Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 33

Yesu Ubwanya Kwitulama

Yesu Ubwanya Kwitulama

Lelo umwene Yesu namani—bu Mulopwe mukomokomo’ni nansha bu mwana wa lukeke wampikwa bukomo?

YESU paātamine ne kuyuka muswelo waālaminwe paādi ukidi mwanuke, lelo ulanga amba wālombele kudi Yehova ne kumufwija’ko?—Le ulanga Yesu wālombwele ba Yosefa ne Madia bika mwenda mafuku paāyukile amba bāpandije būmi bwandi na kwenda nandi mu Edipito?—

Pano’ko shako, Yesu ke mwanapo wa lukeke. Kakishiketepo ne pano panshi pene mwaāshikatyilepo dibajinji. Ino mwene uyukile amba ne pano pene bantu bamo bamweka bu balanga amba Yesu ukidi enka bu mwana wa lukeke udi mu kidīlo kya banyema?—I kya bine, mwanda kitatyi kya Noele mu bifuko bivule bifwatulo bikimwekeja Yesu bu mwana wa lukeke.

Nansha Yesu byakakidipo monka pano pa ntanda, lelo witabije amba ukidi mūmi?—Bine, wāsangwilwe mu bafu, ne panenwa pano i Mulopwe wa bukomo momwa mūlu. Molangila, le uloñanga bika mwanda wa kukinga boba bamwingidila?—Eyo, paādi pano pa ntanda, Yesu wālombwele muswelo wakokeja kulama boba bamuswele. Pano tutale bidi mwaālongēle difuku dimo dyaādi pamo na bandi bana ba bwanga mu bwato.

 Dyuba ke ku kyolwa. Yesu wapu kufundija difuku dyonso dituntulu ku dijiba dya Ngadilea, didi na makilometele 20 mu bula ne 12 mu bunkimbwa. Ebiya walombola bandi bana ba bwanga amba: “Twabuke bidi bukila bwa dijiba.” Penepo abaikila mu bwato abashilula kuvuwa batyibulule dijiba. Yesu udi na mpungiji mikatampe, o mwanda waenda kunyuma kwa bwato, walāla ne kutūla mutwe pa musamo. Bukidi bonka waponena mu tulo bukū.

Le Yesu unena luvula ne mabimbi a mema bika?

Bana ba bwanga badi enka batala mwa kolwela bwato senene. Mu kitatyi kampanda, lwendo ludi enka biyampe, ino kupwa luvula lukatampe lubashilula kupukuma. Kelupukuma’nka kupukuma bikatampe, ne mabimbi nao enda akanda’nka kukanda. Mabimbi abaanza kusampukila mu bwato, papo bwato bubashilula kuyula mema.

Bana ba bwanga abakwatwa moyo amba dya balobela. Inoko Yesu kakwetwepo moyo. Wilādile shandi enka nyā kunyuma kwa bwato. Ku mfulo, bana ba bwanga abamulangula, kebanena’mba: ‘A Mfumwetu, Mfumwetu! Witupandije; tubafu mu kino kivula.’ Penepo, Yesu walanguka kakande luvula ne mabimbi’a. Kanena’mba: ‘Ish! Talalai nyā!’

 Enka ponka’po luvula lubaleka’byo kupukuma, ne pa dijiba pabatalala’tu nyā. Bana ba bwanga abatulumuka. Badi kebamwene kashā kintu kya uno muswelo. Abashilula kwisamba abo bene na bene amba: ‘Le uno nandi i ani le, usoñanya’tu ne luvula ne mema nabyo bimukōkela’tu namino?’—Luka 8:22-25; Mako 4:35-41.

Lelo abe uyukile amba Yesu i ani?—Le uyukile i kwepi kwamonanga bukomo bwandi bukatampe?—Bana ba bwanga kebādipo bafwaninwe kukwatwa moyo pobādi na Yesu pamo, mwanda Yesu ke muntupo udi pamo bwa bantu bonso. Wādi ukokeja kulonga bintu bya kutendelwa kebibwanyapo kulongwa na muntu mukwabo shi ani, shi ani. Ivwana nkusapwile kintu kikwabo kyaālongele pa dijiba papukuma kimpumpu.

Dyadi difuku dimo nenki mwenda mafuku. Kyolwa pa koloba, Yesu wasapwila bandi bana ba bwanga bekile mu bwato ne kumubadikila bukila bukwabo bwa dijiba. Ebiya Yesu wakanda ku lūlu kwa bunka bwandi. I ku kifuko kwampikwa lungwe kwabwanya kulombela Yehova Leza Shandi.

