Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 32

Muswelo Wālaminwe Yesu

Muswelo Wālaminwe Yesu

DIMODIMO Yehova uloñanga bintu bya kutendelwa mwanda wa kukinga bankasampe ne boba kebabwanyapo kwikinga abo bene. Shi ubaenda mu ntanda, ukamona muswelo umo uloñanga Yehova kino kintu. Inoko dibajinji kukokejapo padi kwivwanija kine kilongeka’kya.

Ukokeja kumona kyoni kya mu ntanda kitumba panshi pabwipi nobe. Kimweka bu kitapwe bilonda. Kibulula dipapa dimo panshi ne kusonsoloka shi kowikifwena. Abe ulonda kyoni’kya, akyo nakyo kyenda kumeso abe kwikipeta mpika. Kupwa, na mu kukopa kwa diso, kyoni kyatumbuka. Bine, dipapa dyakyo kedyadipo na kilonda nansha! Lelo uyukile kyadi kilonga kyoni’kya?—

Bine, pabwipi na padi kyoni’pa padi pafyeme twana twakyo mu kimuna. Kyoni kya twana kyadi kityina amba abe wakakwata twana ne kwitusanshija. O mwanda kyadi kiengelekeja bu kitapwe mwa kukupalwila ku twana. Lelo uyukile yewa ubwanya kwitulama pamo bwa kyoni kilama twana twakyo?—Mu Bible, Yehova i mudingakanibwe na kyoni kitwa bu mukebo, mwanda kikwashanga twana twakyo.—Kupituluka 32:11, 12.

Le kino kyoni kya twana kilamanga twana twakyo namani?

 Mwanā Yehova wa bulēme kutabuka i Yesu, wandi Mwana muswedibwe. Pādi Yesu mūlu, wādi muntu wa ku mushipiditu wa bukomo pamo’nka bwa Shandi. Wādi ubwanya kwilama aye mwine. Ino pābutwilwe Yesu pano pa ntanda bu mwana wa lukeke, wādi ke wampikwa bukomo. Byādi kebimusakila kulamwa.

Pa kusaka amba Yesu afikidije kiswa-mutyima kya Leza pano pa ntanda, wādi bidi wa kutama ne kwikala bu muntu mubwaninine, mutame senene. Ino Satana wādi kakimbe kumwipaya aye katamine. Kukimba kwaādi ukimba kwipaya Yesu paādi ukidi mwana mutyetye ne muswelo wāmulamine Yehova i mwanda usangaja’po kashā. Lelo nobe usaka kwiwivwana?—

Pabapite’tu kitatyi kīpi kupwa kwa Yesu kubutulwa, Satana watambija luñenyenye kelweñenya mūlu mutamba wa kutunduka. Bantu betwa bu bambuki ba malumba a ñenyenye, bantu befundanga ñenyenye, kebelulonda ku tutwa twa makilometele dya ku Yelusalema. Kufika kwine’kwa, abaipangula kwadi kwa kubutwilwa yewa wa kwikala mulopwe wa Bayuda. Abaipangula bantu bayukile binena Bible pa uno mwanda, nabo abalondolola’mba: ‘I mu Betelema.’—Mateo 2:1-6.

Kupwa kwa bambuki ba malumba a ñenyenye kupempula Yesu, lelo Leza webape kidyumu’ka kyapandija Yesu?

 Kupwa, Heloda mulopwe mubi wa mu Yelusalema waivwana mwanda wa uno mulopwe mupya wabutulwa panopano mu kibundi kya pabwipi kya Betelema, kasapwila bambuki ba malumba a ñenyenye amba: ‘Kimbai kako kana, kadi shi mubekamone nankyo mwiye munsapwile.’ Lelo uyukile Heloda kyasakila kuyuka kokwa kobakatana Yesu?—Mwanda Heloda udi na mukao ne kadi usaka amwipaye!

Lelo Leza nandi walama wandi Mwana muswelo’ka?—Eyo, bambuki ba malumba a ñenyenye pa kutana Yesu, abamupe byabuntu. Kupwa Leza wape bambuki’ba kidyumu mu kilotwa amba kemukyalukila kudi Heloda. Ponka’po nabo pa kwenda kwabo abapityila dishinda dingi kwampikwa kujokela ku Yelusalema. Heloda pa kuyuka amba bambuki ba malumba a ñenyenye abaenda dingi, wakalabala bibi. Heloda byakanine’nka kwipaya Yesu, waipaija bana bana-balume bonso ba munshi mwa myaka ibidi! Inoko papo, Yesu ke mwende kalā.

Lelo uyukile mwanyemena Yesu?—Papwile’tu bambuki ba malumba a ñenyenye kutaluka ku njibo, Yehova wadyumuna Yosefa mulumya Madia amba talukai munyemene kulampe, ku Edipito. Kwine’kwa ko kwapandila Yesu ku makasa a uno muntu mubi Heloda. Myaka pa kupita’po, ba Madia ne Yosefa pa kutamba na Yesu mu Edipito, Leza wape Yosefa kidyumu kikwabo. Wamusapwila mu kilotwa kwenda mu Nazala, mukashikata Yesu ku matwi talala.—Mateo 2:7-23.

