Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIPINDI 9

Mutōtelo Wabine Ukakuletela Byabuyabuya Nyeke!

Mutōtelo Wabine Ukakuletela Byabuyabuya Nyeke!

1. Shi ‘tubafwena kudi Leza’ nandi ukalonga namani?

YEHOVA uswele boba bamwingidila. Shi utōte Yehova, ukakwesela pano ne mu mafuku a kumeso. Bible unena’mba: “Fwenai kudi Leza, nandi ukemufwena.”​—Yakoba 4:8.

2. Le tubwanya kufwena kudi Leza muswelo’ka, ne kilomba milombelo yetu ikale namani?

2 Shi usaka kufwena kudi Leza, wifunde Kinenwa kyandi, ulonde ne byokinena. Shi ulombela mwendele kiswa-mutyima kya Yehova, nandi ukevwana milombelo yobe ne kulondolola’yo. Yoano, mutumibwa mwine Kidishitu, wālembele amba: “Buno namino bo bukankamane bo tudi nabo mudi aye, twa’mba wivwane tulombe kintu, shi kika, shi kika, monka muswidile mutyima wandi, nankyo witwivwana. Kadi shi tuyūkile’mba, witwivwananga ne byonso byo tulomba, nankyo tubayūka’mba ke tudi kala nabyo byakulomba byo twamulombele.”​—1 Yoano 5:14, 15.

3-7. Tukokeja kulonga namani tumone tunangu twa kwa Leza, ne ato tuno tukokeja kwitukwasha muswelo’ka?

3 Ne kadi, shi ufwene kudi Leza, ukakupa tunangu twa kuyuka mwa kupwijija bikambija bya mu būmi bwa bukile bukya. Bible unena’mba: “Shi kudi ubudilwe tunangu umbukata mwenu, nabya nandi alombe’to nyeke kudi Leza.”​—Yakoba 1:5MB.

4 Tunangu twa kwa Leza tukokeja kukukwasha namani? Eyo, tukokeja kukuyukija bintu bifityija Yehova mutyima. Wayuka ne kibipīle bino bintu i kika ne muswelo wa kwepuka kulonga’byo. Buno buyuki bubwanya kukukinga ku makambakano avudile kumwesha bantu malwa. Kifwa, kukōkela madingi a Leza a kwikala batōka mu mwikadilo kukiñanga bantu ba Leza ku memi a kabukungu, ku misongo ipibwa ku buenda, ne ku masongi ashikatyilwa mfudilwa, nansha ku malubu.

5 Le i bintu’ka bikwabo bibwanya kukulongela tunangu twa kwa Leza? Eyo tubwanya kukwikadija na būmi bulumbuluke. Tukokeja kukupa ñeni ya kukwata milangwe mishikate mu bintu bivule, kifwa mu kukwatakanya lupeto. Ukashilula kulondalonda bitungo biyampe, waleka bitungo byambulwa mvubu ya endaenda.

6 Tunangu twa kwa Leza tukokeja kukupa ne ñeni ya kuyuka mwa kwikadila na bakwenu. Ukokeja kwikala na būmi bwa nsangaji mu kisaka. Ubwanya kusamba bulunda bwa endaenda, bwabine na bine na bakwenu, kadi wapebwa ne bulēme, nansha ke na boba kebengidila Leza bene.

7 Ne kadi, tunangu tobe twa kwa Leza tukalumbulula mumweno obe wa būmi. Tukakupa ñeni ya kuyuka kupwija makambakano ne bikoleja bya umbūmi. Washilula ne kumona būmi bwa kumeso mu muswelo mujalale, muyampe. Ebiya mumweno muyampe nao wakufukatyija mutyima munda ne kukulumbulwila bukomo bwa ngitu yobe.—Nkindi 14:30; Isaya 48:17.

8. Shi wingidile Leza, i bika byokukokejapo kutyina?

8 Kwingidila Leza wabine kukakupwa moyo wa kutyina byobya bivutakanyanga ñeni ya boba bapelanga kumwingidila.  Shi ubayuka amba bafwe badi mu bibundu ke bōmipo, kubapu, kekudipo kadi kyoakaminwa bafwile. Kekudipo kyotyinina lufu, mwanda ubatūla lukulupilo mu mulao wa Leza wa kukasangula bafwe. Ne kadi, kukityinapo bufwityi nansha bukinda, mwanda uyukile amba Leza wa bukomo bonso udi’ko.​—Yoano 8:32.