 Bana ba bwanga abaikila mu bwato kebavuwe batyibulule dijiba. Ino kepejije luvula lubashilula kupukuma. Kelupukuma’nka kupukuma bikata. Bufuku nabo pano bubaile. Balumyana papo abatalula fwele nansha bisandi byendejanga bwato na luvula kebavuwe. Ino kebendapo ne kulampe kwine mwanda kudi kivula kikomo kīya mobenda. Bwato kebupena nansha kutunkaila koku na koku pa mwanda wa mabimbi makatampe, ne mema nao keatampukila mu bwato. Bano bana-balume abaningija amba bafike ku ntanda, ino abakankalwa.

Yesu papo ukidi kasuku kandi ku lūlu. Waije’ko kitatyi kilampe. Ino pano wamone amba bandi bana ba bwanga badi mu kyaka kya kulobela na mabimbi a mema makatampe. O mwanda mwine watūka ku lūlu wafika ku mbadi nansha kufula kwa dijiba. Bine, Yesu usaka kukwasha bandi bana ba bwanga, o mwanda washilula kwibalonda wenda ulandala pa dijiba papukuma kivula!

Le bikekala namani shi kosake kulandala pangala pa mema?—Ukakulukila’mo, kadi ukokeja kushika panshi. Ino Yesu i mwishile na bantu bonso. Udi na bukomo bwishile na bwa bonso. Yesu usa kwenda lwendo lulampe pa kukafika kudi bwato. Bufuku kebusa kukya, penepo bana ba bwanga abamone Yesu wiya kobadi ulandala pa mema. Ino kebetabijepo kyokya kyobamona. Abakwatwa moyo bya mwiko, kebasame pa mwanda wa kutuyuka. Kupwa Yesu webanena’mba: “Tukijai mityima i amiwa uno, kemukwatwa moyo.”

Mwanda waka Yesu wādi ulonga bingelengele?

Yesu wikila’tu mu bwato, kivula kibatalala’tu nyā. Bana ba bwanga kebatendela monka. Kebafukamina Yesu ne kunena’mba: “I binebine nanshi abewa wi Mwana Leza.”—Mateo 14:22-33; Yoano 6:16-21.

Shi netu twādi’ko mu kyokya kyaba ne kwimwena batwe bene palonga Yesu bintu bya uno muswelo, mwene twādi ba kutendela’byo?—Le uyukile kyādi kilongela Yesu bino bingelengele?—Kyaādi ulongela bino bintu i kuswa kwaādi uswele bandi bana ba bwanga ne kadi wādi usaka kwibakwasha. Ino kadi wālongele bino bintu mwanda wa kulombola bukomo bukatampe bwaādi nabo ne bwakengidija mu mafuku āya kumeso pakekala Mulopwe wa Bulopwe bwa Leza.

Le Yesu ulamanga balondi bandi namani dyalelo?

 Nansha ke dyalelo dine Yesu wingidijanga bukomo bwandi mwanda wa kulama balondi bandi ku bukomo bulonga Satana bwa kwibemika baleke kusapwila bakwabo myanda ya Bulopwe bwa Leza. Inoko Yesu kengidijangapo bukomo bwandi mwanda wa kukinga bandi bana ba bwanga ku misongo nansha kwibondapa shi ababela. Nansha ke batumibwa ba Yesu bene bāfwile abo bonso mwenda mafuku. Yakoba mwanabo na Yoano wātapilwe, kadi ne Yoano mwine wākutyilwe mu kifungo.—Bilongwa 12:2; Kusokwelwa 1:9.

Ne dyalelo dine mo monka. Bantu bengidila Yehova ne boba kebamwingidilapo, bonso babelanga kadi bafwanga. Inoko panopano ponka, mu buludiki bwa Yesu, pasa kubikala bu Mulopwe wa Bulopwe bwa Leza, bintu bisa kushinta. Kekukekalapo kadi muntu wivwana moyo kashā, mwanda Yesu ukengidija bukomo bwandi ne kwesela dyese bonso bamukōkele.—Isaya 9:6, 7.

Bisonekwa bikwabo bilombola bukomo bukatampe bwa Yesu, mwine ubikikilwe na Leza bu Mulopwe wa Bulopwe bwa Leza, i Danyele 7:13, 14; Mateo 28:18; ne Efisesa 1:20-22.