Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KAPANGO KA BUFUNDIJI 19B

Nsulo ya Mema Ibaikala Ke Munonga!

Nsulo ya Mema Ibaikala Ke Munonga!

Ezekyele ulonda nsulo ya mema ikuka itamba mu kipandulwe kya Yehova kadi mu kingelengele ibaikala ke munonga wa mema malampe mu kintu’tu kya makilometele abidi! Kufulakufula kwa munonga, Ezekyele wamone’ko mityi mivwambile ileta byakudya ne bundapi. Le bino byonso bishintulula bika?

Mityi Ileta Byakudya ne Bundapi

MU KITATYI KYA KALA: Bamisungi pobājokēle’tu mu yabo ntanda, madyese apungulukile pobadi mwanda bālungile kuboko ku kujokejibwa kwa butōtyi butōka ku tempelo

MU KINO KYETU KITATYI: Mu 1919 butōtyi butōka bwajokejibwe, bwashitula kibelo kya kukuka kwa madyese mavulevule a ku mushipiditu pa bengidi ba Leza ba kikōkeji

MU MAFUKU A KUMESO: Pa kupwa kwa Amakedona, madyese atamba kudi Yehova akakuka na kuleta byabuyabuya ku ngitu ne ku mushipiditu

Munonga Uleta Madyese

MU KITATYI KYA KALA: Yehova wāesele bininge bantu bandi ba kikōkeji, nansha byobāvudile’ko, wēbalengeje bekale na ntundubuko ya ku mushipiditu

MU KINO KYETU KITATYI: Mu ino paladisa ya ku mushipiditu mibaijibwe, kibalwa kya bantu kyenda kivudila’ko kimwenanga byabuyabuya mu kukuka kukatampe kwa madyese a Yehova a ku mushipiditu ne kujokela ku būmi ku mushipiditu

MU MAFUKU A KUMESO: Boba bakapanda pa Amakedona bakelunga pamo na bantu midiyo ne midiyo bakasangulwa, kadi madyese a Yehova akekala mavulevule pa bantu bonso

Mema Apāna Būmi

MU KITATYI KYA KALA: Ku mushipiditu, Yehova wādishishe bantu bandi ba kikōkeji mu ntanda yabo mijokejibwe; kadi wēbondapile misongo ya ku mushipiditu yobādi babela mu bula bwa kitatyi kilampe

MU KINO KYETU KITATYI: Byakudya bivulevule bya ku mushipiditu i bikwashe bantu bakome ku misongo mikatampe ya ku mushipiditu ne ku kufwa nzala kwa ntanda ya dyalelo

MU MAFUKU A KUMESO: Kidishitu ne ba 144 000 bakaludika nabo, bakakwasha bantu bonso ba kikōkeji bafikile ku bubwaninine ne kwikala na bukomo bwa ngitu buyampe nyeke ne nyeke!