Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIPINDI 1

Lelo Mitōtelo Yonso Ifundijanga Bubinebine?

Lelo Mitōtelo Yonso Ifundijanga Bubinebine?

1. I mitōtelo’ka imoimo ilondwa mu Afrika?

KUBWIPI kwa bantu bonso mu Afrika bayukile amba kutōta Leza kudi na mvubu. Ino kebamutōtangapo muswelo umo. Bamo bamutōtela mu moshiké, bakwabo benda ku bakishi. Bakwabo nabo bakongwila mu bipwilo. Ino kulanga amba mu Afrika mudi’nka mitōtelo isatu i kwidimba. Mu Bamizilma, mudi bijila ne nkulupilo mishileshile. Mitōtelo ya kishi nayo i mishalañane bininge mungya bifuko. Mu bipwilo bītela bu bya bwine Kidishitu mo mwine muvudile kwiketaketa. Kutentekela pa bipwilo bikatampe, kudi kadi tupwilopwilo tununu ne tununu tutōtela pato mu Afrika.

Mutōtelo Wetu Ufwaninwe Kwimanina pa Bubinebine

2. (a) I bika bifikijanga bantu ku kulonda mutōtelo kampanda? (b) Le i bintu’ka kebilombolapo amba mutōtelo wetu usangajanga Leza?

2 Mwanda waka bantu ne bantu batōtanga mobasakila? Bantu bavule balondanga mutōtelo wa babo bambutwile. Ne bimbidikita bya pa kala nabyo’nka byāshile nkoka mu mitōtelo ilonda bantu dyalelo. Dibuku Bene Afrika​—Bupyani Bumo Pasatu (Angele) dinena’mba: “Kiislamu kyāsambakene kungala kwa Sahara na kushindañana, . . . bwine Kidishitu bwāsambakana kunshi kwa Sahara muswelo umo onka. Shi kungala kwa Sahara Kiislamu kyāsambakene na kipete,  kunshi kwa Sahara bwine Kidishitu bwāsambakene’ko na buta.” Abo bavule umbukata mwetu bakulupile amba mutōtelo wetu usangajanga Leza. Ino ke kunenapo amba mutōtelo kampanda i wabine mwanda’po’tu o ulondanga betu bambutwile nansha amba o wāningilwe bankambo betu ba pa kala na umbikalo mweni kabidye.

3-5. I kifwa’ka kituyukija amba ke mitōtelo yonsopo ifundijanga bubinebine?

3 Mitōtelo yonso, nansha byoinena amba ipānanga buludiki bukulupilwa bwa kwingidila Leza, milangwe yayo i mishileshile. Ifundija bintu bivule bishile bya kuyuka Leza i ani ne byasaka kotudi i bika. Langa’po bidi: Ubamone kaji mu kompani mikatampe. Difuku dibajinji dya kaji, abakulombola amba kapita wa kaji i patupu’ye. Ebiya ubaipangula bengidi nobe basatu byofwaninwe kulonga. Mwingidi umbajinji wanena amba kapita usaka wikale wa kukomba mu njibo. Wa bubidi amba abe ufwaninwe kupenta njibo. Wa busatu nandi amba abe wi wa kwenda kwabanya mikanda.

4 Kupwa ubaipangula bengidi mwikadile kapita. Umbajinji amba kapita i mulampe, nsongwalume, wa nshikani. Wa bubidi amba i mwīpi, mununu, wa mutyima muyampe. Wa busatu nandi amba kapita ke mwana-mulumepo​—i mwana-mukaji. Dimodimo usa kunena amba bano bengidi basatu bonso kebanenangapo bubinebine. Shi usaka kulama kaji kowasokola, kukabulwepo kukimba kuyuka kapita mwine i ani ne ukusakila ulonge bika.

5 Ne mutōtelo nao mo monka. Kudi milangwe mivule itala padi Leza ne pa byasaka kotudi, o mwanda kitusakila kupotolola shi muswelo otutōta i mukwatañane na bubinebine. Ino i muswelo’ka otukayuka bubinebine butala padi Leza?