Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 22

Bulopwe Bubafikidija Kiswa-Mutyima kya Leza Pano Panshi

Bulopwe Bubafikidija Kiswa-Mutyima kya Leza Pano Panshi

PEMANINE SHAPITA

Bulopwe bubafikidija kiswa-mutyima kyonso kya Leza kitala bantu ne ntanda

1, 2. (a) Mwanda waka kyaba kimo bikokeja kwikala bikomo kumona Paladisa bu ya bine? (b) I bika bibwanya kwitukwasha tukomeje lwitabijo lwetu mu milao ya Leza?

MWANETU umo wa kikōkeji wafika ku kupwila, mukōke na mingilo ya mu difuku’dya. Wadi ulwa na biselwa bimuningila mukulu wandi wa kaji, bikoleja bya mwa kulamina kisaka bimukoka, ne misongo ya nzenzeka ya wandi mukaji. Pavuma minjiki ya kushilula nayo kupwila, mutyima ubamutūka, wasangala pa kwitana na batutu ne bakaka ku Njibo ya Bulopwe. Lwimbo lwisambilanga pa lukulupilo lwa Paladisa, kadi binenwa bimulomba afwatakanye luno lukulupilo, emone bwa udi’mo kala. Wikalanga usenswe luno lwimbo, kadi paimba’lo pamo na kyandi kisaka, lukulupilo lubasenge mutyima wandi.

2 Lelo nobe ke bikufikile? Bine, ke bifikile bavule. Eyo, tuyukile amba būmi bwa mu ino ngikadilo ya bintu minunu bubwanya kwitulengeja tumone Paladisa īya kumeso bu kilotwa bitupu. Tudi mu “bitatyi bya makambakano bikomo ne mwa kulongela,” kadi ino ntanda yotudi’mo keifwenenepo nansha pepi na paladisa. (2 Tm. 3:1) Le i bika bibwanya kwitukwasha tumone lukulupilo lwetu bu lwa bine? Eyo, ino le tubayuka namani amba Bulopwe bwa Leza busa kuludika bantu bonso? Tubandaulei bidi bupolofeto bumo bwa Yehova bwēmwenine bantu bandi pa kala bufikidila. Kupwa tusa kujokela ku bupolofeto’bo ne ku bukwabo bwiifwene nabo bufikidila mu muswelo utulumukwa mu ano mafuku. Ku mfulo, lwitabijo lwetu pa kukomejibwa, tusa kumona pa mutengelwa būmi bwetu bwa kumeso na buno bupolofeto.

Muswelo Wāfikidije Yehova Milao Yandi pa Kala

3. I mulao’ka wāsengele Bayuda bādi mu misungi mu Babiloni?

3 Langa mwādi mwikadile būmi bwa Bayuda bādi mu misungi mu Babiloni bākajokele mu mwaka wa katwa ka busamba K.K.K. Bavule bātamine mu bu misungi pamo bwa bashabo, kadi būmi bwādi bukomo. Bene Babiloni bādi bebazawila pa mwanda wa lwitabijo lwabo mudi Yehova. (Ñim. 137:1-3) Umbula bwa makumi a myaka, Bayuda ba kikōkeji bādi nyeke balamete ku lukulupilo lwabo lwa amba: Yehova i mulaye kukongakenya bantu bandi mu ntanda yabo.  Yehova wānene amba būmi bukalumbuluka. Kadi wādingakenye ntanda mijokejibwe ya Bayuda na budimi bwa Edena—bu paladisa! (Tanga Isaya 51:3.) Bine ino milao yāpelwe bantu ba Leza mwanda wa kwibakulupija, batalule malangalanga akokeja kukambakanya mityima yabo. Namani? Tala bupolofeto bumo.

