Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MBWEJO

Kwipūta ku Mutwe—Kitatyi’ka ne Mwanda Waka?

Kwipūta ku Mutwe—Kitatyi’ka ne Mwanda Waka?

Lelo i kitatyi’ka ne mwanda waka mwana-mukaji mwine Kidishitu ufwaninwe kwipūta ku mutwe mu mwanda utala butōtyi? Tubandaulei byānene mutumibwa Polo ku bukomo bwa mushipiditu pa uno mwanda. Uleta buludiki botufwaninwe kulonda pa kukwata butyibi buyampe, bupeja Leza bulēme. (1 Kodinda 11:3-16) Polo ulombola bintu bisatu byotufwaninwe kuta’ko mutyima: (1) mingilo ilomba mwana-mukaji epūte ku mutwe, (2) mu ngikadilo mwafwaninwe kwipūta, ne (3) kine kimutonona alonde uno musoñanya.

Mingilo. Polo utela mingilo ibidi: milombelo ne kunena bupolofeto. (Vese 4 ne 5) Bine, milombelo i kwisamba na Yehova potumutōta. Dyalelo, kunena bupolofeto kwimanine pa bufundiji bo-bonso bwa mu Bible bufundija mwingidi mwine Kidishitu. Le Polo wādi ukimba kunena amba mwana-mukaji ufwaninwe kupūta ku mutwe ponso palombela nansha pafundija bubine bwa mu Bible? Mhm, ke amopo. Ngikadilo idi’mo mwana-mukaji palombela nansha pafundija yo ishiyañanya.

Ngikadilo. Binenwa bya Polo bitela ngikadilo nansha byaba bya mingilo bibidi—kisaka ne kipwilo. Unena’mba: “Mutwe wa mwana-mukaji, i mwana-mulume; . . . mwana-mukaji ense ulombela nansha kunena bupolofeto ne kwipūta ku mutwe mpika ufwijanga mutwe wandi bumvu.” (Vese 3, 5) Mu kisaka, mulume ye utongelwe na Yehova bu mutwe wa wandi mukaji.  Shi kekudipo kilombola’mba mukaji ulēmekele lupusa lwa mulumyandi mobifwaninwe, ino engile mingilo ipelwe wandi mulume na Yehova, nabya wamufwija bumvu. Kimfwa, shi bilomba mwana-mukaji endeje kifundwa kya Bible wandi mulume ponka, nabya uketabija lupusa lwa mulume na kupūta ku mutwe. Ukapūta ku mutwe nansha mulumyandi ekale mubatyijibwe nansha wampikwa kubatyijibwa, ke-muntu ye aye mutwe wa kisaka. * Shi mwana-mukaji ulombela nansha kufundija ino wandi mwana mwana-mulume mubatyijibwe ponka, nabya ukapūta ku mutwe, ke mwandapo mwana ye mutwe wa kisaka, ino i mwanda udi na lupusa lupelwe bana-balume babatyijibwe mu kipwilo kya bwine Kidishitu.

Polo utela kadi ngikadilo ya kipwilo, amba: “Shi muntu usaka kupatanya mwanda wa kubingija kibidiji kikwabo, ketudipo na kibidiji kikwabo, ne bipwilo bya Leza bine kebidipo nakyo.” (Vese 16) Mu kipwilo kya bwine Kidishitu, bumutwe i bupebwe bana-balume babatyijibwe. (1 Temote 2:11-14; Bahebelu 13:17) Enka bana-balume bo batoñwanga bu bakulumpe ne bengidi ba mingilo ne kupebwa na Leza kiselwa kya kukumba luombe lwandi. (Bilongwa 20:28) Shako, kyaba kimo, mwana-mukaji mwine Kidishitu ukokeja kwingila mingilo ifwaninwe kwingilwa na mwana-mulume mubatyijibwe. Kimfwa, ukokeja padi kwendeja kupwila kwa kwenda mu mingilo ya budimi mwanda tutu mubatyijibwe ubwenye bisakibwa kadi’po. * Kadi ukokeja kukendeja kifundwa na muntu obelaile nandi, ne mwana-mulume mubatyijibwe ponka. Ino mingilo byoibadilwanga mu kipwilo, ufwaninwe kupūta ku mutwe mwanda wa kwitabija amba mingilo yaingila i ya bana-balume.