Boloke Pakapyananga Ntanda

9-11. I bāni bakekala mu Paladisa, ne i bāni kebakekala’mopo?

9 Shi ufwene kudi Leza, kukatyinapo bya kumeso. Bible wālaile makambakano mavule otumona dyalelo pano pa ntanda, monka motwadi tubamwena kala. Yehova witulombola amba bino byonso i bya lupito; Bulopwe bwa Leza busa panopano ponka kulongolola ino ntanda ke paladisa.​—Luka 21:10, 11, 31; 23:43.

10 Enka boba bafwena kudi Yehova kadi bamwingidila bo bakekala mu Paladisa. Bible unena amba kubashala’tu “kitatyi kityetye, ne mubi ukēkala kutupu’ye; eyo i binebine, ukafwatakanya biyampe pantu pandi, ukēkalanga kutupu’ye. Nanshi bakikōkeji bakapyananga ntanda; kadi bakēsangaja mu bungi bwa ndoe.”​—Mitōto 37:10, 11.

11 Boba bapela na mutyima mūmu kukōkela ku bijila byoloke bya Leza bakajimija būmi bwabo lonso. (2 Tesalonika 1:8, 9) Kebakekala’kopo dikwabo. Bakapitwilwa kumo na Satana ne bademona bandi mu lufu lwa nyeke. (Kusokwelwa 20:10, 14) Ino boba bafunda kuyuka Yehova kadi bamwingidila bakasepelela mu Paladisa pano pa ntanda.

Būmi bwa Kumeso bwa Kutendelwa!

12. Bible unena kika pa būmi bwa kumeso?

12 Yehova udi na bintu bilumbuluke byabikīle boba bamuswele! Ivwana munenena Kinenwa kyandi pa būmi bukekala na bantu pano pa ntanda:

  • Bungibungi bwa bidibwa: “Kukēkalanga bungibungi bwa mebele panopantanda peulu pa ngulu.”​—Mitōto 72:16.

  • Mobo mayampe: “Bakōbaka mobo ne kwikala monka.”​—Isaya 65:21.

  • Mingilo isepelelwa: “Batongwe bami bakalēpejeja biyampe mingilo ya makasa abo. Kebakengilapo bitupubitupu.”​—Isaya 65:22, 23.

  • Misongo kutupu: “Mwikadi kakanenapo’mba: Nabela.”​—Isaya 33:24.

  • Bulema kutupu: “Penepa kadi meso a bampofu akapūtulwa, ne matwi a babitwi akajikulwa. Ponkapo usunkuta ukatumbuka’nka bwa kasha kalume, ne ludimi lwa kamama lukembanga.”​—Isaya 35:5, 6.

  • Misongo, bulanda, lufu kutupu’byo: “Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”​—Kusokwelwa 21:4.

  • Mavita kutupu’o: “[Leza] watukija mavita ne ku mfulo ya ntanda.”​—Mitōto 46:9.

  • Būmi bwa nyeke: “Boloke bakapyananga ntanda, ne kwikala monka nyeke.”​—Mitōto 37:29.

13. I ani umo kete ukokeja kulongolola ino ntanda ke paladisa, ne mwanda waka aye ukokeja?

13 Bantu kebabwanyapo kutūla’ko bintu bya uno muswelo, ino Yehova udi na bukomo bwa kulonga byonso byanena. Kekudipo kimukala kulonga bintu byasaka kulonga. Bible unena’mba: “Kwa Leza kutupu kyakumukolela.”​—Luka 1:37.

14. Lelo ukokeja namani kusokola dishinda ditwala ku būmi bwa nyeke?

14 Yehova, kupityila ku Batumoni bandi, i mupe bantu ba pi na pi mukenga wa kutwelela pa “kakibelo katyetye” mwa kwendela mu dishinda ditwala ku būmi bwa nyeke. Tubakusakila nobe ubadilwe mu bantu ba nsangaji betabija luno lwito. Londa mutōtelo wabine, Yehova ukakwesela dyese nyeke ne nyekeke!​—Mateo 7:13, 14.