Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 46

Mema Abaonakanya Ntanda—Le Akonakanya’yo Dikwabo?

Mema Abaonakanya Ntanda—Le Akonakanya’yo Dikwabo?

LELO wivwananga bantu besambila pa mfulo ya ntanda?—Dyalelo bantu bavule besambilanga’po. Bantu bamo balañanga’mba ntanda ikafula mu divita dya mabombe a mu lwelele dikalwa bantu. Lelo molangila Leza ukonakanya ntanda yetu ya buya bwa dyangi ne madiulu etu otuswele ne ñenyenye yao yeñenya’i?—

Enka na motwefundile kala, Bible unenanga myanda ya mfulo ya ntanda. Bible unena’mba: “Panopantanda papitanga.” (1 Yoano 2:17) Le ulanga’mba mfulo ya ntanda  yo ikekala mfulo ya pano panshi?—Ke amopo, Bible unena amba Leza wāpangile pano panshi “amba pekalwe,” bine, wāpangile’po amba bantu bekale’po ne kuloelelwa būmi ponka. (Isaya 45:18) Mitōto 37:29 inena’mba: “Boloke bakapyananga ntanda, ne kwikala monka nyeke.” O mwanda mwine Bible unena’mba pano panshi pasa kwikala’ko nyeke ne nyeke.—Mitōto 104:5; Musapudi 1:4.

Penepa shi mfulo ya ntanda ke mfulopo ya pano panshi, le mfulo ya ntanda i bika?—Tukatana malondololo shi tubandaule bya binebine byobya byālongekele mu mafuku a Noa. Bible ushintulula’mba: “Ko konka kwaonekele ne yoya ntanda yadiko’ya pa kulobelwa’yo mu mema.”—2 Petelo 3:6.

Le kudi ne bantu bāpandile pāfikile mfulo ya ntanda pa Dilobe, mu mafuku a Noa?—Bible unena’mba Leza wālamine ‘Noa, mwedi wa mbila ya boloke, ne bakwabo’po basamba-babidi, pāletele dilobe pano pa ntanda pa bakubulwa bwine Leza.’—2 Petelo 2:5.

Lelo i ntanda’ka yāonakanibwe mu mafuku a Noa?

Le penepo, ntanda yāfudile yādi ntanda’ka? Le yādi nshi’ni, nansha i bantu babi?—Bible unena’mba yādi ‘ntanda ya bakubulwa bwine Leza.’ Kadi tala, Noa i mutelwe bu “mwedi wa mbila” nansha musapudi. Le ulanga amba i bika byaādi usapula?—Noa wādi udyumuna bantu pa mwanda wa mfulo ya “ntanda yadiko’ya.”

Yesu pāisambile pa dino Dilobe dikatampe, wāsapwidile bandi bana ba bwanga bine byādi bilonga bantu kumeso’tu kwa mfulo kufika. Wēbasapwidile amba: “Mu oa mafuku abadikile ku meso a dilobe dya mema, [bantu] badi badya bēdīila; batoma bētomena, basonga bēsongela, basongwa nabo bēsongelwa; kutūla ne ku dyodya difuku dyātwelele Noa mu safini, ne kuyūkapo mpika, ino pa kufika dilobe dyatukija bonso.” Kupwa Yesu wānena amba kumeso kwa mfulo kufika, bantu bakekalanga balonga enka nabya.—Mateo 24:37-39.

 Binenwa bya Yesu bitulombola amba tukokeja kuboila ñeni ku byādi bilonga bantu kumeso kwa Dilobe. Powatangile Shapita wa 10 wa kino kitabo, le ukivulukile byādi bilonga bano bantu?—Bantu bamo bādi na lonji kadi bādi balonga bintu bya kumwesha bakwabo malwa. Inoko, enka munenene’kyo Yesu, bakwabo bavule nabo kebādipo bateja Leza paātumine Noa kwibasapwila.

Ebiya difuku dimo, Yehova wālombola Noa amba usa konakanya bantu babi ku dilobe. Mema ādi a kulobeja ntanda yonso, enka ne ngulu mine. Yehova wānena Noa obake safini mukata. Yādi bwa kisanduku nansha bu kikabatyi kimo kikata, kilampe, na mokokeja kwikimwena pa paje 238 shi ubalule māni dya kunyuma.

Leza wānena Noa apope safini mikata mwa kutwela aye ne kisaka kyandi pamo ne banyema. Noa ne ba mu kisaka kyandi bāingile mwingilo mukata. Bāshindile mityi mikatampe, basonga’yo mbao, kupwa kebapunga safini abo bonso pamo. Wādi mwingilo wa myaka mivulevule mwanda safini yādi mikatampe mpata.

Le ukivulukile kintu kikwabo kyādi kilonga Noa mu myaka yonso yaādi ūbaka safini?—Wādi usapula, wenda udyumuna bantu amba Dilobe dyadyo dīya. Le kwādi ne bantu bāivwene? Kutupu nansha umo wāivwene, poso enka kisaka kya Noa kete. Ino bantu bakwabo bonso bādi bekwete’ko enka na kulonga bintu bingi. Shi ukivulukile byānene Yesu, le i bika byobādi balonga?—Bādi bekwete’ko na kudya ne kutoma ne kwisonga. Kebādipo befwatakenya amba i babi, kadi kebādipo na kyaba kya kwivwana Noa. Shi ke pano, tutale byēbafikile.

