Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 40

Mwa Kusangeja Leza

Mwa Kusangeja Leza

LE BIKA byotukokeja kulonga mwanda wa kusangaja Leza? Lelo kudi kintu kampanda kyotubwanya kumupa?—Yehova unena’mba: “Banyema bonso ba muntanda i bami.” Kadi unena amba: “Ndalama i yami, ne nsahabu mine i yami.” (Mitōto 24:1; 50:10; Hakai 2:8) Inoko, kudi kintu kyotubwanya kupa Leza. Le i kintu’ka?—

Yehova i mwituleke batwe bene tutonge kumwingidila nansha kuleka kumwingidila. Aye ketuningilangapo amba tulonge enka byaetusakila kulonga, ehe. Pano tutompe bidi kujingulula mwanda waka Leza i mwituleke batwe bene tutonge kumwingidila nansha kuleka kumwingidila.

Padi uyukile mashini kampanda mapungilwe kwingila nao kaji. Mashini a uno muswelo aloñanga enka byobya byoasakilwa kulonga na wiapungile. Mashini keakokejapo kwitongela ao mene kya kulonga. Yehova wādi ukokeja kwitulonga pamo’nka bwa mashini. Wādi ukokeja kwitulonga mwanda wa tulonge enka byaetusakila kulonga. Ino Leza kālongelepo namino. Le uyukile kyākalongēlepo uno muswelo?—Eyo, bikaibwa nabyo bimo bidi pamo’nka bwa mashini. Shi muntu wafinye pa buto, bilonga enka byobya byobapwile kwibitongela kulonga kudi yewa wibilongele. Le kodi mumone kikaibwa nakyo kya uno muswelo?—Pavule  bantu bakōkanga kukaya nabyo mwanda biloñanga enka byobya byobebitungīle kulonga, nansha byobebilongele. Leza kasakilepo tumukōkele mwanda’po tupwile kala kwikala andi mashini mapungilwe’nka kumwingidila. Yehova usaka tumwingidile mwanda tumuswele kadi tusakanga kumukōkela.

Mwanda waka Leza ketulongelepo pamo bwa ano mashini?

Le ulanga Tata wetu wa mūlu wivwananga namani ku mutyima shi tumukōkela na kusaka kwa batwe bene?—Nsapwile bidi, le bilongwa byobe biteñanga bambutwile bobe ku mutyima namani?—Bible unena amba mwana wa ñeni “usangaja shamuntu,” ino unena kadi amba mwana mulembakane “i njia ya inandi.” (Nkindi 10:1) Mwene ubamone amba shi ulonga byobya bikunena ba shobe ne inobe bibasangajanga?—Ino le bakeivwana namani ku mutyima shi kwibakōkelapo?—

I muswelo’ka okokeja kusangaja Yehova ne bambutwile bobe?

Pano tulangile bidi Yehova, Tata wetu wa mūlu nandi. Aye i mwitulombole muswelo otubwanya kumusangaja. Kwata’po bidi Bible obe, upūtule mu Nkindi 27:11. Leza witunena’mo amba: “Wami mwana, wikale wañeni ne kusangaja mutyima wami, amba nondolole yewa umpunika.” Le uyukile kupunika muntu mokushintulwila?—Na bubine, muntu ukokeja kukupunika shi ukusepa koku ukunena amba kubwanyapo kulonga byowadi unena amba usa kubwanya’byo. Ino le Satana upunikanga Yehova muswelo’ka?—Tutale bidi.

Vuluka, twefundile mu Shapita wa 8 wa kino kitabo amba Satana usakanga kwikala Muntu Umbajinji ne kadi amba usakanga bantu bonso bamukōkele aye. Satana unenanga bantu amba kyobatōtela  Yehova i enka’tu pa mwanda wa būmi bwa nyeke bwasaka kwibapa. Satana pa kupwa kutombola ba Adama ne Eva baleka kukōkela Yehova, Satana wādi kadi kakolomona Leza. Kāsapwila Leza amba: ‘Bantu bakwingidila’tu mwanda wa bintu byowibapa. Abe ndekele’tu kyaba, umone monsa kwibatalwila kodi.’

Kupwa kwa Adama ne Eva kulonga bubi, le Satana wākolomwene Yehova namani?

Shako na bubine, bino binenwa kebinenwepo mu Bible namino. Ino potutanga mwanda wa Yoba, i bimweke patōka amba Satana wānene Leza kintu kiifwane na kino’ki. Na bubine, uno wādi mwanda mukatampe ku meso a Satana ne a Yehova mwine, kuyuka shi Yoba ukōkele Leza nansha shi kamukōkelepo. Tupūtule Mabible etu mu Yoba shapita 1 ne 2 tumone mobyāpityile.

