Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 35

Tubwanya Kulanguka mu Lufu!

Tubwanya Kulanguka mu Lufu!

SHI tubafu, lelo Leza uswile kwitusangula, ko kunena’mba, kwitujokejeja monka ku būmi?—Yoba, muntu muyampe wādi ukulupile amba Leza usa kukamujokejeja ku būmi. O mwanda mwine pāmwene Yoba amba kasake kufwa, wānene Leza amba: “Shi abe ukēte, nankyo nka kwitaba.” Yoba wānene amba Yehova udi na mutyima wa kuloelelwa, nansha amba uswile mpata kukamusangula.—Yoba 14:14, 15.

Yesu udi pamo’nka bwa Shandi, Yehova Leza. Yesu uswile kwitukwasha. Pāmunene muntu umo ubela makopo amba, “Shi uswile, nankyo uyūke kuñundapapo,” Yesu wālondolwele amba: “Nswile ukome.” Penepo wāundapa muntu ubela’wa makopo andi.—Mako 1:40-42.

Le Yehova wālombwele namani amba uswele bana batyetye?

Yesu wāboile kudi Shandi ñeni ya kuswa bana batyetye. Misunsa ibidi mituntulu, Yehova wāingidije bengidi bandi kusangula bana batyetye. Ediya wālombele Yehova kusangula mwana wa mwana-mukaji wādi biyampe na Ediya. Yehova nandi wālongela monka.  Kadi monka Yehova wāingidija mwingidi wandi Edisha kusangula mwana mwana-mulume.—1 Balopwe 17:17-24; 2 Balopwe 4:32-37.

Mwene i kya kutendelwa pa kuyuka amba Yehova wituswele mpata?—Aye ketulangilangapo enka potukidi bōmi kete, ehe. Aye kadi wituvulukanga nansha shi tubafu. Yesu wānene amba Shandi umonanga boba bafwe baswele pamo’nka bwa abo bakidi bōmi! (Luka 20:38) Bible unena amba ‘nansha lufu, nansha būmi, nansha bintu bidipo panopano, nansha bikāyako kumeso, kebiketukalañanyapo na buswe bwa Leza.’—Loma 8:38, 39.

Pādi Yesu pano pa ntanda, wālombwele amba Yehova utele bana batyetye mutyima. Vuluka amba Yesu wādi ushiya’ko kyaba kya kusapwila bana batyetye myanda ya Leza. Ino le wadi kala uyukile amba Leza wāpele Yesu bukomo bwa kujokejeja banuke bafwile ku būmi?—Leka bidi twisambile’ko pa kusangula kwāsangwile Yesu kansongwakaji ka myaka 12, kana ka mukelenge umo wa dijina dya bu Yelusa.

Yelusa wikalanga ne mukajandi ne wandi mwana wa bunka pabwipi na dijiba dya Ngadilea. Difuku dimo kano kabo kana kana-kakaji kababela bikata, ne Yelusa wamone’tu amba kekasake kufwa. Washilula kulanga Yesu, yewa mwana-mulume wa kutendelwa waadi wivwana amba undapanga bantu. Penepo Yelusa waenda kukamukimba. Wakatana Yesu ku Dijiba dya Ngadilea, ufundija bantu bavule.

Yelusa wapite mu kibumbo ne kuponena ku maulu a Yesu. Kanena Yesu amba: ‘Kana kami, kana-kakaji, kabela’tu byamwiko. Le kukiya’po bidi wikondape, shi uswile? Nakwisāshila’po, wiye.’ Ponka’po Yesu waenda pamo ne Yelusa. Kibumbo kya bantu baile kutala Mufundiji Mukatampe nakyo kekyenda kilonda. Inoko bapwa’tu kwenda kyaba, bana-balume bamo batamba ku njibo ya Yelusa kebamusapwila amba: “Mwanobe wapu kufwa, lelo kadi i bika byōkambakenya Mufundiji pano?”

 Yesu waivwana binena bana-balume’ba. Yesu uyukile mobipepela Yelusa mutyima pa kujimija wandi mwana umo yenka. O mwanda mwine wamusapwila’mba: ‘Kokikwatwa moyo. Itabija’tu mudi Leza, ne obe mwana usa kwivwana biyampe.’ Ebiya abaenda kufika ne ku njibo ya Yelusa. Kwine’ko kudi balunda ba kisaka badila miyoa. Badi na bulanda mwanda mulunda nabo nkasampe wafu. Ino Yesu webanena’mba: ‘Lekai kudila. Mwana kafwilepo, ino ulēle mu tulo.’

