Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 17

Muswelo wa Kwikala na Nsangaji

Muswelo wa Kwikala na Nsangaji

I kika kikadije Yehova bu ‘Leza wa nsangaji’?

BATWE bonso tusakanga kwikala na nsangaji, mwene i amo?—Ino na bubine ke bantupo bavule badi nayo. Lelo uyukile kyokebekadilepo nayo?—Mwanda kebayukilepo kine kiletanga nsangaji. Bafwatakanya amba kwikala na bintu bivulevule o muswelo wa kwikala na nsangaji. Inoko bapwa kumona bino bintu, nsangaji yabo ne kwendaenda’yo kwine mpika.

Tala kintu kine kya mvubu kileta nsangaji. Mufundiji Mukatampe wānene amba: “Dyese dyakupana ditabukile dyakupebwa.” (Bilongwa 20:35) Shi ke pano, i muswelo’ka wa kwikala na nsangaji?—Bine, i kupa bakwetu bintu ne kwibalongela bya kwibalongela. Lelo wādi kala uyukile kino?—

Tulange’po bidi monka. Lelo Yesu wānene amba muntu utambula kyabuntu kampanda kakekalapo na nsangaji?—Ehe, kānenepo nankyo. Abe  usangelanga kutambula byabuntu, mwene i amo?—Bantu bonso basangelanga’byo. Tusepelelanga potutambulanga bintu biyampe.

Inoko Yesu wānene amba nsangaji ya potupāna yo mine itabukile bukata. Molangila, le i ani upele bantu bintu bivule mpata kupita muntu ye-yense?—I amo, i Yehova Leza.

Bible unena amba Leza ye mwine ‘upāna ku bonsololo būmi ne umpuya ne bintu byonso.’ Witupanga mvula wa mūlu ne mwinya, mwanda wa kutamija mityi ne bikunanwa netu ketumwena’ko bidibwa. (Bilongwa 14:17; 17:25) Ke kya kutulumukapo shi Bible wita Yehova bu ‘Leza wa nsangaji’! (1 Temote 1:11) Kupāna i kimo kya mu byobya bilengeja Leza ekale wa nsangaji. Netu shi tupāna, tukekala na nsangaji.

I kika kikakupa nsangaji bininge kupita’ko kudya bitumbula byobe byonso bunka bobe?

Shi ke pano, lelo i bika byotubwanya kupa bantu bakwabo? Le ulanga’po namani?—Dimodimo kyabuntu kilombanga lupeto. Shi i kyabuntu kitanwa ku mangajini, bikulomba kukapota’kyo. Nanshi pa kusaka kupāna kyabuntu kya uno muswelo, bikusakila bidi kubika lupeto enka ne byolukabwana penepa kokapote kyabuntu’kya.

Ino ke byabuntu byonsopo bipotwanga. Kimfwa, difuku dyokudi kyanga, na bubine nkopo wa mema atalala ufukatyijanga mutyima. Nanshi shi upa muntu udi na kyumwa kino kyabuntu, ubwanya kumwena’mo nsangaji ya kupāna.

Padi dyuba dimo abe ne inobe mukokeja kukanga bitumbula. I biyampe mpata. Ino le ukokeja kulonga kika kya kukupa nsangaji na bitumbula bimo pa kyaba kya kwibidya bunka bobe?—Bine, ukokeja kupa’ko muntu mukwabo nansha balunda nobe ku buntu. Lelo ubulwe kulonga namino kyaba kikwabo?—

 Mufundiji Mukatampe ne batumibwa bandi abo bonso bādi bayukile nsangaji ya kupāna. Lelo uyukile kyobādi bapāna ku bantu bakwabo?—Bine i kintu kitabuke bintu byonso buya mu ino ntanda! Bādi bayukile bubinebine butala padi Leza, kadi bādi basapwila bakwabo ino myanda miyampe na mutyima tō. Bādi basapula’yo kwampikwa kukimba muntu ebafute lupeto pa mwanda wa byobādi bapāna.