Tala kinenwe mu Yoba shapita 1, amba bamwikeulu pa kwiya ku meso a Yehova, Satana nandi waiya’ko. Penepa Yehova waipangula Satana amba: “Lelo koiya i kwepi, a?” Satana walondolola amba nadi ñendakana koku ne koku panshi. Penepo Yehova wamwipangula monka amba: ‘Lelo umutalanga mwingidi  wami Yoba, uñingidilanga kadi kaloñangapo kabi nansha kamo?’—Yoba 1:6-8.

Ponka’po Satana webingija. Amba, ‘Yoba kyakutōtela’tu kine i pa mwanda wa kwikala kwaikele’nka mu biyampe. Shi uleke’tu kumukinga ne kumwesela, ukakutuka ku mpala yobe.’ Penepa Yehova nandi amba: ‘A Satana, nanshi pano mulonge’tu kyonso kyosaka, ino kokalonga Yoba mwine kibi.’—Yoba 1:9-12.

Le Satana nandi walonga’po bika?—Watonona bantu bāye kwiba bañombe ba Yoba ne bimbulu ne kwipaya boba badi bebalama. Kupwa mudilo wa nzaji nao ubapone, ubasoka mikōko ne bakumbi bayo bene. Kitatyi pa kupita’po, bantu abaibe bangamedia ne kwipaya boba badi bebalama. Ku mfulo, Satana wapukumija luvula lukatampe lubaponeja njibo mwādi bana ba Yoba dikumi dituntulu, abafu bonsololo. Nansha Yoba byaafikilwa na bino byonso’bi, aye ukingidila’nka Yehova.—Yoba 1:13-22.

Yehova pa kumona Satana dikwabo, wamulombola muswelo wimanije Yoba na kikōkeji. Satana webingija, amba: ‘Shi undeke’tu ntenge ngitu yandi, ukakutuka ku mpala yobe.’ Penepo Yehova waleka Satana kutenga ngitu ya Yoba, ino wamudyumuna amba kokepaya Yoba.

Le Yoba wāuminine bika, ne mwanda waka kyāsangeje Yehova?

 Satana wameneja Yoba mpusu ya bilonda bisansa ngitu yonso. Binunka bibibibi, o mwanda kekukidipo muntu usaka kumufwena pabwipi. Enka ne mukaja Yoba mwine kamunena amba: ‘Tuka Leza ufwe!’ Boba betela bu balunda ba Yoba abaiya kumupempula ne kumunena bishima bisansa amba kabudilwepo’tu kulonga bintu bibi mpata, o mwanda nabyo bibamuletela bino byamalwa byonso’bi. Nansha Satana byawaletela Yoba bino byamalwa ne misanshi yonso’i, inoko Yoba aye wingidila’nka kwingidila Yehova na kikōkeji.—Yoba 2:1-13; 7:5; 19:13-20.

Molangila, le Yehova wētelekele namani ku mutyima pa kumona kikōkeji kya Yoba?—Kyāmusangeje, o mwanda Yehova wāsapwidile Satana amba: ‘Ubamone Yoba! Uñingidilanga mwanda usakile kuñingidila.’ Lelo nobe ukekala pamo bwa Yoba, bu muntu Yehova wakokeja kufunka bu kimfwa kya kujingulula nakyo Satana?—Bine, i dyese kupa Leza malondololo atuluja mifwatakanyo ifwatakanya Satana amba ubwanya kongola muntu yense aleke kwingidila Yehova. Bine, ne Yesu nandi wēkimwene bu dyese.

Mufundiji Mukatampe kālekelepo nansha dimo Satana amutonwene ku kulonga kintu kibi. Bine, langa’po kyandi kimfwa mokyāikele kusangeja Shandi! Yehova wādi ukokeja kufunka Yesu ne kulondolola Satana amba: ‘Tala wami Mwana! Wālama kikōkeji kya binebine kondi mwanda unswele!’ Langa’po kadi nsangaji idi nayo Yesu ku mutyima pa kusangaja mutyima wa Shandi. Yesu wāuminine ne lufu lwa kufwa ku mutyi wa masusu mwanda wādi na mine nsangaji’i.—Bahebelu 12:2.

Le nobe usakile kwikala pamo bwa Mufundiji wetu Mukatampe ne kusangaja Yehova?—Nabya endelela na kwifunda byobya bikusakila Yehova kulonga, ne kadi musangaje na kulongela monka!

Tanga byobya byālongele Yesu mwanda wa kusangaja Leza ne byotufwaninwe netu kulonga, mu Nkindi 23:22-25; Yoano 5:30; 6:38; 8:28; ne 2 Yoano 4.