetu kyaba ne kyaba mwanda wa kwituponeja nansha kwitupa mfuto misunsa na misunsa. Mwene kino kitusenga’po kashā pa kuyuka’mba Leza witulekelanga ne kwilwa bubi bwetu?

Le Bipa Bikalupuka’ko Nabyo le?

18. Mwanda waka kulekelwa kekushintululapo amba kipya-mambo wesāsa’wa kakafikilwapo na bipa bitamba ku bilongwa byandi bibi?

18 Le mutyima wa Yehova wa lubilo lwa kulekela ushintulula’mba kipya-mambo wisāsa kakatanwapo na bipa byonso bikalupuka ku bilongwa byandi bibi? Aa. Ketubwanyapo kulonga bubi pampikwa kumona bipa bilula. Polo waāndikile amba: “Kyokya kikuna muntu shi kika shi kika, e kyonka kyakangula.” (Ngalatea 6:7) Tubwanya kutanwa na bipa kampanda bilupuka ku bilongwa byetu. Kino kekishintululapo amba shi Yehova wapu kwitulekela ulengejanga bintu bibi bitufikile. Shi makambakano abalupuka, mwine Kidishitu kafwaninwepo kulanga’mba, ‘Padi Yehova waumpe mfuto pa mwanda wa bubi bwami bwa pa kala.’ (Yakoba 1:13) Ku mutamba mukwabo, Yehova ketukiñangapo ku bintu byonso bilupuka ku bilongwa byetu bibi. Kimfwa, dilubu, dīmi dya kubulwa kusaka, misongo isambuka ku bulādi, kujimija kikulupiji ne bulēme​—byonso bino bibwanya kwikala bipa bikomo kwepuka kadi bileta bulanda bitamba ku bubi. Vuluka’mba Yehova pa kupwa  kulekela Davida bubi bwandi na Bafesheba ne Udia, kāmukingilepo ku kinzengele kyalondele’po.​—2 Samwele 12:9-12.

19-21. (a) Le muntu wibile ne wibilwe bādi bamwena namani mu kijila kilembelwe mu Levi 6:1-7? (b) Shi twasanshije bantu na bubi bwetu, Yehova ukasangala shi tubalonga’po bika?

19 Bubi bwetu bubwanya kulupula bipa bikwabo bibi, nakampata shi kudi botusanshije na bilongwa byetu. Tala kimfwa, nsekununi idi mu Levi shapita 6. Bijila bya Mosesa binenena pa ngikadilo ibwanya muntu kulonga bubi bukatampe na kuyata bintu bya mwine Isalela mukwabo ku bwivi, ku manyengenyenge, nansha ku budyumuku. Penepa kipya-mambo watune bubi bwandi, wasomonwa enka ne kutyipa bya bubela. Wātyipila mwine walubile’wa. Ino kupwa, mutyima wandi wa mundamunda ubamutopeka, wakesāsa bubi bwandi. Pa kusaka Leza amulekele, wādi ufwaninwe kulonga bintu bisatu: kujokeja kyokya kyaāselele, kufuta muntu wāibilwe bintu 20 pa katwa mungya bulēme bwa bintu byaibilwe, ne kuleta mukōko mulume bu kyamulambu kya bubi. Kupwa kijila kinena’mba: “Mupidishitu ukamulongela kipwanyo ku meso a Yehova, kadi ukalekelwa.”​—Levi 6:1-7.

20 Kino kijila i mpangiko ya lusa yātūdile’ko Leza. Yewa wibilwe wādi umwena’mo, bādi bamujokejeja bintu byandi, kadi mutyima ye uno wādi umutūka pa kumona yewa wibile witabija bubi bwandi. Kadi, ne yewa wādi na mutyima wa mundamunda umutopeka, wamutonona etabije bubi bwandi ne kupwa mwanda, nandi wādi umwena’mo. Ino shi wapele kulonga namino, Leza kādipo wa kumulekela.

21 Nansha byoketudipo munshi mwa Bijila bya Mosesa, kino Kijila kitukwasha tujingulule milangwe ya Yehova ne mwamwena lulekelo. (Kolose 2:13, 14) Shi twasanshije bantu bakwabo na bubi bwetu, Leza ukasangala shi tulonge byobya byotubwanya mwanda wa kupwija mwanda’wa. (Mateo 5:23, 24) Padi bilomba kwitabija amba twi balube, ne kulomba otusanshije etufwile lusa. Penepa tubwanya kulomba Yehova kupityila ku kitapwa kya Yesu ne kwikala na kikulupiji amba wetulekela.​—Bahebelu 10:21, 22.

22. Le lulekelo lwa Yehova lubwanya kwendela pamo na bika?

 22 Pamo bwa mbutwile wa buswe, Yehova ubwanya kwitulekela watentekela’po ne bulemununi. (Nkindi 3:11, 12) Mwine Kidishitu wisāsa ubwanya padi kujimija madyese andi a bu mukulumpe, bu mwingidi wa mingilo, nansha a bu musapudi wa kitatyi kyonso. Kibwanya kumusansa pa kujimija mu kitatyi kampanda madyese aadi usenswe. Ino buno bulemununi kebushintululapo amba Yehova kamulekelepo. Tuvulukei amba bulemununi butamba kudi Yehova i kilomboji kya buswe bwaetusenswe. Shi twibwitabije ne kwibwingidija, nabya tukamwena’mo.​—Bahebelu 12:5-11.

23. Mwanda waka ketufwaninwe kunena’mba Yehova kaketufwilapo lusa, ne mwanda waka tufwaninwe kwiula lulekelo lwandi?

23 Bine, i kintu kisangaja’po kashā pa kuyuka amba Leza wetu udi na “mutyima wa lubilo wa kulekela”! Nansha shi tubalonga bubi, ketwakinenai amba Yehova kaketufwilapo lusa. Shi twisāse bya binebine, tubatabula matabula a kupwija mwanda’wa, ne kulomba na kininga kufwilwa lusa kupityila ku mashi āmwangile Yesu, tubwanya kukulupila na mutyima umo amba Yehova uketulekela. (1 Yoano 1:9) Nanshi twiulei lulekelo lwandi mu muswelo otwikele na bakwetu. Ne kadi, shi Yehova, aye kaloñangapo bubi, witulekelanga na buswe, le batwe bantu ba bubi ke pepi?

^ mus. 4 Kishima kya Kihebelu kyalamwinwe bu “motubumbilwe” i kingidijibwe ne mu mwanda utala dilongo dibumbwa na umbubi.​—Isaya 29:16.

^ mus. 10 Mwifundi umo wa Bible unena’mba bityididila pyā “wādi musombelo ulameta mbū. Nansha lumundu, nansha mvula, nansha wikifule, nansha kilonge myaka inga, uno musombelo keutalukangapo.”

[Kifwatulo pa paje 263]

“Byabubi byenu . . . bikatōka to-o bwa mpemba”

[Kifwatulo pa paje 266]

Yehova usakanga tuyuke amba udi na “mutyima wa lubilo wa kulekela”