4. Le Yehova wākulupije namani Bayuda pa bitala mutyima-ntenke mu yabo ntanda?

4 Mutyima-ntenke. Bano bamisungi bādi ba kujokela, ke mu paladisapo minemine, ino i mu ntanda ya kulampe yāshele masala mu bula bwa myaka 70, yādi iyukilwe’nka na batyetye bēimwene. Mu matanda atelelwe mu Bible, mwādi muvudile bantambo, bampumpi, bangé, ne banyama bakwabokwabo ba budyani. Mwana-mulume mu kisaka wādi ubwanya kwiipangula’mba, ‘Le nkalonga namani pa kukinga mukaji ne bana? Le mikōko ne bimunanwa bikwabo nabyo—le nkebilama namani?’ Kwiipangula namino kwādi kwendele’mo. Ino vuluka mulao wa Leza udi mu Isaya 11:6-9 ne mowādi ubwaninya kusenga bantu. (Tanga.) Na bino binenwa bya lulumbi binenwe na buswe, Yehova wākulupije bamisungi amba abo ne bimunanwa byabo bakalamwa senene. Ntambo wādi wa kudya biyombo, ko kunena amba kādipo wa kudya luombe lwa Bayuda. Bantu ba kikōkeji kebādipo na bubinga bwa kutyinina kintu, kimfwa banyama ba budyani. Yehova wālaile amba bantu bandi bakekala na mutyima-ntenke mu ntanda mijokejibwe ya Yuda, enka ne mu ntanda mutuputupu ne mu mató mwine.—Ezk. 34:25.

5. I bupolofeto’ka bwākweshe bamisungi bākajokele bakulupile amba Yehova ukebapa bungibungi bwa byobasakilwa?

5 Bungibungi. Mwanda mukwabo obādi ba kukambakena. ‘Le nkabwanya kudisha kisaka kyami mu yetu ntanda mijokejibwe? Tukashikata pi? Le tukamona kaji, le kakekala kayampe kupita twaji twa masusu twa mu bu misungi twa kuningilwa na betumunine bupika?’ Yehova wālondolwele ne bino bipangujo kupityila ku bupolofeto bwa ku bukomo bwa mushipiditu. Wālaile amba bantu bandi ba kikōkeji bakekala na mvula ya bine; ikalengeja nshi ilupule bidibwa bileta “ntundubuko [ne] bungibungi’tu” bwa bidibwa. (Isa. 30:23) Pa mwanda utala bīkalo ne kaji kayampe, Yehova wālaile pa bitala bantu bandi amba: “Bakōbaka mobo ne kwikala monka; kadi bakadima madimi a mañanza ne kudya bipa byayo. Kebakōbakapo amba ungi ekalemo, ehe; kadi kebakadimapo amba ungi adyeko, ehe.” (Isa. 65:21, 22) Bine, mu bipindi bivule, būmi bwādi bwa kwikala buyampe kupita bwa mu bupika bwa Babiloni ya mizo. Le tunena bika pa makambakano makatampe—mene ālengeje baselwe bu misungi?

6. I misongo’ka yādi na bantu ba Leza tamba kala, ne Yehova wākulupije bika ku bamisungi bākajokele?

6 Būmi bwa ku mushipiditu. Mafuku mavule kumeso kwa kuselwa bu misungi, bantu ba Leza bādi basamvule bininge ku mushipiditu. Yehova wānene pa bitala bantu bandi kupityila kudi mupolofeto Isaya amba: “Mutwe onso i wa misongo, ne mutyima onso nao i wakupungila.” (Isa. 1:5) Bādi bampofu kadi babitwi ku mushipiditu, mwanda bālekele  kwimvwana madingi a Yehova, kadi bafityila meso abo ku mwinya waādi wibapa. (Isa. 6:10; Yel. 5:21; Ezk. 12:2) Shi abo pa kujokela kwabo bāikele monka na ano makambakano, le bādi ba kwikala namani na mutyima-ntenke? Le mwene bādi ba kujimija monka kipwano kyabo na Leza? Bine mulao wa Yehova wēbakulupije, i mulao wa amba: “Byobiya mu dyodya difuku’dya wakitwi ukevwana binenwa bya mukanda, ne meso a bampofu akamonanga mu midima fututu ne mu fukutu.” (Isa. 29:18) I amo, Yehova wādi wa kundapa ku mushipiditu bantu bandi bajila, ba kwisāsa. Ponso pobādi betabija madingi ne kukōkela, Yehova wādi wa kwibapa bulombodi ne mwinya uleta būmi.

