Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 3

Yewa Wālongele Bintu Byonso

Yewa Wālongele Bintu Byonso

Le i ani wālongele bintu byonso byūmi?

N DYUKILE kintu kimo kiyampe. Lelo nobe uswile kwikiyuka?​—Witale bidi mu dikasa dyobe. Konya minwe yobe. Pano boya kya kuboya. Dikasa dyobe dibwanya kulonga bintu bivule, kadi dikokeja kwibilonga biyampe. Lelo uyukile i ani wālongele makasa etu?​—

Bine, i yenka yewa wālongele kyakanwa kyetu, mulu wetu, ne meso etu mene. I Leza, Shandya Mufundiji Mukatampe. Mwene tusangele mwanda Leza i mwitupe meso?​—Tubwanya kumona nao bintu bivule. Tukokeja kubandila maluba. Tukokeja kubandila biyombo bibishi ne diulu difituluka. Tukokeja kumona nansha ke toni twana tudila nzala, pamo na tuno tudi pa kifwatulo’tu. Bine tutendelanga potumona bintu pamo na bino’bi, mwene i amo?​—

Ino, le i ani wālongele bino bintu? Lelo i muntu kampanda wa pano panshi wēbilongele? Ehe. Bantu bakokeja kūbaka njibo. Ino kekudipo muntu ubwanya kupunga kiyombo kimena panshi. Bantu kebabwanyapo kulonga koni kana kōmi, diluba dimena, nansha kintu’ka kikwabo kyūmi. Le wadi kala uyukile namino?​—

I Leza wālongele bintu byonso. Leza wālongele madiulu ne ntanda. I aye wālongele ne bantu bene. Wāpangile mwana-mulume  umbajinji ne mwana-mukaji umbajinji. Yesu, Mufundiji Mukatampe, wāfundije uno mwanda.​—Mateo 19:4-6.

Le Yesu wāyukile namani amba Leza ye wālongele mwana-mulume ne mwana-mukaji? Lelo Yesu wāmwene Leza paādi wibalonga?​—Bine wāmumwene. Yesu wādi pamo na Leza pādi papanga Leza mwana-mulume ne mwana-mukaji. Yesu ye muntu umbajinjibajinji kupangwa na Leza. Yesu wādi mwikeulu, kadi wādi wikele kala pamo na Shandi momwa mūlu.

Bible witulombola amba Leza wānene amba: “Leka bidi tulonge muntu.” (Ngalwilo 1:26) Le uyukile Leza wādi usapwila ani?​—Wādi usapwila wandi Mwana. Myaka pa kupita’po uno Mwana waādi usapwila wāiya pano panshi wāikala ke Yesu.

Mwene uno i mwanda usangaja mpata? Langa’po’tu bidi! Shi tuteja Yesu, nabya tufundijibwanga na yewa wādi pamo na Leza kitatyi kyādi kilonga Leza ntanda ne bintu bikwabo byonso. Yesu wāfundile  bivule kudi Shandi paādi wingila nandi pamo momwa mūlu. Bine, ke kya kutulumukapo shi Yesu i Mufundiji Mukatampe!

Le ulanga amba Leza wādi ubudilwe nsangaji paādi bunka kumeso kwa kupanga wandi Mwana?​—Mhm. Ebiya shi wādi na nsangaji, le mwanda waka wālongele bintu bikwabo bidi na būmi?​—Wēbilongele mwanda aye i Leza wa buswe. Wāsakile bakwabo nabo bekale’ko, basangele būmi. Tufwaninwe kufwija’ko Leza mwanda wētupele būmi.

Byonso bilongele Leza bilombola buswe bwandi. Leza wālongele dyuba. Dyuba ditupanga kitōkeji ne kyanga. Shi twadi amba ketudipo na dyuba longa bintu byonso i bikwate mashika ne kadi longa i kutupu būmi pano pa ntanda. Mwene usangele mwanda Leza wālongele’ko dyuba?​—

Leza unokejanga ne mvula. Kyaba kikwabo, kusangelangapo mvula mwanda ukubudijanga kukakaila panja shi kanoke. Inoko mvula umenejanga maluba. Penepa shi tubamone maluba mayampe, le i ani otukafwija’ko?​—I Leza. Ne shi tubadi mani ne bipa bitobala, lelo i ani otufwaninwe kufwija’ko?​—Tufwaninwe kufwija’ko Leza mwanda dyuba dyandi ne mvula wandi byo bitamijanga bikunanwa.

