Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 48

Ntanda Impya ya Leza ya Ndoe—Nobe Ubwanya Kwikala’mo

Ntanda Impya ya Leza ya Ndoe—Nobe Ubwanya Kwikala’mo

LEZA wātūdile ba Adama ne Eva mu budimi bwa Edena. Nansha byokebāikelepo kukōkela ne kufwa bāfwa, Leza wāsakile amba babo bana, kubadila’mo ne batwe bene ba dyalelo, bekale na būmi bwa nyeke mu Paladisa. Bible ulaya’mba: “Boloke bakapyananga ntanda, ne kwikala monka nyeke.”—Mitōto 37:29.

Bible wisambila pa “madiulu mapya” ne “ntanda mipya.” (Isaya 65:17; 2 Petelo 3:13) “Madiulu” a dyalelo i maludiki a bantu adi’ko dyalelo, ino Yesu Kidishitu ne boba ba kubikala pamo nandi momwa mūlu o akekala “madiulu mapya.” Bine, kikekala kya kutendelwa kitatyi kikaludikwa ino ntanda yonso na ano madiulu mapya, ko kunena’mba buludiki boloke bwa Leza bwa ndoe!

Lelo penepo, “ntanda mipya” nayo i ntanda’ka?—Ntanda mipya i boba bantu bayampe baswele Yehova. Ubaivwana, shi Bible wisambila pa “ntanda,” kitatyi kimo ifunkilanga pa bantu badi pano pa ntanda, ke pa nshi minepo, mhm. (Ngalwilo 11:1; Mitōto 66:4; 96:1) Nanshi bantu babundile ntanda impya bakekalanga enka pano panshi.

Ino ntanda ya bantu babi keikekala’kopo monka. Vuluka amba, Dilobe dya mu mafuku a Noa dyātukije ntanda imbi ya bantu. Kadi, enka na motwefundile’kyo kala’mwa, ino ntanda imbi ya dyalelo nayo ikonakanibwa ku Amakedona. Shi ke pano, tutale mwine mukekadila būmi mu ntanda impya ya Leza kupwa kwa Amakedona.

Lelo nobe usaka kukekala na būmi bwa nyeke mu Paladisa mu ntanda impya ya Leza ya ndoe?—Kekudipo muñanga nansha umo ubwanya kwitupa būmi bwa nyeke. Kekudipo lawa nansha bwanga  bubwanya kwitulama tuleke kufwa. Dishinda dimo kete dya kwitufikija ku būmi bwa nyeke i kufwena kudi Leza. Mufundiji Mukatampe i mwitusapwile mwa kufwenena kudi Leza.

Tupūtule bidi Bible wetu mu Yoano shapita wa 17, vese wa 3. Tutanga’mo bino binenwa bya Mufundiji Mukatampe, amba: “Ebiya’mba, bakuyūke, abe Leza enka wa binebine, ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.”

Pa kino, le Yesu wānene amba i bika byotufwaninwe kulonga pa kusaka’mba tumone būmi bwa nyeke?—Dibajinji, tufwaninwe kuyuka Tata wetu wa mūlu, Yehova, ne kuyuka wandi Mwana, wāpēne būmi bwandi pa mwanda wetu. Kino kilombola’mba tufwaninwe kwifunda Bible. Dino dibuku, Boila Ñeni Kudi Mufundiji Mukatampe, ditukwasha kwifunda Bible.

Inoko kwifunda myanda ya Yehova kuketukwasha namani tumone būmi bwa nyeke?—I namino, enka na motusakilanga kudya bidibwa difuku ne difuku, mo monka mobitusakila kwifunda myanda ya Yehova difuku ne difuku. Bible unena’mba: “Muntu nanshi kakamwenapo būmi mu mikate yonka, mhm, poso mu myanda yonso ītamba mu kyakanwa kya Mwine Leza.”—Mateo 4:4.

Kadi tufwaninwe ne kuyuka Yesu Kidishitu mwanda Leza wātumine uno wandi Mwana mwanda wa kwitutalula bubi bwetu. Bible unena’mba: “Kadi mutupu mukwabo, nansha umo, wakupandilwako.” Kadi Bible unena monka’mba: “Wakwitabija mudi Mwana nabya udi ne būmi bwa kulādila monka nyeke ne nyeke.” (Bilongwa 4:12; Yoano 3:36) Penepa, “kwitabija” mudi Yesu kishintulula namani?—Kishintulula’mba twi betabije Yesu binebine ne kuyuka’mba ketubwanyapo kwikala na būmi bwa nyeke kwampikwa aye. Lelo netu twitabije kino?—Shi twi betabije uno mwanda, nabya tukendelela kuboila ñeni kudi Mufundiji Mukatampe difuku ne difuku, kadi tukalonga byanena.

Muswelo umo wa kwitukwasha twikale kuboila ñeni kudi Mufundiji Mukatampe i kutanga kino kitabo misunsa ne misunsa ne kutala  bifwatulo bidi’mo ne kulangulukila’po. Tompa bidi shi ukokeja kutana malondololo a bino bipangujo bidi pa bifwatulo’bi. Ne kadi, tangai kino kitabo pamo na inobe nansha shobe. Shi bambutwile bobe kebadipo kokwa kodi, nankyo tangai’kyo pamo na batame bakwabo ne na bana bakwabo. Mwene i kiyampe shi ukwasha bantu bakwabo nabo baboile ñeni kudi Mufundiji Mukatampe na kuyuka byobya byobafwaninwe kulonga mwanda wa nabo bakekale na būmi bwa nyeke mu ntanda impya ya Leza?—

Bible witulombola’mba: “Panopantanda papitanga.” Ino kadi Bible witushintulwila ne mwa kumwena būmi bwa nyeke mu ntanda impya ya Leza. Unena’mba: “Yewa ulonga kiswa-mutyima wa Leza aye wikele nyeke.” (1 Yoano 2:17) Le penepa tukalonga namani shi tusaka tukekale mu ntanda impya ya Leza?—Bine, tufwaninwe kwifunda mwanda wa kuyuka Yehova ne wandi Mwana muswedibwe, Yesu. Ino tufwaninwe kadi kulonda byobya byotufunda. Bine, tusaka kwifunda kowifunda kino kitabo kukukwashe ulonge bino bintu.