Nkasampe Yesu wapandijibwa monka namani?

Mwene ubamone muswelo Yehova waālamine wandi Mwana?—Nobe momwena lelo i ani udingakene na toni twana tobafile mu mapapa kudi inato nansha udingakene na Yesu paādi mwana  mutyetye? Mwene nobe udi pamo bwa abo?—Nobe kudi bakimba kukusanshija. Le wibayukile?—

Bible unena amba Satana udi pamo bwa ntambo ubuluma ukimba kwitubokota. Ne kadi, enka muvudile bantambo kubotokela banyema batyebatye, Satana ne bademona bandi nabo babotokelanga divule bana batyetye. (1 Petelo 5:8) Inoko Yehova i mukomo kupita Satana. Yehova ubwanya kulama bandi bana nansha kutalula kintu kyonso kibi kibalonga Satana.

Le ukivulukile binena Shapita wa 10 wa kino kitabo pa bintu bitusakilanga Satana ne bademona bandi kulonga?—Eyo, bakimbanga kwitutweja mu bilongwa bya bulādi binena Leza amba i bibi. Ino le i bāni kete bafwaninwe kusambakena pamo?—Bine, i enka ba mwana-mulume ne mwana-mukaji batame besongele kete.

Ino i bya bulanda, mwanda kudi bakulu ba kala bamo baloelelwa kulāla na banuke. Pobalonga namino, banuke bana-balume ne bana-bakaji nabo bakokeja kwanza kulonga bintu bibi byobefundile kudi batame’ba. Bano bana nabo bashilula kwingidija mutaka wabo mu muswelo mubi. Kino kyo kyālongekele pa kalā mu kibundi kya Sodoma. Bible unena amba bantu ba mu kine kibundi’ki, “banuke ne bakulu,” bādi bakimba kulāla na bana-balume bāile kupempula Lota.—Ngalwilo 19:4, 5.

Nanshi, monka mwādi musakila Yesu kulamibwa, ne abe mwine nobe bikusakila kulamibwa ku makasa a batame—nansha ke ku bana bakwabo bene—bakakimba padi kulāla nobe. Pavule pene, bano bantu bakemwekeja bidi bu balunda nobe. Bakokeja kukupa enka ne bintu, shi wibalaya amba kukasapwilapo bantu bakwabo byobasaka kulonga nobe’bya. Inoko bano i bantu besakila abo bene, pamo’nka bwa Satana ne bademona bandi, kadi besakila enka nsangaji ya abo bene kete. Ne mine nsangaji’yo bakimba’yo mu kulāla na bana batyetye. Bine, kino i kibi mpata!

Lelo uyukile kyobakokeja kulonga kobasaka kwisangaja abo bene?—Bine, bakokeja padi kukukaila ku bya mutaka. Pakwabo  bakanza kukufukila nansha kutengeja bya mutaka byabo ku byobe. Ino abe kokolwa kuleka muntu nansha umo kukaya na obe mutaka wa bwana-bulume nansha wa bwana-bukaji. Abe pela nansha shi i tutu obe nansha kaka obe, nansha inobe nansha shobe mwine. Bino bipindi bya ngitu yobe i byobe kasuku kobe.

Le ukalonga namani shi muntu kasake kukutenga mu muswelo mubi?

Lelo i muswelo’ka obwanya kulama ngitu yobe ku bantu balonga bintu bibi namino?—Dibajinji bidi, kokolwa kuleka muntu ukukaila ku bya mutaka. Shi muntu kasake kukukaila’ko, munene na kusumininwa na diwi dikatampe amba: “Leka nankyo! Nsa kukakusapula!” Kadi shi muntu’wa kanena amba i abe waluba, kokitabija’byo. Ke bya binepo, ehe. Abe enda’nka kukamusapula nansha shi i ani! Nansha shi wanena amba byomwalonga’bya bimutala enka banwe bubidi kete, amba kokisokwela’byo muntu mukwabo, abe ufwaninwe enka kukamusapula. Nansha shi muntu’wa wakunena kukupa byabuntu’ka biyampe nansha wakutyinija amba usapule nkulonga bibi, abe ufwaninwe enka kwenda kukamusapula.

Kokikwatwa moyo, ino ufwaninwe kwikala mukosoke. Shi bobe bambutwile abakudyumuna amba tyina boba bantu nansha kokwa kuntu kudi kyaka kodi, ufwaninwe kwibevwana. Shi wibevwana, nabya ukanyema bantu babi babwanya kukulonga bibi.

Pa kuyuka myanda ya mwa kwilamina abe mwine ku bilongwa bibi bya bulādi, tanga Ngalwilo 39:7-12; Nkindi 4:14-16; 14:15, 16; 1 Kodinda 6:18; ne 2 Petelo 2:14.