Langa’po shi muntu wakwipangula amba, ‘Lelo Leza ye wālongele bantu ne banyema bene?’ Le ukanena’po namani?​—I biyampe kunena amba: “I amo, Leza ye wāpangile bantu ne banyema.” Ino le ukanena namani shi muntu ketabijepo amba Leza ye wālongele bantu binebine? Le shi wanena amba bantu batambile ku banyema le? Eyo, Bible kafundijangapo nankyo. Unena amba Leza ye wāpangile bintu byonso byūmi.​—Ngalwilo 1:26-31.

Njibo byoidi ne muntu wēilongele, le i ani wālongele maluba, mityi, ne banyema?

Ino muntu kampanda ukokeja kukusapwila amba ketabijepo mudi Leza. Le abe ukanena’po namani?​—Ubulwe’po kumufunkila njibo? Kupwa wamwipangula’mba: “I ani ulongele yoya njibo?” Muntu yense uyukile amba kudi  muntu kampanda ulongele’yo. Na bubine njibo keilongelepo ayo mine!​—Bahebelu 3:4.

Kupwa endai kokwa kudi maluba, umulombole diluba dimo. Penepa umwipangule amba: “I ani wēdilongele?” Ke muntupo wa pano panshi ehe. Monka kemwiubakidile njibo ayo mine, ne dino diluba nadyo kedilongelepo adyo dine. Kudi muntu wālongele’dyo. I Leza.

Nena muntu’wa emane pamo evwane mudidilo wa koni. Kupwa mwipangule amba: “I ani wālongele toni ne kwitufundija mwa kudidila?” I Leza. Bine, Leza ye wālongele madiulu ne ntanda ne byonso byūmi! I Aye upānanga būmi.

Ino, padi muntu ukokeja kunena amba aye witabijanga enka bintu byamona na meso. Padi wanena’mba: ‘Kyokya kyonkibwanyapo kumona, nkikokejapo kwikitabija.’ O mwanda bantu bamo banenanga amba kebetabijepo mudi Leza mwanda kebakokejapo kumumona.

I bine ketukokejapo kumona Leza. Bible unena’mba: ‘Kekudipo muntu ubwanya kumona Leza.’ Kekudipo mwana-mulume, mwana-mukaji, nansha mwana mutyetye pano pa ntanda ubwanya kumona Leza. Nanshi i kutupu muntu ufwaninwe kulonga kifwatulo nansha kyelekejo kampanda kya Leza. Leza mwine witupeleje kulonga kyelekejo kyandi. Nanshi ketusapo kusangaja Leza shi tudi na bintu bya uno muswelo mu yetu njibo.​—Divilu 20:4, 5; 33:20; Yoano 1:18.

Ino shi ketumonangapo Leza, le tuyukile namani amba Leza udi’ko binebine? Langa bidi kino nakyo. Lelo ukokeja kumona luvula?​—Nansha dimo. Kekudipo muntu ukokeja kumona luvula. Ino ubwanya kumona bintu bilonga luvula. Shi luvula ke lupukuma mani ajinanga ku mitabi nansha ku misambo ya mutyi. Papo waitabija ne kwitabija amba luvula ludi’ko.

Le uyukanga namani amba kudi luvula?

Ne bintu byālongele Leza nabyo ukokeja kwibimona. Pomonanga diluba dimene nansha koni, umonanga nanshi kintu kilongele Leza. Papo waitabija ne kwitabija amba Leza udi’ko binebine.

 Padi muntu kampanda ukakwipangula amba, ‘I ani wālongele dyuba ne ntanda?’ Bible unena’mba: ‘Leza wāpangile madiulu ne ntanda.’ (Ngalwilo 1:1) I amo, Leza ye wālongele bino bintu byonso bya kutendelwa! Le ulanga’po namani?​—

Mwene kwikala na būmi i kintu kiyampe? Tubwanya kwivwana mididilo miyampe ya toni. Tukokeja kumona maluba ne bintu bikwabo bilongele Leza. Kadi tukokeja kudya bidibwa bitupele Leza.

Tufwaninwe kufwija’ko Leza pa bino byonso. Nakampata, tufwaninwe kumufwija’ko mwanda i aye witupele būmi. Shi binebine tudi na mutyima wa kufwija’ko Leza, ketukabulwepo kulonga’po kintu kampanda. Le i kintu’ka?​—I kwivwana Leza, ne kulonga byobya byaetusapwila mu Bible. Mu uno muswelo tukalombola amba tuswele Yewa wālongele bintu byonso.

Tukokeja kufwija’ko Leza pa mwanda wa byonso byaālongele. Muswelo’ka? Tanga bilembelwe mu Mitōto 139:14; Yoano 4:23, 24; 1 Yoano 5:21; ne Kusokwelwa 4:11.