Difuku dimo mutumibwa Polo ne mulunda nandi muyampe mwanā bwanga Luka bātene mwana-mukaji umo wādi nandi usaka kwikala na nsangaji ya kupāna. Bāmutene kubwipi na munonga. Polo ne Luka bāendele’ko mwanda bāivwene amba i ku kyaba kya milombelo. Ne i bine, pobāfikile’ko, bēkutene bana-bakaji bādi balombela.

Polo wāshilula kusapwila bano bana-bakaji myanda miyampe ya Yehova Leza ne Bulopwe bwandi. Mwana-mukaji umo wādi utelwa dya bu Didya, nandi wādi wivwana na katentekeji. Pa kupwa, Didya wāsakile kulonga’po kintu kilombola amba wasangela myanda miyampe yaāivwene. Penepo wāzenza ba Polo ne Luka amba: “Shi mubamone’mba naitabija Mfumwetu binebine, nankyo iyai mukashikate kwami.” Kupwa wēbatundaila ku njibo yandi.—Bilongwa 16:13-15, MB.

Lelo Didya unena ba Polo ne Luka bika?

Didya wādi usepelele kwikala na bano bengidi ba Leza mu njibo yandi. Wēbaswele mwanda bāmukweshe kuyuka myanda itala Yehova ne Yesu ne muswelo bantu obakokeja kukamona būmi bwa nyeke. Byāmupele nsangaji pa kupa ba Polo ne Luka bidibwa ne kyaba kya kulāla. Nanshi kupāna kwa Didya kwāmupele nsangaji mwanda wādi usaka kupāna binebine. Uno i mwanda otufwaninwe kuvuluka. Padi muntu kampanda ubwanya kwituningila tulete kyabuntu. Ino shi ketusakilepo kwikipāna binebine, nansha shi tubapāna’kyo ketukekalapo na nsangaji.

Mwanda waka Didya waikala na nsangaji pa kupa ba Polo ne Luka bisakibwa byabo?

Kimfwa, ulanga namani shi udi na mabombo osaka kulamba? Shi nakunena amba abila’ko mwana mukwabo nandi, lelo ukasangela kumupa’ko ponka na ponka?—Inoko ukalonga namani shi ubetana na mulunda osenswe bininge kitatyi kyodi na mabombo? Shi abe’wa  mwine ubalanga kupa’ko mulunda nobe amo, mwene kikakusangaja?—

Byaba bikwabo tukokeja kuswa muntu mpata ne kusaka kumupa kintu kyonso kyotudi nakyo kwampikwa batwe bene kushala’ko nansha na kantu kamo. Uno o muswelo otufwaninwe kupa Leza, penda patama buswe botumuswele.

Mwanda waka uno mwana-mukaji mulanda wāikele na nsangaji pa kupāna tonso twaādi nato?

Mufundiji Mukatampe wādi uyukile mwana-mukaji mulanda wālongele uno muswelo. Wāmumwene ku tempelo mu Yelusalema. Wādi’tu’nka na tubityele tubidi kete twa lupeto; ye tonka twaādi nato. Ino wāelele’to tonso tubidi mu kasanduku ka milambu nansha ka kyabuntu ka mu tempelo. Kekudipo wāmunene kutūla’to. Bantu bavule bādi’po kebāyukilepo amba wātūdile’to. Ino wātūdile’to mwanda aye mwine wādi usakile ne pa mwanda wa Yehova waādi uswele binebine. Kupāna kwāmupele nsangaji.—Luka 21:1-4.

Kudi miswelo mivule yotukokeja kupāna. Lelo ubwanya kuvuluka’ko imo?—Shi tupāna na kusaka kwetu, tukekala na nsangaji. O mwanda mwine Mufundiji Mukatampe witusapwila’mba: “Mwikale kupana.” (Luka 6:38) Shi tupāna, tukasangaja bakwetu. Ne batwe bene tukekala na nsangaji kupita bonso!

Tutange’ko myanda mikwabo ilombola kupāna mokuletelanga nsangaji, mu Mateo 6:1-4; Luka 14:12-14; ne 2 Kodinda 9:7.