Yehova usaka boba besongele balame na kikōkeji mutyipo wabo wa busongi. Yehova wānene pa kulunga mwana-mulume ne mwana-mukaji umbajinji mu busongi amba: “Mwana-mulume . . . ukalamata kudi wandi mukaji, ino abo bonso babidi ke ngitu imo yonka.” Mwenda myaka, Yesu Kidishitu wāpituluka mu bino binenwa ne kubweja’ko amba: “Nanshi kyokya kyakuta Leza pamo mu lupungu, muntu nansha umo kakikalañanya’kyo.” (Ngalwilo 2:24; Mateo 19:3-6) Shi ke pano, Yehova ne Yesu bamwene busongi bu kijimba kyaendaenda kifwaninwe kutyibika enka shi umo wafu. (1 Kodinda 7:39) Nanshi busongi i mpangiko ijila, o mwanda dilubu i mwanda musumininwe. Bine, Yehova  ushikilwe kwilubula kekwimaninepo pa Bisonekwa.Malaki 2:15, 16.

Le kwilubula kwimanine pa Bisonekwa ko kwa namani? Eyo, Yehova ushikilwe makoji ne busekese. (Ngalwilo 39:9; 2 Samwele 11:26, 27; Ñimbo 51:4) Na bubine ushikilwe busekese bininge, o mwanda i mwitabije kwilubwila pa uno mwanda. (Shi usaka kuyuka bivule pangala pa busekese, tala Shapita 9, musango 7, pobashintulwile busekese i bika.) Yehova upele mulume nansha mukaji wampikwa mambo bwanapabo bwa kutonga kushala nansha kwilubula na mwinē pandi kipya-mambo. (Mateo 19:9) Inoko yewa wampikwa mambo shi walombe dilubu, nabya kalongelepo kintu kishikilwe Yehova. Inoko kipwilo kya bwine Kidishitu akyo kekikankamikangapo dilubu. Bine, mu ngikadilo imoimo, yewa wampikwa mambo uketabija kushala na mwinē pandi kipya-mambo, nakampata shi wesāsa bya binebine. Kya mfulo i kino: boba badi na bubinga bwa mu Bisonekwa bwa kulomba dilubu, bafwaninwe kutyiba butyibi bwabo abo bene ne kwitabija byonso bikalupuka’ko.Ngalatea 6:5.

Mu ngikadilo mikomo, bene Kidishitu bamo balombanga kusansana nansha kwilubula na benē pabo pampikwa mambo a busekese. Mu ino myanda, Bible unena’mba yewa ukalañana na mukwabo ukekala “kusongwa mpika shi bitupu apwane monka” na mwinē pandi. (1 Kodinda 7:11) Uno mwine Kidishitu kafwaninwepo kukimba muntu mukwabo wa kwisonga nandi dipya. (Mateo 5:32) Imvwana ngikadilo imoimo ya pa bula imonwanga bu kyalwilo kya kusansana.

Kupela kukwatakanya kisaka ku kusaka. Kisaka kikokeja kulandapala, kubulwa bisakibwa bya mvubu umbūmi, mwanda mulume watunya kusasakata, ino aye na bukomo. Bible unena’mba: “Shi muntu kasasaketapo . . . ba mu njibo yandi, nabya watune lwitabijo kadi i mubi kutabuka ne wampikwa lwitabijo mwine.” (1 Temote 5:8) Ekale mwana-mulume wapele na mutyima mūmu, nabya mukajandi ubwanya kusansana mungya bijila mwanda wa kamweno kandi ne ka bandi bana. Eyo, bakulumpe bene Kidishitu  bafwaninwe kutadija shi mwine Kidishitu’wa upelanga bya bine kukwatakanya kisaka kyandi. Ke-pantu kupela kulela kisaka kukokeja kutwala muntu ku kupangwa mu kipwilo.

Bukalabale bukatampe bininge. Umo pa besongele ukokeja kwikala na bukalabale butūla ngitu ne būmi bwa mukwabo mu kyaka. Shi uno muntu i mwine Kidishitu, bakulumpe bafwaninwe kukimba ne kuyukidija shi byobamunena i bya bine. Bukalabale ne ñuma bibadilwa mu bintu bikokeja kupangilwa muntu mu kipwilo.Ngalatea 5:19-21.

Kutūla būmi bwa ku mushipiditu mu kyaka. Umo pa boba besongele ukokeja kyaba kyonso kupeleja mwinē pandi aleke kulonda mutōtelo wa bine nansha kumuningila ajilule mbila ya Leza mu muswelo kampanda. Mu uno muswelo, yewa ukankajibwa ukatyiba butyibi bwa “kukōkela Leza bu mulopwe kupita’ko bantu” na kulomba kusansana mwendele bijila.Bilongwa 5:29.

Mu ngikadilo yonso mikomo yotwatela, i kutupu ufwaninwe kutonona mulume nansha mukaji wambulwa mambo amba basansane nansha kushikata na mwinē pandi. Eyo, balunda batame ku mushipiditu ne bakulumpe bakokeja kuleta madingi emanine pa Bible, inoko kebakokejapo kuyuka twanda tonso tupita pa bukata bwa ba mulume ne mukaji. Enka Yehova kete ye uyukile. Bine, mukaji mwine Kidishitu kakalēmekapo Leza ne mpangiko ya busongi shi upityija’byo kipimo mu kulombola makambakano a ku njibo mwafwila’tu basansane na mulume, ne mulume nandi monka na monka. Yehova uyukile ne nkuku ifyeme kunyuma kwa kukalañana, nansha shi muntu ufile’yo namani. Bine, “bintu byonso bidi mutaka kadi i bisokokele patōka ku meso a yewa mwine otukeshintulwila’ko.” (Bahebelu 4:13) Ino shi ngikadilo ya kyaka kikatampe ikyendelela, i kutupu ufwaninwe kutopeka mwine Kidishitu, udi na bwanapabo bwa kunena kya mfulo, watonga kusansana. Le kadi, “batwe bonso tukemananga kumeso kwa kityibilo kya mambo kya Leza.”Loma 14:10-12.