Mu 1 Kodinda 6:1-8, mutumibwa Polo wisambila pa bana na bana betabije betwala mu kidye. Utompola mwanda waka bene Kidishitu ba mu Kodinda bādi basomonwa “kwenda ku kidye kya bantu bampikwa koloka.” (Vese 1) Polo wāletele bubinga bunane bufwaninwe bene Kidishitu kuleka kwitwala mu bidye bya ino ntanda, ino bapwije lupotopoto lwabo mu kipwilo. Tubandaulei pano bubinga bumobumo bwa ano madingi a ku bukomo bwa mushipiditu kadi ne ngikadilo ibala-inga keitalwepo na buno bulombodi.

Shi tupatana na mwanetu mwitabije pa mwanda wa bya busunga, tufwaninwe dibajinji kubandaula muswelo umona Yehova uno mwanda, pa kyaba kya motumwena. (Nkindi 14:12) Monka mwānenene Yesu, i biyampe kupwija kwipotomeja kumeso kwa ako kwikala bu mwanda mukatampe. (Mateo 5:23-26) Ino i kya bulanda, bene Kidishitu bamo bepotomejanga byamalwa, enka ne kukatwala lupotopoto lwabo ku kidye kya Leta. Polo wānene amba: “mubanekenibwa kala shi mwipya [mwisambila] myanda banwe bene na bene.” Mwanda waka? Mwanda mwine i uno: kwikokela mu kidye i kufutulwija dijina diyampe dya kipwilo ne dya Leza otutōta. O mwanda tulangulukei pa kipangujo kya Polo kya amba: “Mwanda waka kemulekapo’tu bemudimbe?”Vese 7.

Kadi Polo ulanguluka amba Leza i mupe kipwilo mpangiko milumbuluke ya kupwija lupotopoto. Bakulumpe i bene Kidishitu ba tunangu mwanda bayukile bubinebine bwa mu Bisonekwa, kadi Polo unena’mba i bayuke “kutyibila banababo mambo” mu “myanda ya mu buno būmi.” (Vese 3-5) Yesu wālombwele amba kwipotomeja kwa bubi bukatampe, pamo bwa lubabo ne budimbidimbi, bifwaninwe kupwijibwa mungya matabula asatu: dibajinji, longa bukomo bwa kupwija mwanda enka na mwine omwipile nandi mambo;  dya bubidi, shi mubakomenwa, sela kamoni kamo nansha tubidi; ne dya busatu, shi dino ditabula nadyo dibakomenwa, nankyo tūlai ino myanda ku kipwilo kimaninwe na bakulumpe.—Mateo 18:15-17.

Bine, bakulumpe bene Kidishitu ke baavokapo ba myanda ya busunga, mhm. Kebatūlangapo bijila bya mwa kupwijija lupotopoto lwa bya busunga bya bana na bana. Inoko bakimbanga muswelo wa kukwasha bepile mambo bengidije Bisonekwa ne kupwija mambo mu bulunda. Shi myanda’ya i mikolakane, bepangulanga mutadi wa kipindi nansha musambo wa Batumoni ba Yehova. Shako, kudi ngikadilo mikwabo keitalwepo na ano madingi āletelwe na Polo. Le i ngikadilo’ka imoimo?

Kyaba kimo, kwenda ku bisambo i mwanda’tu wa kupwija myanda mungya bijila ne mu ndoe. Kimfwa, muntu ukokeja kwenda ku kidye mwanda wa kumona mikanda ya dilubu, kupebwa lupusa lwa kulama bana, kuyuka buvule bwa mfutwa ya kufutwa, kutambula lupeto lwa kukūlwa ku bizumba, kujokejibwa mapu a ku banki iponene, nansha kushinija mukanda wa bupyani. Kadi kudi myanda mikwabo ilomba mwanetu ende ku Leta mwanda wa kwibingija ku bintu byobamulondalonda. *

Shi twende mu bino bidye pambulwa mushipiditu wa lūma, nabya ketukajilulapo musoñanya udi mu madingi a Polo. * Inoko, kifwaninwe kufwila mwine Kidishitu i kutumbija dijina dya Yehova ne kulama bumo ne ndoe ya kipwilo. Balondi ba Kidishitu bayukenanga dibajinji ku buswe bobeswele, ke-buntu “buswe . . . kebukimbangapo tumweno twa abo bwine.”1 Kodinda 13:4, 5; Yoano 13:34, 35.

^ mus. 2 Mu byaba bikwabo, mwine Kidishitu ukokeja kupya muntu mukwabo mambo makatampe—kimfwa bupolapola, kutambwa, kwipaibwa, nansha kwibwa bintu bivule. Mu uno muswelo i kipite buya mwine Kidishitu etande ku balupusa nansha shi kino kikamutwala mu kidye kya bonso nansha kya bipolapola.

^ mus. 3 Pa kuyukila’ko myanda mivule, tala Kiteba kya Mulami kya 15 Kweji 3, 1997, paje 17-22, ne kya 15 Kweji 10, 1991, paje 25-28, mu Falanse.