Kupwa kwa Noa ne kisaka kyandi kutwela mu safini, Yehova wāshita mulango. Nansha nankyo, bantu bāshele panja pa safini kebādipo betabije amba Dilobe disa kwiya. Ino enka’tu na mu kukopa kwa diso, mema āshilula kulakata mūlu! Kādipo’tu mvula unokanga mafuku onso’u. Bine, kwādi i kupunguluka kwa mema byamwiko! Bukidi bonka mema keakuke milungu bwa minonga  mikata, ne kutūta na lupumo lukatakata. Ādi apitula mityi mikatakata ne kukunkumuna mabwe makatampe ulanga’mba i tumabwe tutyetutye. Lelo i kika kyāfikīle bantu bādi panja pa safini?—Yesu unena’mba: “Dilobe dikatampe dya mema dyafika, dyebakubija bonsololo.” Bantu bonso bādi panja pa safini bāfwa. Mwanda waka?—Yesu wānene amba i mwanda wa “kuta’ko mityima mpika.” Bine, kebāivwenepo!—Mateo 24:39, MB; Ngalwilo 6:5-7.

Mwanda waka ketufwaninwepo enka kukaya makayo?

Pano vuluka, Yesu wānene amba byobya byāfikile bantu i kidyumu kotudi dyalelo. Le i ñeni’ka yotuboila’ko?—I ino, bantu kebaonakanibwepo enka’tu pa mwanda wa amba bādi babi, ino i pa mwanda bavule kebādipo na kyaba kya kwifunda myanda ya Leza ne byaādi usaka kulonga. Netu tufwaninwe kutadija kutyina twakeifwana nabo, mwene i amo?—

Lelo ulanga’mba Leza ukonakanya ntanda dikwabo na dilobe?—Mhm, Leza i mulae amba kabwanyapo kukonakanya’yo monka ku dilobe. Wānene amba: “Nabika nkongolo wami mu dikumbi; nandi ukekalanga ke kiyukeno.” Yehova wānene amba nkongolo ukekalanga ke kiyukeno kya kuyukila’po amba “mema keakikaleta dilobe monka dya kukonakanya bu-ngitu bonso, mhm.”—Ngalwilo 9:11-17.

Nanshi tukulupilei’tu amba Leza kakonakanyapo ntanda dikwabo na dilobe. Inoko, enka na motwadi tubamwena’mwa, Bible wisambilanga pa mfulo ya ntanda. Kitatyi kikonakanya Leza ino ntanda, lelo i bāni  bakashiya bōmi?—Lelo i bantu batele mutyima’nka ku bintu bingi bapela ne kwifunda myanda ya Leza? Le i boba bekwete na kulonga bintu bikwabo ino kwifunda Bible mpika? Le ulanga’po namani?—

Batwe tusakanga kubadilwa mu boba bakalamwa bōmi na Leza, mwene i amo?—Mwene kikekala kiyampe mpata shi kisaka kyetu kyaikala pamo na kya Noa, shi Leza wetupandija batwe bonso?—Pa kusaka’mba tukapande ku mfulo ya ino ntanda, tufwaninwe kwivwanija muswelo mwine ukonakanya’yo Leza ne mwakaletela yandi ntanda impya ya boloke. Tutale bidi mwine mwakalongela’byo.

Bible witupa malondololo mu Danyele shapita 2, vese 44. Kino kisonekwa kisambila pa ano etu mafuku amba: “Penepa kadi mu mafuku a boba balopwe Leza wa mūlu ukemika bulopwe [nansha umbikalo] kebukōnakanibwapo nansha patyetye, nansha bulopwe bwine bwabo kupityila ku bantu bangi, ehe; ino bukatyumuna bipindibipindi ne kukubija malopwe ano’a onsololo, kadi bukemananga nyeke.”

Lelo ubaivwanija kino?—Bible unena’mba bulopwe bwa Leza busa kukonakanya malopwe onso a pano pa ntanda. Mwanda waka?—Mwanda keakōkelepo Yewa mwine ubikikilwe na Leza bu Mulopwe. Le mwine obabikikile i ani’le?—Bine, i Yesu Kidishitu!

Yesu Kidishitu, Mulopwe mutongibwe na Leza, ukonakanya ino ntanda ku Amakedona

Yehova Leza ye udi na lupusa lwa kutonga bulopwe nansha umbikalo ufwaninwe kuludika, ne i mutonge wandi Mwana, Yesu, kwikala bu Mulopwe. Panopano ponka, Yesu Kidishitu, Mulopwe mutongwe na Leza, usa kutangidila mwingilo wa konakanya malopwe onso a ino ntanda. Mu Kusokwelwa shapita 19, vese 11 kutūla ku 16, ulombola mwakaletela buno bonakani, pamo’nka na mwikilombwela kino kifwatulo’mu. Mu Bible, divita dya Leza dikonakanya malopwe onso a pano pa ntanda ditelwa bu Amakedona nansha Halamakedona.

 Pano, Leza unena’mba Bulopwe bwandi busa konakanya imbikalo ya bantu. Ino lelo i mwitunene batwe tonakanye’yo?—Mhm, ke amopo, mwanda mu Bible, Amakedona utelwa bu “divita dya difuku dikatakata dya Leza, Mwinebukomobonso.” (Kusokwelwa 16:14, 16) Bine, Amakedona i divita dya Leza, ne ukengidija Yesu Kidishitu mwanda wa kutangidila bibumbo bya bulwi bya mūlu mu dino divita. Lelo divita dya Amakedona kedidi pabwipi? Tutalei mwa kujingulwila’kyo.

Tutange batwe bonso pamo tujingulule kitatyi kikatukija Leza babi bonso ne kupandija boba bamwingidila, mu Nkindi 2:21, 22; Isaya 26:20, 21; Yelemia 25:31-33; ne mu Mateo 24:21, 22.