Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KAPANGO KA BUFUNDIJI 19A

Minonga ya Madyese Atamba Kudi Yehova

Minonga ya Madyese Atamba Kudi Yehova

Tala bisonekwa bya mu Bible bishileshile bingidije kishima “munonga” nansha “mema” mwanda wa kufunkila pa madyese akuka atamba kudi Yehova. Abyo byonso kya pamo, binena kintu kampanda kikankamika bininge pa muswelo witwesela Yehova. Namani?

YOELA 3:18 Buno bupolofeto butela nsulo ya mema itamba mu kipandulwe kya tempelo. Ikuka mwanda wa kusangila “Musanza [mūmu] wa Mityi ya Akashia.” Nanshi ba Yoela ne Ezekyele abamone munonga upāna būmi ku kifuko kyampikwa bumeni. Mu buno bupolofeto bonso bubidi, munonga utamba mu njibo ya Yehova, nansha’mba mu tempelo.

ZEKADIA 14:8 Mupolofeto Zekadia wamone “mema a būmi” akuka atamba mu kibundi kya Yelusalema. Kipindi kimo kibakeela mu dijiba dya kutunduka, nansha’mba Dijiba Difwe, kipindi kikwabo, kibakukila mu dijiba dya kushika, nansha’mba Dijiba dya Meditelanea. Yelusalema wādi “kibundi kya Mulopwe mukata,” ke Yehova Leza kadi. (Mat. 5:35) Nanshi kutela kutelele Zekadia kino kibundi kwituvuluja buludiki bwa Yehova pa ntanda yonso mituntulu mu mafuku a kumeso. Twaivwanije tamba kala amba mema a mu buno bupolofeto alombola’mba Yehova ukesela bisumpi bibidi bya bantu ba kikōkeji mu Paladisa, boba bakapita pa kyamalwa kikatampe ne boba bakasangulwa.

KUSOKWELWA 22:1, 2 Mutumibwa Yoano wamone munonga wa kyelekejo wiifwene bininge na owa wāmwene Ezekyele. Inoko, ao keutambepo mu tempelo, ino utamba mu lupona lwa Yehova. Nanshi kino kimonwa, pamo ne kyokya kya Zekadia, bimweka bu bīsambila pa madyese a buludiki bwa Leza mu bula bwa Myaka Kanunu.

Shako, kudi’tu kwishila kutyetye kete pa bukata bwa madyese atamba ku buludiki bwa Yehova ne oa elekejibwe na munonga wāmwene Ezekyele mu kimonwa. Ano madyese onso atamba kudi Yehova kadi akukilanga ku bantu ba kikōkeji.

ÑIMBO YA MITŌTO 46:4 Tala uno vese’tu umo mwamwekela bu wisambilanga pa ino myanda ibidi​—butōtyi ne buludiki. Mu uno vese tubamone munonga uleta nsangaji ku “kibundi kya Leza,” kine kifunkila pa Bulopwe ne buludiki, ne ku “kipema kikatampe kijila kya Mwine wa Peulu Mwine,” kine kifunkila pa butōtyi butōka.

Bino bisonekwa byonso mu kikonge, bitukulupija’mba Yehova ukesela bantu mu miswelo ibidi. Tukatambula madyese a nyeke, dibajinji, kupityila ku buludiki bwandi, ne dya bubidi, kupityila ku mpangiko yandi ya butōtyi butōka. Nanshi tusumininwei tamba’nka pano kwendelela kukimba kudi Yehova Leza ne kudi wandi Mwana “mema a būmi”​—ke mpangiko yabo ya būmi bwa nyeke kadi!​—Yel. 2:13; Yoa. 4:10.