Ku mutamba mukwabo, kudi mingilo mivule mu butōtyi keilombengapo mwana-mukaji kupūta ku mutwe. Kimfwa, kanenenwepo kupūta ku mutwe palondolola ku kupwila,  paenda usapula ku njibo ne njibo na mulumyandi nansha na tutu mukwabo mubatyijibwe, pafundija ne palombela na bana bandi ba kubulwa kubatyijibwa. Na bubine, shi kudi bipangujo bikwabo bitala pa uno mwanda, ne kaka kayukilepo kya kulonga, nabya ukalongela’ko bukimbi. * Shi ukitatana ne shi mutyima wandi wa mundamunda umutonona epūte ku mutwe, nabya ke kibipo, na mokilombwedilwe pa kino kifwatulo.

Kimutonona. Mu vese wa 10 mudi bubinga bubidi butonona mwana-mukaji mwine Kidishitu alonde uno musoñanya: “Mwana-mukaji ufwaninwe kwikala na kiyukeno kya lupusa pa mutwe wandi mwanda wa bamwikeulu.” Bubinga bubajinji i kishima “kiyukeno kya lupusa.” Kupūta ku mutwe i kiyukeno kilombola amba mwana-mukaji ujingulwile lupusa ludi na bana-balume babatyijibwe pa kipwilo lwibapele Yehova. Nanshi ulombolanga buswe ne dikōkeji dyandi kudi Yehova Leza. Bubinga bwa bubidi, butanwa mu bino binenwa amba “mwanda wa bamwikeulu.” Le mwana-mukaji shi wapūta ku mutwe bitala namani bino bipangwa bya bukomo bya ku mushipiditu?

Bamwikeulu batele mutyima ku kumona mulēmekelwa lupusa lwa Yehova Leza mu bulongolodi bwandi mūlu ne pano panshi. Kadi bamwenanga mu bimfwa bibapa bantu ba kubulwa kubwaninina mu uno mwanda. Ne kadi, nabo bakōkele ku mpangiko ya Yehova—kintu kyākankelwe bamwikeulu bamo kulonga pa kala. (Yude 6) Pano, bamwikeulu bakokeja kumona mwana-mukaji mwine Kidishitu wa bwino, udi na kuyukidija, ne wa lūku kupita ne mwana-mulume  mubatyijibwe pa kipwilo; inoko aye ukōkela na mutyima umo ku luno lupusa. Kyaba kimo, mwana-mukaji ukokeja kwikala mushingwe māni ne mwenda mafuku ukelunga ku bampyana bapwani ba Kidishitu. Mwana-mukaji wa uno muswelo ukengila mwingilo wa peulu mupite ne wa bamwikeulu kadi ukabikala mūlu pamo na Kidishitu. Bine, kino i kimfwa kiyampe’po kashā kibandila bamwikeulu! Bine ne bine ponka, bakaka bonso badi na madyese a kukōkela na kwityepeja ne kulombola mwiendelejo wa dikōkeji ne kukōkelelela koku kashā batalwa na midiyo ne midiyo ya bamwikeulu ba kikōkeji!

^ mus. 3 Mwana-mukaji mwine Kidishitu kakalombelapo kawi mbilambila shi mulume mwitabije udi ponka, poso shi udi mu ngikadilo mikomo, kimfwa wabela misongo yakomenwa kunena.

^ mus. 1 Kaka kakasakilwapo kupūta mutwe paendeja kifundwa kya Bible kya muntu waadi upangikile kala kukefunda nandi pobendele na musapudi wampikwa kubatyijibwa kadipo wadi mulume.

^ mus. 2 Shi usaka kuyukila’ko myanda mikwabo, tala Kiteba kya Mulami kya 15 Kweji 7, 2002, paje 26-27 ne kya 1 Kweji 6, 1977, paje 349-352, Falanse.