Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 38

Mwanda Waka Tufwaninwe Kuswa Yesu

Mwanda Waka Tufwaninwe Kuswa Yesu

FWATAKANYA bidi shi udi mu bwato bwenda bulobela. Mwene ukasaka amba muntu kampanda akupandije?—Le umona namani shi muntu wajimija būmi bwandi mwanda wa kukupandija?—Eyo, kino kyo kyālongele Yesu Kidishitu. Enka na motwefundile kala mu Shapita wa 37, wāpēne būmi bwandi bu kikūlwa mwanda wa tumone kupanda.

Shako, Yesu ketupandijepo ku kulobela mu mema. Le i ku bika kwaetupandije? Le ukivulukile’ko?—I ku bubi ne lufu byotupyene batwe bonso kudi Adama. Yesu wāfwidile nansha ke bantu balonga bintu bibi bininge bene. Le abe ukokeja kutūla būmi bobe mu kyaka mwanda wa kupandija bantu ba uno muswelo?—

Bible unena amba: ‘Kekudipo wa kufwila moloke; padi ku muyampe, kepabulwe, bamobamo baketūlapo kumufwila.’ Ino, Bible ushintulula amba Yesu aye “wafwidile bakubulwa bwine-Leza.” Bine, i kubadila’mo ne boba kebengidilapo Leza bene! Kadi Bible unena’mba: “Po twakidi bipya-mambo [tukilonga bintu bibi], Kidishitu wetufwila.”—Loma 5:6-8.

Le ukokeja kuvuluka’ko mutumibwa umo wādi uloñanga dibajinji bintu bibi bininge?—Mwine mutumibwa’ye wālembele amba: “Kidishitu Yesu waile pano pantanda kupandija babipyamambo, ami ye mwine kipyamambo mutabuke.” Uno mutumibwa wānenene namino i Polo. Unena amba wādi bidi ‘wampikwa ñeni’ ne amba wādi ulonga “bibibibi.”—1 Temote 1:15, MB; Tetusa 3:3, MB.

Langa’po’tu bidi buswe bukatampe bwādi na Leza pa kutuma wandi Mwana kufwila ne bantu ba uno muswelo! Ubulwe’po bidi  kuyata Bible obe, tutange uno mwanda mu Yoano shapita wa 3, vese wa 16. Panena amba: “Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.”

I masusu’ka āsusukile Yesu pa kwitupānina būmi bwandi?

Yesu wālombwele patōka amba wādi na buswe bumo bonka na bwādi na Shandi. Ukokeja kuvuluka kino mu Shapita wa 30 wa dino dibuku, twatangile’mo pa bitala masusu amoamo āsusukile Yesu bufuku bobāmukwete. Bākamutūdile ku njibo ya Kitobo Mukatampe Kefasa, kobākamusambije. Bāiya’mo na batumoni ba mabela ba kuponeja Yesu bya mabela, koku bantu bamukupila bikoni ne mapi. Kino kyo kitatyi kyātunine Petelo amba kayukilepo Yesu. Pano tufwatakanye pamo’nka bwa batwe badi pene’pa ne kumona byonso bipita’ko.

Bufuku bubaki. Yesu, mulume nobe, wadi’nka bwimwa bufuku bonso. Kisambo kya bufuku byokyadi kyampikwa kwendela’mo mungya bijila, bukidibukidi bonka babitobo ababunge Sanhedrini, ko kunena amba kidye kikatampe kya Bayuda, kebakwata kidye kikwabo. Mwine’mwa abasambila monka Yesu amba unenenanga Leza bibibibi.

Kupwa babitobo abakute Yesu myonji, abamutangija kebenda nandi kwa Pilato, mbikavu mwine Loma. Kebasapwila Pilato amba: ‘Yesu unenenanga umbikalo bibi. Ufwaninwe enka kwipaibwa.’ Ino Pilato wajingulula amba babitobo ababepa mabela. Ebiya Pilato webasapwila amba: ‘Nkimwenepo kabubi nansha kamo kalongele uno muntu. Nsa kumulekelela.’ Ino babitobo ne bantu bakwabo abatūta kyungwe amba: ‘Anha! Mwipaye!’

Kitatyi pa kupitapo, Pilato watompa monka kusapwila bantu amba usa kulekelela Yesu eendele shandi. Inoko babitobo abasoñanya bibumbo bya bantu kwela mbila amba: ‘Shi umulekelele, nankyo nobe ufutulwile bubikavu! Mwipaye afwe!’ Kyungwe kya bibumbo kibatonda. Le uyukile kyalonga Pilato?—

 Pano wanekena. Dibajinji wanena bakupile Yesu nsonde. Kupwa wamupāna kudi basola amba bakamwipaye. Abavwika Yesu kilukwa kya miba ku mutwe, kebamusepa bya kibengo na kumufukatyila. Kupwa abatwika Yesu mulamba nansha mutyi mukata wa kusela, abalupukila nandi panja pa kibundi kufika ne kuntu kobeta bu Kiboyongolo. Pa kufika, abapopela makasa ne maulu a Yesu ku mutyi. Kupwa abaimika mutyi bwimwa papo Yesu, mulume nobe kayela’ko. Mashi koku amuzululuka. Bimusansa bininge mpata.