Yesu pa kunena nabya, bantu abashilula kumusepa na kibengo mwanda bayukile amba mwana i mufwe’tu bya bine. Le penepa molangila, i kika kinenena Yesu amba ulēle mu tulo?—Momwena i bufundiji’ka bwasaka kufundija bantu? —Wibasakila bayuke amba lufu ludi pamo’nka bwa tulo tukata. Usaka kwibafundija bayuke amba na bukomo bwa Leza, ukokeja kujokejeja muntu mufwe ku būmi pakubulwa kukolelwa enka na motulangwilanga muntu ulēle mu tulo.

Le i ñeni’ka yotwaboila ku kusangulwa kwa mwanā Yelusa na Yesu?

Yesu watambija bantu bonso mu njibo washiye’mo enka batumibwa bandi, ba Petelo, Yakoba, ne Yoano ne ba shandya mwana ne inandi. Kupwa watwela mudi nsongwakaji’wa. Wamukwata ku kuboko kanena’mba: “Abe mwana, langukapo!” Ponka’po walanguka  kaenda ne kwenda! Ba shandi ne inandi abayulwa nsangaji bā.—Mako 5:21-24, 35-43; Luka 8:40-42, 49-56.

Shi ke pano langa’po bidi. Yesu byaājokejeje uno nsongwakaji ku būmi, lelo abulwe’po ne kukasangula bantu bakwabo muswelo umo onka?—Lelo molangila ukebasangula binebine?—Bine, ukebasangula. Yesu aye mwine wānene amba: “Mwaka wiyako’wa bonso badi mu bibundu bakevwana diwi [dyami] ne kutamba bakatambemo.”—Yoano 5:28, 29.

Lelo molangila Yesu uswile kusangula bantu?—Kimfwa kikwabo kidi mu Bible kiketukwasha tulondolole kino kipangujo. Kyokya kyālongekele difuku dikwabo mu kibundi kya Neni kilombola muswelo Yesu waivwaninanga bantu badi mu madilo bulanda.

Mwana-mukaji umo wadi wenda na kibumbo kya bantu badila batamba mu Neni na lufu lwa wandi mwana mwana-mulume. Dibajinji bidi wandi mulume wāfwile, pano napo ke wandi mwana, wandi umo enka, wafwa. Bine, udi na bulanda kashā! Bantu bavule ba mu Neni benda balonda ponso pobaselele umbidi wa mwana mufwe’wa panja pa kibundi. Uno lolo udila ne mipolo izululuka, bantu ababulwe ne mwa kumusengela mwine.

Mu dino difuku’di, Yesu ne bandi bana ba bwanga badi benda ku kibundi kya Neni. Kufika pabwipi na kibelo kya kibundi, abasambakana kibumbo kya bantu benda kukajika mwana wa uno lolo. Yesu pa kumona mudidila uno lolo, wamukwatyilwa lusa. Mutyima wandi ubatenekwa na bulanda bwandi bukatampe. Wasake kumukwasha.

Penepo wamunena na kinyenye koku usumininwe, amba: “Kokidila mipolo.” Buyampe bwandi ne kilongwa’kya kibafikija bonso kumubambila meso sō. Ponso penda pafwena Yesu ku umbidi mufwe’wa, bonso abatulumuka kebatale byasa kulonga. Yesu wesambe na lupusa amba: “Abe nsongwalume! nakunena: Languka!” Enka ponka’pa wabuka kashikete! Kanena ne kunena.—Luka 7:11-17.

 Langa’po bidi mweivwanina uno lolo! Shi wadi’mba i abe longa le ubeivwana namani pa kutundaila muntu oswele wadi mufwe waikala mūmi monka?—Lelo kino kekilombolapo amba Yesu uswele bantu binebine ne kadi amba uswile kwibakwasha?—Fwatakanya’po mokikekadila kya kutendelwa kashā pakatundailwa bantu bakasangulwa mu ntanda impya ya Leza!—2 Petelo 3:13; Kusokwelwa 21:3, 4.

Le lusangukilo lwa uno mwana umo enka wa uno lolo lulombola kika?

Mu kine kitatyi’kya bamobamo bakasangulwa bakekala bantu botwādi tuyukile kala, kubadila’mo ne bana batyetye bene. Tukebayuka amba i ba kampanda pamo’nka bwa Yelusa mwāayukile wandi mwana pāmusangwile Yesu. Bakwabo bakekala bantu bāfwile ke kupite tutwa nansha tununu twa myaka. Ino Leza kakebelwapo mwanda’po’tu bāikele’ko ke papite myaka mivule bininge.

Mwene i kya kutendelwa pa kuyuka amba Yehova ne wandi mwana Yesu, betuswele bikata?—Kyobetusakila, kekwikalapo na būmi bwa myaka mityetye, ehe, ino i na būmi bwa nyeke ne nyekeke!

Pa kuyuka lukulupilo lwa kutendelwa lutala pa bafwe, tanga Isaya 25:8; Bilongwa 24:15; ne 1 Kodinda 15:20-22.