Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KAPANGO KA BUFUNDIJI 10C

Kwitukwasha Twimane Monka na Maulu Etu

Kwitukwasha Twimane Monka na Maulu Etu

TUBWANYA kukomejibwa na kulangulukila pa bufundiji budi mu kino kimonwa kitulumuja kidi mu Ezekyele 37:1-14, bwine botubwanya kwingidija mu ngikadilo yotudi’mo. Lelo i bufundiji’ka?

Kyaba kimo, tubwanya kumona’mba tubalēmenenwa bininge na makambakano ne matompo a mu būmi, twamona’mba ketukibwanyapo, tubakōka. Inoko, mu bitatyi bya uno muswelo, tubwanya kukomejibwa shi tulangulukila pa nshintulwilo ikankamika idi mu kimonwa kya Ezekyele kya kujokejibwa. Mwanda waka? Mwanda tubwanya kwifunda ku buno bupolofeto amba Leza mwine udi na bukomo bwa kuleta būmi mu mikupa mifwe, ubwanya bine kwitupa bukomo botusakilwa pa kukomena bikoleja​—enka ne byobya bimweka mungya mumweno wa bumuntu bu kebinekenibwapo.​—Tanga Ñimbo ya Mitōto 18:29; Fid. 4:13.

Bubwanya kwituvuluja’mba myaka tutwa na tutwa kumeso kwa mafuku a Ezekyele, mupolofeto Mosesa wānenene amba Yehova kadipo’tu’nka na bukomo kete, ino wabilanga ne kwingidija bukomo bwandi pa mwanda wa bantu bandi. Mosesa wālembele amba: “Leza i kinyemeno tamba bitatyi bya kala, maboko andi a nyeke adi munshi mobe.” (Kup. 33:27) Bine, tubwanya kukulupila’mba shi tunyemena kudi Yehova Leza mu bitatyi bya tusua, nandi ukatūla maboko andi a kilelo munshi mwetu, kwitwimika bityebitye, ne kwitukwasha twimane na maulu etu.​—Ezk. 37:10.