Yesu kafwilepo ponka na ponka. Ino ukiyela bidi enka ku mutyi. Babitobo bakatampe kebamusepa bya kibengo. Ne bapityeshinda nabo kebamunena amba: ‘Shi abe wi Mwanā Leza, tūka ku mutyi wa  masusu’ko!’ Ino Yesu uyukile kine kimutumīne Shandi kulonga. Uyukile amba ufwaninwe kupāna būmi bwandi bubwaninine mwanda wa tukamone būmi bwa nyeke. Ku mfulo, kubwipi na nsa isatu ya ku kyolwa, Yesu waabija Shandi na diwi dikata ne kufwa wafu.—Mateo 26:36–27:50; Mako 15:1; Luka 22:39–23:46; Yoano 18:1–19:30.

Bine, Yesu wādi mwishile kulampe na Adama! Adama kādipo na buswe bwa kuswa Leza. Kākōkelepo Leza. Kadi Adama kādipo wituswele. Pa mwanda wa bubi bwaālongele, batwe bonso tubutwilwanga mu bubi. Ino Yesu aye wādi uswele Leza ne batwe bene kumo. Wādi ukōkele Leza mafuku onso. Kadi wāpēne būmi bwandi mwanda wa kutalula bibi bitukolomwenine Adama.

I bika byotubwanya kulonga pa kulombola amba tuswele Yesu?

Lelo nobe utendelanga kino kintu kikatampe mpata kyālongele Yesu?—Polombelanga kudi Leza, le umufwijanga’ko pa kwitupa kwaetupele wandi Mwana?—Mutumibwa Polo wātendele kyokya kyāmulongēle Kidishitu. Polo wālembele amba Mwanā Leza “wānsenswe, ne kwipana aye mwine padi ami.” (Ngalatea 2:20) Yesu wākufwidile abe ne ami mwine. Bine, wāpēne būmi bwandi bubwaninine amba tumwene’ko būmi bwa nyeke! Bine buno bo bubinga bwine bukata botufwaninwe kuswela Yesu.

Mutumibwa Polo wālembēle bene Kidishitu ba mu kibundi kya Kodinda amba: ‘Buswe bwa Kidishitu bwituningilanga.’ Lelo buswe bwa Kidishitu bwituningilanga tulonge bika? Le ulanga’po namani?—Tala kilondololwa kya Polo: ‘Kidishitu wafwidile bonso’mba  bekale na būmi ponka padi aye. Kebakeikadilangapo na būmi bwa kwisangaja abo bene, mhm.’2 Kodinda 5:14, 15.

Le ulanga i mu bika mobwanya kwilombola amba nobe udi na būmi bwa kusangaja Kidishitu?—Eyo, dishinda dimo i kusapwila bakwenu byowifundile padi. Nansha kadi langa bidi pa kino: Ukokeja kwikala pa bunka bobe, inobe nansha shobe kebakokejapo kumona byolonga, kadi i kutupu muntu mukwabo ubwanya kukumona. Lelo ukabandila ku televijo nansha ku Entelenete bintu byoyukididile’tu amba kebisangajapo Yesu?—Vuluka amba, Yesu bine i mūmi ne ubwanya kumona kintu kyonso kyotulonga!

Le i ani ubwanya kumona kantu konso kotulonga?

Bubinga bukwabo botufwaninwe kuswela Yesu i buno: tusakanga kwiula Yehova. Yesu wānene amba: ‘Tata unswele.’ Le uyukile mwanda waka aye uswele Yesu ne mwanda waka netu tufwaninwe kumuswa?—I pa mwanda Yesu wāsakile kufwa pa kusaka amba kiswa-mutyima kya Leza kilongeke. (Yoano 10:17) Nanshi tulonge kyokya kitunena Bible amba: “Mwikale bakulonda Leza bu-bāna bakuswedibwa. Munangile monka mu lusa, monka mwimusanshilwe Kidishitu nandi, pa kwitwipanina aye mwine padi bātwe.”—Efisesa 5:1, 2.

Pa kusaka amba utamije mutyima wa kufwija’ko Yesu pa mwanda wa byaetulongēle, tanga Yoano 3:35; 15:9, 10; ne 1 Yoano 5:11, 12.