Kwimuna ndalapo. Batumoni ba Yehova bakulupile amba kubandamina ndalapo ne kwiimuna, pamo ne kwimba lwimbo lwa ntanda, i kilongwa kya butōtyi kilombola’mba lupandilo lwiyanga kudi Leta ne ku bendeji ba politike, kekudipo Leza. (Isaya 43:11; 1 Kodinda 10:14; 1 Yoano 5:21) Nebukaneza Mulopwe wa Babiloni wa kala wālongele kino. Pa kuningila bantu bandi bamutumbije ne kumutōta, wāshimikile nkishi mukatakata ne kunena bantu bamutōte pa kuvuma kwa minjiki yādi pamo bwa lwimbo lwa ntanda. Inoko Bahebelu basatu—Shadelake, Meshake, ne Abedenengo—bāpelele kufukatyila nkishi nansha byobēbatungīle lufu.Danyele, shapita 3.

Mulembi wa mānga Carlton Hayes wāsonekele amba: “Kyelekejo kikatakata kya lwitabijo lwa mushipiditu wa kufwila ntanda ne kité kya mutōtelo wa muzo i ndalapo nansha lwembela. Kitatyi kikandijibwa ndalapo, bana-balume bavulanga bitebo byabo; kadi balembi balembanga ñimbo ya kutendela ndalapo, bana nabo bemba’yo.” Ubweja’ko amba mushipiditu wa kufwila ntanda udi ne mu “mafuku makatampe,” kimfwa fetyi ya ntanda ya États-Unis ya mu Dya Buná Kweji wa Busamba-Bubidi, pamo ne “basanto ne batulāla” bao ne “matempelo”  ao, ke mu bifuko mobatūlanga nkoba yabo kadi. Mudyavita mukatampe wa mu Brezile wānene padi palongwa masobo a bantu bonso amba: “Ndalapo i milēmekwe kadi itōtwanga . . . enka na mutōtelwa ntanda yāshile bankambo.” Kadi dibuku dikwabo (The Encyclopedia Americana) dyānene amba “ndalapo i ijila pamo’nka bwa musalaba.”

Dino dibuku dyatelwa dyesambīle kadi pa lwimbo lwa ntanda amba i “milangwe ya kusanswa ntanda imanine divule pa kulomba Leza endeje ne kulama bantu ne baludiki babo.” Bengidi ba Yehova kebapityije’byopo nanshi kipimo pa kumona bisela bya muzo, kimfwa kwimuna lwembela ne kwimba lwimbo lwa ntanda bu butōtyi. Bine, dibuku The American Character pa kushintulula kipelelanga bana ba Batumoni ba Yehova kutōta ndalapo ne kutyipa mutyipo wa kukōkela ntanda ku masomo a mu États-Unis, dyānene amba: “Kidye Kikatampe i kitabije mu bisambo bivule amba bino bisela biloñwanga difuku ne difuku i butōtyi.”

Bine nansha bantu ba Yehova byokebeluñangapo mu bino bisela byampikwa kukwatañana na Bisonekwa, ino balēmekele bwanapabo budi na bakwabo bwa kulonga’byo. Kadi balēmekele ndalapo ya ntanda bu kyelekejo kya ntanda ne kwitabija lupusa lwa bendeji babikikilwe, ke-bantu i “ba lupusa batabukile bukatampe” bengila bu “mwingidi wa Leza.” (Loma 13:1-4) Pa kino, Batumoni ba Yehova balondanga madingi a kulombelela “balopwe ne boba bonso badi pa bitenta.” Kyotulombela i “mwanda wa twikale talala nyā ne mu ndoe na bwine Leza ne kusumininwa konso.”1 Temote 2:2.