7. Le milao ya Leza yāfikidile namani ku bantu bandi ba misungi, ne mwanda waka kuno kufikidila kukomeja lwitabijo?

7 Le Yehova wāfikidije milao yandi? Mānga ilondolola kino kipangujo. Bayuda bākajokele mu ntanda yabo bāeselwe pa kwikala na mutyima-ntenke, ntundubuko ne bukomo bwa ku mushipiditu. Kimfwa, Yehova wēbalamine ku bantu bādi bebajokolokele, bakomokomo kadi bangi kwibapita. Banyama ba budyani kēbakubijepo luombe lwa Bayuda. Bine, bano Bayuda bāmwene’tu kufikidila kutyetye kutala bupolofeto bwālembelwe na bana-balume pamo bwa Isaya, Yelemia, ne Ezekyele—inoko ku bano bantu ba Leza, kuno kufikidila kwādi kutendelwa kadi kufike pa kitatyi kifwaninwe. Shi tulangulukile pa byālongele Yehova ku bantu bandi pa kala, lwitabijo lwetu lukakomena’ko. Shi kuno kufikidila kubajinji, kadi kutyetye kwa buno bupolofeto kubaikala kukunka mutyima nenki, le kufikidila kwine kukatampe ke pepi? Tala bitulongēle Yehova dyalelo.

Mushilwidile Yehova Kufikidija Milao Yandi mu Kyetu Kitatyi

8. I “ntanda” ya muswelo’ka ipēlwe bantu ba Leza dyalelo?

8 Bantu ba Yehova kebabundilepo muzo kampanda wa ntanda, kadi kebadipo na kipeta kampanda kya ntanda. Inoko, bene Kidishitu bashingwe mani babundile muzo wa ku mushipiditu, “Isalela wa Leza.” (Ngt. 6:16) Bapwani nabo “mikōko mikwabo” belungile nabo mu ino “ntanda” ya ku mushipiditu, būmi bwa ku mushipiditu mobatōtela Yehova Leza umbumo. Buno butōtyi bo būmi bwabo bonso. (Yoa. 10:16; Isa. 66:8) Le i “ntanda” ya muswelo’ka itupele Yehova? I paladisa ya ku mushipiditu. Mwine mufikidile ku mushipiditu milao ya Leza itala pa Edena mu muswelo utendelwa. Tala bimfwa bimo.

9, 10. (a) Bupolofeto budi mu Isaya 11:6-9 bufikidilanga namani dyalelo? (b) I ndoe ya muswelo’ka yotumona mu bantu ba Leza?

9 Mutyima-ntenke. Tutana mu bupolofeto budi mu Isaya 11:6-9, kyelekejo kisangaja kya bumo ne ndoe—pa bukata bwa banyema ba ntanda ne pa bantu pamo na banyema ba nja. Le kino kyelekejo kifikidilanga dyalelo? Bine! Mu vese 9, twifunda’mo kine kilengeja bino bipangwa bileke kwisanshija nansha kona, amba: “Mwanda panopanshi pakayula ne kuyukidija kwa Leza’nka bwa mema ayuja kalunga-kamema.”  Le kuno ‘kuyukidija Yehova’ i kushinte mwikadilo wa banyema? Mhm, bantu’ko bo balamwinwe pa kupwa kuyuka Leza Mwine wa Mūlu Mwine ne kwiula mashinda andi a ndoe. O mwanda mu paladisa yetu ya ku mushipiditu dyalelo, twimwenanga kufikidila kukunka mutyima kwa buno bupolofeto. Mu bwendeji bwa Bulopwe, balondi ba Kidishitu befundanga kutalula bukalabale, ngikadilo ya bunyema ne kwikala mu ndoe ne umbumo na batutu ne bakaka ku mushipiditu.

10 Kimfwa, mu dino dibuku twesambile’mo amba bene Kidishitu kebeelangapo mu bya ntanda—mwimvwanino wetu wimanine pa Bisonekwa ne kupangwapangwa kwatene bantu ba Leza pa kubulwa kwikuja’mo. Mwene i kintu kitulumukwa mu ino ntanda ya bukalabale, kumona “muzo” mukatampe wa bantu bapela, enka ne ku lufu kwine, kwikuja mu bukalabale bo-bonso? Bine buno i bukamoni bulombola’mba babikalwa ba Mulopwe Meshiasa badi mu ndoe pamo na yoya yālembelwe na Isaya! Yesu wānene amba balondi bandi bakayukena ku buswe bobesenswe. (Yoa. 13:34, 35) Mu kipwilo, Kidishitu wingidijanga na kitūkijetyima “umpika mukōkele ne mudyumuke” kufundija bene Kidishitu bonso ba bine bekale baleta ndoe, ba buswe, kadi bayampe.—Mat. 24:45-47.

11, 12. I nzala ya muswelo’ka ikambakanya ntanda dyalelo, ino le Yehova i mupe bantu bandi bungibungi bwa bika?

 11 Bungibungi. Ntanda idi mu nzala ya ku mushipiditu. Bible wādyumwine amba: “Talapo bidi, mafuku āyako’a; i Mfumwetu Leza unena; o nkatuma kipupo kya nzala muntanda, ke kipupo kya bidībwapo, mhm, nansha bu-kyumwa kya mema, ehe, ino nanshi i kya kwivwana binenwa bya Yehova.” (Amo. 8:11) Le bana ba kibundi ba Bulopwe bwa Leza nabo basusukanga na nzala? Yehova wālaile kwishila kukekala pa bantu bandi na balwana nandi amba: “Talapo bidi, bengidi bami bakadya, ino banwe mukekala na nzala; talapo bidi, bengidi bami bakatoma, ino banwe mukekala na kyumwa; talapo bidi, bengidi bami bakasepelela, ino banwe mukafwijibwa bumvu.” (Isa. 65:13) Le kodi mwimwene kufikidila kwa bino binenwa biyampe?

12 Bidibwa bya ku mushipiditu bitupungulukilanga’nka bwa munonga mukatampe kadi wa nkulwe. Mabuku etu esambila pa Bible—makwate ku mawi ne mu mavideo, kupwila ne bitango, ne myanda ilupwilwe pa Entelenete—byonso i munonga ukuka’nka kukuka mu ino ntanda mikame ku mushipiditu. (Ezk. 47:1-12; Yoe. 3:18) Le kutulumukilepo pa kumona kufikidila kwa milao ya Yehova itala pa bungibungi bwa bidibwa mu būmi bobe difuku ne difuku? Lelo ukulupile bine amba udyanga kitatyi ne kitatyi ku meza a Yehova?

Bipwilo byetu bitukwashanga tudishibwe senene ku mushipiditu, twikale na mutyima-ntenke kadi bakomo

13. Le wi mumone namani kufikidila kwa mulao wa Yehova utala pa mpofu umona ne wakitwi wimvwana?

13 Būmi bwa ku mushipiditu. Bupofu ne bukitwi bwa ku mushipiditu i bisambakane dyalelo. (2 Ko. 4:4) Nansha nankyo, Kidishitu undapanga bulema ne misongo ntanda yonso. Le kodi mumone meso a mpofu ke amone ne matwi a babitwi ajikuka? Shi kodi mumone muntu usokola buyuki bwa binebine bwa bubine budi mu Kinenwa kya Leza, kapele ne bubela bwa bipwilo bwibasaba meso ne kwibajika matwi bakemvwana bubine, nankyo kodi mumone kufikidila kwa mulao wa amba: “Mu dyodya difuku’dya wakitwi ukevwana binenwa bya mukanda, ne meso a bampofu akamonanga mu midima fututu ne mu fukutu.” (Isa. 29:18) Bantu tununu ne tununu ntanda yonso bondapwanga ku mushipiditu mwaka ne mwaka. Yewa ense unyema Babiloni Mukatampe ne kwiya kutōta netu mu paladisa ya ku mushipiditu wimwenanga kufikidila kwa milao ya Yehova!