Kuvota mavote a politike. Bene Kidishitu ba bine balēmekele mbila idi na bakwabo ya kuvota. Kebalwangapo na kampanye ka vote, kadi betabijanga kwingidila pamo na ba lupusa bavotelwe. Inoko kebekujangapo nansha dimo mu myanda ya politike ya mizo. (Mateo 22:21; 1 Petelo 3:16) Le mwine Kidishitu ukalonga namani shi mu ntanda yashikete baningilanga’mo bantu bonso kuvota nansha mobashikilwe boba bapela kwenda kukavota? Kuvuluka byālongele ba Shadelake, Meshake ne Abedenengo bāendele mu dilungu dya Dula kukakwasha mwine Kidishitu udi mu ino ngikadilo,  atonge padi kwenda’ko shi mutyima wandi wa mundamunda witabije. Inoko ukadyumuka kutyina kwikupa ku mutamba kampanda. Imvwana pano misoñanya isamba yafwaninwe kuta’ko mutyima:

  1. Balondi ba Yesu kebadipo “ba ino ntanda.”Yoano 15:19.

  2. Bene Kidishitu i bantunguluji ba Kidishitu ne Bulopwe bwandi.Yoano 18:36; 2 Kodinda 5:20.

  3. Kipwilo kya bwine Kidishitu kikulupile bintu bimo byonka, kadi bantu badi’mo i belunge mu buswe budi pamo na bwa Kidishitu.1 Kodinda 1:10; Kolose 3:14.

  4. Boba bavota muntu amba ekale pa kitenta kamukaya betwikanga kiselwa kya byonso bikalonga muntu’wa.—Tala musoñanya udi mu binenwa bisonekelwe mu 1 Samwele 8:5, 10-18 ne mu 1 Temote 5:22.

  5. Yehova wāmwene mutyima wa Isalela wa kwikala na mulopwe bu kilomboji kya kumupela.1 Samwele 8:7.

  6. Bene Kidishitu bafwaninwe kulama bwanapabo bwabo bwa kunena pampikwa kafinda na bantu ba mitamba yonso ya politike myanda ya buludiki bwa Bulopwe bwa Leza.Mateo 24:14; 28:19, 20; Bahebelu 10:35.

Kaji ka Leta. Mu matanda amo, Leta ulombanga boba bapela kaji ka busola bengidile Leta mu bula bwa kitatyi kampanda. Shi buno butyibi bubetutana, tufwaninwe kulombela, padi twesamba ne na mwine Kidishitu mutame ku mushipiditu, ebiya twakwata butyibi mungya mutyima wetu wa mundamunda mufundijibwe.Nkindi 2:1-5; Fidipai 4:5.

Kinenwa kya Leza kitulomba ‘tukōkele maludiki ne balupusa, ne kwikala na mutyima wa kwingila mingilo yonso miyampe, ne mutyima unekena.’ (Tetusa 3:1, 2) Na ino myanda, tukokeja kwiipangula bino bipangujo amba: ‘Le nketabija mwingilo unomba Leta kwingila pambulwa kwikuja mu bya ntanda nansha mu bipwilo bya bubela?’ (Mika 4:3, 5; 2 Kodinda 6:16, 17) ‘Le kwingila ino mingilo kukalengeja kuvuija biselwa byami bya bwine Kidishitu kwikale kukomo nansha kukankankaja kuvuija’byo?’ (Mateo 28:19, 20; Efisesa 6:4; Bahebelu 10:24, 25) ‘Ne kadi, le kwingila ino mingilo kukatandabula  mingilo yami ya ku mushipiditu, padi na kwingila mwingilo wa kitatyi kyonso?’Bahebelu 6:11, 12.

Shi mwine Kidishitu wafule ku kujingulula amba mwingilo umulomba Leta ubwanya kwingila’o pa kyaba kya kukakutwa mu buloko, bene Kidishitu bakwabo bakalēmeka butyibi bwandi. (Loma 14:10) Ino shi wapele kwingila ino mingilo, bakwabo kadi bafwaninwe kulēmeka mwimanino wandi.1 Kodinda 10:29; 2 Kodinda 1:24.