14. I bukamoni’ka botubwanya kulangulukila’po pa kukomeja lwitabijo lwetu?

14 Shapita ne shapita wa dino dibuku uleta bukamoni kebupatanibwa bwa amba, Kidishitu uletanga balondi bandi mu paladisa ya binebine ya ku mushipiditu mu ano mafuku a mfulo. Tulangulukilei nyeke pa miswelo mivule yotweselwa mu ino paladisa dyalelo. Potulangulukila’po, lwitabijo lwetu mu milao ya Yehova itala mafuku a kumeso, lukakomena’ko.

“Bulopwe Bobe Bwiye”

15. Mwanda waka tubwanya kukulupila amba ntanda ikekala ke paladisa?

15 Mpango ya Yehova tamba kala i ya kwalamuna ntanda ke paladisa. Wātūdile ba Adama ne Eva mu budimi bwa paladisa, kadi wēbapele musoñanya wa kuyuja ntanda na bana  bandi ne kukwatakanya bipangwa byonso bidi’po. (Ngo. 1:28) Ino, ba Adama ne Eva bālondele Satana mu butomboki ne kutweja babo bana bonso mu kubulwa kubwaninina, mu bubi, ne mu lufu. Ayo’ko mpango ya Leza keyāshintyilepo. Shi wanena kintu, poso’nka kifikidile ne pa mfulo. (Tanga Isaya 55:10, 11.) Tubwanya kukulupila amba bana ba Adama ne Eva bakayula pano pa ntanda ne kwipanekenya, ne kulama na buswe bipangwa bya Yehova mu paladisa ntanda yonso. Mu kine kitatyi’kya, ye po pakafikidila ne pa mfulo bupolofeto bwaāpele dibajinji Bayuda bamisungi butala pa būmi bwa mu paladisa! Tala bidi bino bimfwa.

16. Lelo Bible ulombola namani mutyima-ntenke otukekala nao mu Paladisa?

16 Mutyima-ntenke. Mfulo mfulō, kyelekejo kikunka mutyima kitelelwe mu Isaya 11:6-9 ye po kisa kufikidila buntu-ntala. Bana-balume, bana-bakaji, ne bana bakekala biyampe kadi na mutyima-ntenke konso kobenda. I kutupu kipangwa nansha kimo, muntu nansha nyama, ukaleta kyaka. Langa’po bidi pokamona ntanda yonso ke yobe, usumba bitupu mu minonga, majiba, ne ngui; utyibuluka ngulu; ne kutyina mpika ntanda ya maimakasa. Kadi ne bufuku bwine kukebutyinapo. Binenwa bidi mu Ezekyele 34:25 bikafikidila, ne kino kikalengeja bantu ba Leza bekale na “mutyima-ntenke muntanda mutuputupu, ne kulāla tulo mu mityi ya muntanda.”

17. Mwanda waka tubwanya kukulupila amba Yehova ukaleta bungibungi bwa byotusakilwa pakaludika Bulopwe ntanda yonso?

17 Bungibungi. Fwatakanya’po kitatyi kekikekala’kopo monka bulanda, kubulwa kwikuta, nzala, nansha malongolodi a kukwashañana mene. Bungibungi bwa bintu bya ku mushipiditu bidi na bantu ba Leza dyalelo bulombola’mba Mulopwe Meshiasa ukadisha babikalwa bandi mu myanda yonso. Yesu paādi pano pa ntanda wālombwele mu ludingo lutyetye amba ubwanya kufikidija ino milao, mwanda wādishishe tununu twa bantu bādi na nzala na mikate’tu mityetye ne twita. (Mat. 14:17, 18; 15:34-36; Mako 8:19, 20) Kitatyi kisa kuludika Bulopwe bwa Leza ntanda yonso, bupolofeto budi bwa buno bukafikidila buntu-ntala, bwa amba: “Ukapana mvula wa lukunwa lobe, ino abe ukakuna nshi nālo; ne bidībwa bya ntundubuko ya panshi ikekala ya bumeni bungibungi’tu; mu dyodya difuku’dya bimunanwa byobe bikadyanga mu madyo makatampe.”—Isa. 30:23.

18, 19. (a) Le umona namani bupolofeto bwa Isaya 65:20-22? (b) Mafuku etu akekalanga monka “mwendele mafuku a mityi” namani?

18 Dyalelo kudi bavule kebafwatakanyangapo amba babwanya kwikala na njibo yabo miyampe nansha twaji tusangaja ne tumwenwa’mo. Mu ino ntanda mibole, bavule bengilanga bininge ino abo ne byabo bisaka bamwena’mo’tu tutyetye, koku nako bampeta ne bantu ba makomwa-meso kashā bakombeleja tonso. Languluka’po bidi mobikekadila pakafikidila buno bupolofeto ntanda yonso, bwa amba: “Bakōbaka mobo ne kwikala monka; kadi bakadima madimi a mañanza ne kudya bipa byayo. Kebakōbakapo amba ungi ekalemo, ehe; kadi kebakadimapo amba ungi adyeko, ehe;  mwanda mwendele mafuku a mityi a monka mukekadila mafuku a bantu bami, ne batongwe bami bakalēpejeja biyampe mingilo ya makasa abo.”—Isa. 65:20-22.

19 Le mafuku etu akekalanga monka “mwendele mafuku a mityi” namani? Shi ubatwela mu ditó dya mityi fututu, le kutulumukangapo ne kwiipangula pa bungi bwa myaka yokeidi mije—padi yaikele’ko ne bankambulula bobe bene kebabutwilwe? Ukamona’mba shi washala’nka mu ngikadilo yobe ya bumpikwa kubwaninina, ino mityi yadi ya kwikala’ko mafuku mangi kupita obe, yenda ilepeja’ko mafuku, ikele mu ndoe papo abe kebakwilwe ne mu bongolo. Bine Yehova i muyampe kashā pa kwitukulupija amba mu Paladisa, mafuku etu akekala malampe kadi a ndoe! (Ñim. 37:11, 29) Mafuku āya’ko, enka ne mityi imweka bu milāle mafuku, ikamweka kotudi pamo’nka bwa biyombo, bimena kadi byafumba, batwe papo bōmi nyeke!

20. Le babikalwa ba Bulopwe bakekala namani na bukomo bwa ngitu bubwaninine?

20 Bukomo bwa ngitu bubwaninine. Dyalelo, misongo ne lufu i bitādile ntanda yonso. Mu buluji kampanda, batwe bonso tubelanga—basambukilwe na misongo keipu itwa bu bubi. Lawa imo kete i kitapwa kya kinkūlwa kya Kidishitu. (Loma 3:23; 6:23) Mu Umbikalo wa Myaka Kanunu, Yesu ne babikadi-nandi bakengidija mvubu ya kino kitapwa, ne kujimankanya bityebitye mikovu yonso ya bubi mu bantu ba kikōkeji. Po pakafikidila ne pa mfulo bupolofeto bwa Isaya bwa amba: “Mwikadi kakanenapo’mba: Nabela, bantu bakekalanga’mo bakalekelwa bukondame bwabo.” (Isa. 33:24) Langa pakekala kekukidipo mpofu, wakitwi, nansha kisheta. (Tanga Isaya 35:5, 6.) I kutupu musongo nansha umo ukakomena Yesu kundapa—ikale ya ku ngitu, mu ñeni, nansha mu malango. Babikalwa ba kikōkeji ba Bulopwe bakekala na bukomo bwa ngitu bubwaninine!

21. Le i bika bikalongwa lufu, ne mwanda waka uno mulao usenga’po mpata?

21 Ino le i bika bikafikila lufu lwine lutambanga ku misongo ne ku bubi? Uno ye “walwana wa mfulo” kotudi, ukwata muntu ense wampikwa kubwaninina, shi kamukwete dyalelo nankyo i kesha. (1 Ko. 15:26) Le lufu lubwanya kwitatula kudi Yehova? Tala byānene Isaya: “Wapu kumininina lufu nyeke ne nyeke; ino Mfumwetu Leza ukapampula mipolo ku mapala onso.” (Isa. 25:8) Le ubwanya kufwatakanya mukekadila kitatyi’kya? Kutupu madilo, kutupu bibundu, nansha ke mipolo mine ya njia! Pa kyaba kya ino mipolo—kukekala’ko mipolo ya nsangaji pakafikidija Yehova uno mulao usangaja wa kusangula bafwe! (Tanga Isaya 26:19.) Kupwa, bilonda byonso byotutapilwe na lufu bikondapibwa.

22. I bika bikalongeka pakapwa Bulopwe bwa Meshiasa kufikidija kiswa-mutyima kya Leza pano panshi?

22 Ku mfulo kwa Myaka Kanunu, Bulopwe bukapwa kufikidija kiswa-mutyima kya Leza pano panshi, ebiya Kidishitu ukajokeja Bulopwe kudi Shandi. (1 Ko. 15:25-28) Kupwa bantu, papo ke babwaninine, bakekala beteakanye kala ku matompo a mfulo pakakutululwa Satana mu lupongo  mwaadi ukutyilwe. Ku mfulo, Kidishitu ukasonsakanya uno nyoka mubi ne bonso bamulonda. (Ngo. 3:15; Kus. 20:3, 7-10) Ino boba bonso bakōkele Yehova na buswe bakatōkwa. Padi i kutupu binenwa bibwanya kulombola’kyo senene kupita byobya bidi mu Bible. Bible ulaya amba boba ba kikōkeji bakamona “bwanapabo bwa ntumbo budi na bana ba Leza.”—Loma 8:21.

Bulopwe busa kufikidija milao ya Yehova itala bantu ne ntanda

23, 24. (a) Mwanda waka milao ya Leza ikafikidila binebine? (b) Le ubasumininwa kulonga bika?

23 Ino milao ke nkulupilopo ya kufwatakanya, ya kwabila, nansha ya kulota. Milao ya Yehova isa kufikidila binebine! Mwanda waka? Vuluka binenwa bya Yesu byotwesambīle’po mu shapita umbajinji wa dino dibuku. Wāfundije balondi bandi kulomba Yehova amba: “Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.” (Mat. 6:9, 10) Bulopwe bwa Leza ke milangwepo’tu ya muntu. I bwa binebine! Ne potwisamba pano buludikanga mūlu. Pano ke myaka katwa, yobufikidija milao ya Yehova mu muswelo mumwekelele mu kipwilo kya bwine Kidishitu. Nanshi tukulupilei amba milao yonso ya Yehova isa kufikidila pasa kwiya Bulopwe bwa Leza kutandabula buludiki bwabo pano pa ntanda!

24 Tukulupile amba Bulopwe bwa Leza busa kwiya. Tuyukile amba kinenwa kyonso kilaile Yehova kisa kufikidila. Mwanda waka? Mwanda BULOPWE BWA LEZA BULUDIKANGA! I biyampe muntu ne muntu eipangule amba, ‘Le ndudikwanga na Bulopwe bwa Leza?’ Tulongei byonso byotubwanya mwanda wa kwiendeja bu babikalwa ba Bulopwe bakōkele dyalelo, amba tumwene nyeke mu buno buludiki bubwaninine kadi boloke!